ស្ត្រីកូរ៉េខាងត្បូង ដែលត្រូវពួកទាហានជប៉ុនបង្ខំឲ្យធ្វើទាសករផ្លូវភេទកាលពីសម័យសង្គ្រាមលោកលើកទី២ និងដែលនៅរស់រានមានជីវិតរហូតដល់សព្វថ្ងៃនេះ នឹងមានសិទ្ធិទទួលបានថវិកាឧបត្ថម្ភប្រហែល៩ម៉ឺនដុល្លារអាមេរិក សម្រាប់ស្ត្រីម្នាក់ៗ ពីមូលនិធិមួយដែលឧបត្ថម្ភដោយរដ្ឋាភិបាលជប៉ុន។
ចំណែកឯក្រុមគ្រួសាររបស់ជនរងគ្រោះស្ត្រីកូរ៉េខាងត្បូងដែលបានស្លាប់បាត់បង់ជីវិតវិញ ក្រសួងការបរទេសកូរ៉េខាងត្បូងបានឲ្យដឹងនៅថ្ងៃព្រហស្បតិ៍នេះថា ក្នុងមួយគ្រួសារៗទទួលបានថវិកាប្រហែល១ម៉ឺន៨ពាន់ដុល្លារអាមេរិក។ ក្រសួងការបរទេសកូរ៉េខាងត្បូងក៏បានឲ្យដឹងដែរថា ខ្លួនសង្ឃឹមថា រដ្ឋាភិបាលជប៉ុននឹងបញ្ជូនឲ្យបានឆាប់នូវថវិកាចំនួន៩លាន៩សែនដុល្លារអាមេរិក ដែលខ្លួនបានសន្យាផ្ដល់ឲ្យមូលនិធិជួយជនរងគ្រោះកូរ៉េខាងត្បូង ដែលបានបង្កើតឡើងកាលពីខែមុននេះ។
រដ្ឋាភិបាលប្រទេសកូរ៉េខាងត្បូង និងរដ្ឋាភិបាលប្រទេសជប៉ុន បានឯកភាពគ្នាបង្កើតនូវមូលនិធិនេះឡើងកាលពីខែធ្នូ ឆ្នាំ២០១៥ បន្ទាប់ពីរដ្ឋាភិបាលប្រទេសទាំងពីរបានស្រុះស្រួលគ្នាបញ្ចប់ជម្លោះពាក់ព័ន្ធនឹងជនរងគ្រោះទាសករផ្លូវភេទកូរ៉េខាងត្បូងរួចមក។ រដ្ឋាភិបាលក្រុងសេអ៊ូលបានឲ្យដឹងថា បច្ចុប្បន្ននេះ មានជនរងគ្រោះទាសករផ្លូវភេទនៅរស់រានមានជីវិតចំនួន៤៦នាក់ និងជនរងគ្រោះដែលបានបាត់បង់ជីវិតមានចំនួន១៩៩នាក់។
គេឃើញមានការតវ៉ាជាច្រើនបានធ្វើឡើង ពេលការិយាល័យរបស់មូលនិធិនេះត្រូវបានបើកឲ្យដំណើរការនៅក្នុងទីក្រុងសេអ៊ូលកន្លងទៅនេះ។ ប្រជាពលរដ្ឋកូរ៉េខាងត្បូងភាគច្រើន គិតថា រដ្ឋាភិបាលក្រុងសេអ៊ូលបានចាញ់ប្រៀបរដ្ឋាភិបាលជប៉ុននៅក្នុងការឯកភាពលើកិច្ចព្រមព្រៀងនេះ។
នៅក្រោមកិច្ចព្រមព្រៀង ដែលរដ្ឋាភិបាលទាំងពីរឯកភាពថាមិនអាចកែប្រែបាននេះ រដ្ឋាភិបាលជប៉ុនសន្យាឧបត្ថម្ភមូលនិធិនេះដើម្បីជួយជនរងគ្រោះ។
ប៉ុន្តែ ជាការផ្ដោះផ្ដូរត្រឡប់មកវិញ រដ្ឋាភិបាលកូរ៉េខាងត្បូងបានសន្យាថានឹងឈប់រិះគន់ប្រទេសជប៉ុនពាក់ព័ន្ធនឹងបញ្ហានេះតទៅទៀត៕
