ភ្ជាប់​ទៅ​គេហទំព័រ​ទាក់ទង

អ្នក​រិះគន់​រដ្ឋាភិបាល​ចិន​មួយ​រូប​ត្រូវ​បាន​កាត់ទោស​ឲ្យ​ជាប់​ពន្ធនាគារ ៨ ឆ្នាំ


លោក Xu Xiaoshun ដែល​ត្រូវ​ជា​ឪពុក​របស់​លោក Wu Gan ដែល​ត្រូវ​បាន​គេ​ឃុំ​ខ្លួន​ក្នុង​ការ​បង្ក្រាប​៧០៩ មើល​ឯកសារ​អំពី​រឿង​ក្តី​កូន​របស់​លោក​នៅ​ក្នុង​ភោជនីយដ្ឋាន​មួយ​នៅ​ក្នុង​ខេត្ត Jiangsu ប្រទេស​ចិន​ កាលពី​ថ្ងៃទី១២ ខែមិថុនា ឆ្នាំ២០១៧។

សកម្មជន​សិទ្ធិ​មនុស្ស​ចិន​ល្បី​ឈ្មោះ​មួយ​រូប​ត្រូវ​បាន​កាត់​ទោស​ឲ្យ​ជាប់​ពន្ធនាគារ ៨ ឆ្នាំ ពាក់ព័ន្ធ​នឹង​បទ​ចោទ​ប្រកាន់​ថា​ចង់​ផ្ដួល​រំលំ​រដ្ឋាភិបាល។

លោក Wu Gan អ្នក​សរសេរ​ប្លុក (blog) ដោយ​ប្រើ​ឈ្មោះ «Super Vulgar Butcher‍» ត្រូវ​បាន​កាត់​ទោស​នៅ​ថ្ងៃ​អង្គារ​នេះ នៅ​ក្នុង​តុលាការ Tianjin No. 2 Intermediate People's Court ក្នុង​ទីក្រុង​ប៉េកាំង ប្រទេស​ចិន។

លោក Wu Gan ត្រូវ​បាន​អាជ្ញាធរ​ចាប់​ខ្លួន​កាល​ពី​ខែ​ឧសភា ឆ្នាំ ២០១៥ កន្លង​ទៅ​នេះ នៅ​ភាគ​អាគ្នេយ៍​ប្រទេស​ចិន។ លោក​ត្រូវ​បាន​គេ​ស្គាល់​ថា​ជា​អ្នក​រិះគន់​អ្នក​នយោបាយ​ចិន នៅ​ក្នុង​យុទ្ធនាការ​ដ៏​យូរ​មក​ហើយ​របស់​លោក​ក្នុង​ការ​ប្រឆាំង​នឹង​អំពើ​ពុករលួយ និង​ការ​រំលោភ​អំណាច។

តុលាការ​បាន​សម្រេច​ថា លោក Wu Gan បាន​ព្យាយាម «ផ្ដួល​រំលំ​រដ្ឋ​អំណាច និង​ប្រព័ន្ធ​សង្គម​និយម‍» តាម​រយៈ​សកម្មភាព​ឧក្រិដ្ឋ​ជា​ច្រើន ដែល​ក្នុង​នោះ​មាន​ទាំង​ការ​ផ្សព្វផ្សាយ​ព័ត៌មាន​មិន​ពិត និង​ការ​រិះគន់​មនុស្ស​នៅ​លើ​បណ្ដាញ​អ៊ីនធឺណិត​ជា​ដើម។

លោក Wu Gan គឺ​ជា​មនុស្ស​ម្នាក់​ក្នុង​ចំណោម​សកម្មជន​សិទ្ធិ​មនុស្ស និង​មេធាវី​រាប់​រយ​នាក់ ដែល​ត្រូវ​បាន​រដ្ឋាភិបាល​ចិន​បោស​សម្អាត​នៅ​ក្នុង​ការ​បង្ក្រាប​ទៅ​លើ​អ្នក​ប្រឆាំង។ យុទ្ធនាការ​បង្ក្រាប​របស់​រដ្ឋាភិបាល​ដែល​គេ​ហៅ​ថា «ការ​បង្ក្រាប ៧០៩‍» នេះ បាន​ចាប់ផ្ដើម​ក្នុង​ទ្រង់ទ្រាយ​ធំ​កាល​ពី​ខែ​កក្កដា ឆ្នាំ ២០១៥ មក។

មេធាវី​របស់​លោក Wu Gan បាន​និយាយ​ថា កូន​ក្ដី​របស់​លោក​នឹង​ប្ដឹង​ទៅ​ឧទ្ធរណ៍។

នៅ​ក្នុង​សំណុំ​រឿង​មួយ​ផ្សេង​ទៀត​នៅ​ថ្ងៃ​អង្គារ​នេះ​ដែរ តុលាការ​មួយ​នៅ​ក្នុង​តំបន់​ភាគ​កណ្ដាល​ប្រទេស​ចិន​បាន​សម្រេច​មិន​ឲ្យ​មេធាវី​ការពារ​សិទ្ធិ​មនុស្ស​លោក Xie Yang ជាប់​ពន្ធនាគារ បន្ទាប់ពី​បាន​កាត់​ទោស​រូប​លោក​ពាក់ព័ន្ធ​នឹង​ការ​ចោទ​ប្រកាន់​ថា​បាន​ញុះញង់​ឲ្យ​មាន​ការ​ផ្ដួល​រំលំ​រដ្ឋ​អំណាច​មក។ លោក Xie Yang ត្រូវ​បាន​ចាប់​ខ្លួន​កាល​ពី​ឆ្នាំ ២០១៥ និង​បាន​ជាប់​ឃុំ​អស់​រយៈពេល ២ ឆ្នាំ មុន​ពេល​លោក​ត្រូវ​គេ​ដោះលែង​ឲ្យ​នៅ​ក្រៅ​ឃុំ​កាល​ពី​ខែ​ឧសភា​កន្លង​ទៅ​នេះ៕

XS
SM
MD
LG