ដូចទៅនឹងកម្មវិធីតាំងបង្ហាញដ៏ល្បីលំដាប់ថ្នាក់ពិភពលោកនៅ Las Vegas ដែរ កម្មវិធីតាំងបង្ហាញសម្ភារៈប្រើប្រាស់អេឡិចត្រូនិចដែលហៅកាត់ថា CES គឺជាកម្មវិធីតាំងបង្ហាញលើកទីមួយរបស់ចិន ដែលបង្ហាញពីឧបករណ៍ចាំបាច់នានា ហើយកម្មវិធីនេះត្រូវគេសង្កេតឃើញថា ជាអ្នកកំណត់និន្នាការនៃការប្រើប្រាស់ឧបករណ៍អេឡិចត្រូនិចថ្មីៗសម្រាប់ឆ្នាំក្រោយ។
នាយកកម្មវិធីតាំងបង្ហាញ CES ក្នុងតំបន់អាស៊ី លោក John Kelly បាននិយាយថា រោងចក្រផលិតឧបករណ៍ប្រើប្រាស់ទាំងនោះ បានបង្ហាញនូវការសាទរយ៉ាងខ្លាំងសម្រាប់ទីផ្សារចិន។
«មានការកើនឡើងនៃក្រុមមនុស្សថ្នាក់កណ្តាលនៅក្នុងប្រទេសចិន ដែលពួកគេមានប្រាក់នៅសល់បន្ទាប់ពីការចំណាយចាំបាច់ផ្សេងៗ។ មានអ្នកនិយមប្រើប្រាស់ឧបករណ៍បច្ចេកវិទ្យាច្រើនណាស់នៅទីនេះ គឺមនុស្សនៅក្នុងទីផ្សារទាំងមូល។ ទាំងអស់នេះហើយគឺជាកត្តាសំខាន់ដែលធ្វើឲ្យក្រុមហ៊ុនទាំងនោះសង្កត់ធ្ងន់លើទីផ្សារនេះ»។
វត្ថុដែលគេតាំងបង្ហាញភាគច្រើនគឺជាឧបករណ៍មានតម្លៃថោកៗ ដែលធ្លាប់ល្បីល្បាញរួចមកហើយ។
ក្រុមហ៊ុនមួយឈ្មោះ AltoTech បានបង្អួតឧបករណ៍របស់ខ្លួនឈ្មោះ «Cool Glass One» ដែលមានរូបរាងដូចជាវែនតា Google (Google Glass)។
ក្រុមហ៊ុនមួយទៀតឈ្មោះ JD Smartបានទាក់ទាញការចាប់អារម្មណ៍របស់អ្នកទស្សនាដោយឧបករណ៍បំពងសំឡេងរបស់ខ្លួនបញ្ជាដោយសំឡេងមនុស្ស ដែលគេហៅថា Ding Dong។
ក៏មានការតាំងបង្ហាញបច្ចេកវិទ្យាយន្តហោះគ្មានមនុស្សបើកនិងឧបករណ៍ឆ្លាតវៃសម្រាប់ការពារសន្តិសុខតាមផ្ទះផងដែរ។
រោងចក្រផលិតឡានបានតាំងបង្ហាញម៉ូដែលឡានដែលមានបច្ចេកវិទ្យាអេឡិចត្រូនិចខ្ពស់ ដូចជា ប្រព័ន្ធគ្រប់គ្រងព័ត៌មានដោយកាយវិការនិងប្រព័ន្ធកំសាន្តរបស់ក្រុមហ៊ុនឡាន Volkswagen ជាដើម។
ក៏ប៉ុន្តែ អ្នកវិភាគខាងវិស័យឧស្សាហកម្មបច្ចេកវិទ្យា លោក T.Z. Wong បាននិយាយថា លោកមានការរំពឹងទុកច្រើនជាងនេះពីកម្មវិធីតាំងបង្ហាញ CES អាស៊ីលើកទីមួយនេះ។
«ខ្ញុំចង់ឃើញកម្មវិធីតាំងបង្ហាញឆ្នាំក្រោយ មានការសម្រិតសម្រាំងជ្រើសរើសយកក្រុមហ៊ុនមកតាំងបង្ហាញឲ្យបានល្អជាងនេះ ជាពិសេសការបង្ហាញនូវអ្វីដែលមានលក្ខណៈពិសេសប្លែកខុសពីគេ។ នៅក្នុងឆ្នាំនេះ មានឧបករណ៍ស្រដៀងគ្នាច្រើនណាស់»។
មានឧបករណ៍មួយដែលមានការទាក់ទាញជាងគេ គឺចុងភៅមនុស្សយន្ត ផលិតដោយក្រុមហ៊ុនអង់គ្លេសឈ្មោះ Moley Robotics ដែលមនុស្សយន្តនេះមានជំនាញចម្អិនស៊ុបខ្ទិះក្តាម។
ទោះបីជាវាមិនទាន់រួចរាល់សម្រាប់ទីផ្សារក៏ដោយ ក្រុមហ៊ុននេះបាននិយាយថា នៅថ្ងៃណាមួយចុងភៅមនុស្សយន្តនេះនឹងអាចចម្អិនម្ហូបបានច្រើនមុខ ដោយទាញយករូបមន្តធ្វើម្ហូបពីអ៊ីនធឺណិត។
សមាគមសម្ភារៈប្រើប្រាស់អេឡិចត្រូនិច ដែលរួមបញ្ចូលគ្នានូវក្រុមហ៊ុនបច្ចេកវិទ្យាជាង២.០០០ បាននិយាយថា ក្នុងឆ្នាំ២០១៤ ការចំណាយទៅលើឧបករណ៍អេឡិចត្រូនិចមានលើសពីមួយលានលានដុល្លារនៅទូទាំងពិភពលោក។ មួយភាគបីនៃការចំណាយនេះគឺនៅក្នុងទ្វីបអាស៊ី ដែលទីផ្សារកំពុងមានការរីកចម្រើន៕
ប្រែសម្រួលដោយ នូវ ពៅលក្ខិណា
