ប៉ូលិសក្នុងរដ្ឋ California របស់សហរដ្ឋអាមេរិកបាននិយាយថា មនុស្សប្រាំពីរនាក់ត្រូវបានសម្លាប់កាលពីថ្ងៃចន្ទនៅក្នុងការបាញ់ប្រហារដែលពាក់ព័ន្ធគ្នាចំនួនពីរកន្លែងនៅឯការដ្ឋានកសិកម្ម។
ការបាញ់ប្រហារបានកើតឡើងនៅទីក្រុង Half Moon Bay ភាគខាងត្បូងនៃទីក្រុង San Francisco។ អាជ្ញាធរបាននិយាយនៅក្នុងសន្និសីទសារព័ត៌មានថា មនុស្ស ៤ នាក់ត្រូវបានគេរកឃើញថាបានស្លាប់ និងមនុស្សទី ៥ រងរបួសដោយគ្រាប់កាំភ្លើងនៅកន្លែងមួយ ខណៈមនុស្ស ៣ នាក់ផ្សេងទៀតត្រូវបានគេរកឃើញថា បានស្លាប់នៅឯការដ្ឋានទីពីរដែលមានចម្ងាយជាច្រើនគីឡូម៉ែត្រពីគ្នា។
តម្រួតស្រុក San Mateo លោកស្រី Christina Corpus បានកំណត់អត្តសញ្ញាណជនសង្ស័យដែលជាអ្នកបាញ់ប្រហារនោះថា ឈ្មោះ Chunli Zhao អាយុ៦៧ ឆ្នាំ ហើយបាននិយាយថា គាត់បានធ្វើការនៅកសិដ្ឋានមួយដែលត្រូវបានបាញ់ប្រហារនេះ។
សមត្ថកិច្ចបានឲ្យដឹងថា ជនសង្ស័យត្រូវបានចាប់ខ្លួនបន្ទាប់ពីបានបើកបរទៅកន្លែងចតរថយន្តរបស់ប៉ូលិស ដើម្បីចូលសារភាពដោយខ្លួនឯង ហើយមានអាវុធក្នុងរថយន្ត។
លោកស្រី Corpus បាននិយាយថា ជនសង្ស័យកំពុងសហការជាមួយអ្នកស៊ើបអង្កេត ប៉ុន្តែមូលហេតុមិនទាន់ច្បាស់នៅឡើយទេ។
លោក Josh Becker សមាជិកព្រឹទ្ធសភាប្រចាំរដ្ឋដែលតំណាងឱ្យតំបន់នោះ និងបានហៅវាថាជាសហគមន៍កសិកម្ម ដែលមានការរាប់អានគ្នា«ជិតស្និទ្ធបំផុត» បាននិយាយថា៖
«យើងនៅតែព្យាយាមយល់ឱ្យច្បាស់អំពីអ្វីដែលបានកើតឡើង និងមូលហេតុ ប៉ុន្តែវាពិតជាសោកនាដកម្មមិនគួរឱ្យជឿ»។
ការបាញ់ប្រហារកាលពីថ្ងៃចន្ទកើតឡើងបន្ទាប់ពីការបាញ់ប្រហារដ៏ធំមួយកាលពីថ្ងៃសៅរ៍នៅទីក្រុង Monterey Park ភាគខាងត្បូងរដ្ឋ California ដែលបានសម្លាប់មនុស្ស ១១ នាក់ និង ៩ នាក់ផ្សេងទៀតរងរបួស។
អភិបាលរដ្ឋ California លោក Gavin Newsom បានបង្ហោះសារលើ Twitter ថា លោកកំពុងនៅឯមន្ទីរពេទ្យជាមួយអ្នករបួសនៅក្នុងការបាញ់ប្រហារកាលពីថ្ងៃសៅរ៍ នៅពេលដែលលោកបានឮអំពីការវាយប្រហារកាលពីថ្ងៃចន្ទ។
លោកបានសរសេរថា «សោកនាដកម្មនៅលើសោកនាដកម្ម»៕
ព័ត៌មានមួយចំនួននៅក្នុងសេចក្តីរាយការណ៍នេះត្រូវបានដកស្រង់ពីទីភ្នាក់ងារសារព័ត៌មាន AP និង Reuters។
