គណៈកម្មាធិការព្រឹទ្ធសភាស.រ.អា.ដ៏សំខាន់មួយ បានផ្តល់ការយល់ព្រមលើបេក្ខជនរបស់លោកប្រធានាធិបតី ដូណាល់ ត្រាំ សម្រាប់មើលការខុសត្រូវលើទីភ្នាក់ងារសហរដ្ឋអាមេរិកសម្រាប់ការផ្សាយព័ត៌មានសកលហៅកាត់ថា USAGM ដែលជាទីភ្នាក់ងាររបស់រដ្ឋាភិបាលសហព័ន្ធ ត្រួតពិនិត្យការផ្សាយរបស់រដ្ឋាភិបាលសហរដ្ឋអាមេរិក ដែលមានរួមទាំងសំឡេងសហរដ្ឋអាមេរិក និង អាស៊ីសេរីផងដែរ។
នៅក្នុងការបោះឆ្នោតតាមខ្សែបន្ទាត់បក្ស ១២ ទល់ ១០ សំឡេងនោះ គណៈកម្មាធិការព្រឹទ្ធសភាស.រ.អា. ទទួលបន្ទុកកិច្ចការការបរទេស ដែលគ្រប់គ្រងដោយគណបក្សសាធារណរដ្ឋនោះ បានត្រួសត្រាយផ្លូវដើម្បីបញ្ជូនការតែងតាំងនេះ ទៅកាន់ព្រឹទ្ធសភាពេញអង្គ ដើម្បីធ្វើការបោះឆ្នោត។
ការតែងតាំងលោក Michael Pack ដែលជាអ្នកផលិតភាពយន្តឯកសារម្នាក់នោះ បានស្ថិតនៅក្រោមការពិចារណាអស់ពេលជិត២ឆ្នាំ មួយផ្នែកគឺដោយសារមានការព្រួយបារម្ភរបស់សមាជិកគណបក្សប្រជាធិបតេយ្យអំពីការចោទប្រកាន់លើវិធីចាត់ចែងហិរញ្ញវត្ថុរបស់លោក។
កាលពីសប្តាហ៍មុន ការបោះឆ្នោតរបស់គណៈកម្មាធិការនេះត្រូវបានពន្យារពេលម្តងទៀត បន្ទាប់ពីការិយាល័យក្រសួងយុត្តិធម៌នៃរដ្ឋធានីវ៉ាស៊ីនតោន បានបើកការស៊ើបអង្កេតថាតើលោក Michael Pack មានបានប្រើប្រាស់មូលនិធិនៃអង្គការមិនរកចំណេញឈ្មោះ Public Media Lab ដោយខុសច្បាប់ដើម្បីផលប្រយោជន៍ខ្លួនលោកផ្ទាល់ឬទេនោះ។
ក្នុងសវនាការកាលពីថ្ងៃព្រហស្សតិ៍ សមាជិកព្រឹទ្ធសភាមួយចំនួនខាងគណបក្សប្រជាធិបតេយ្យ មិនបានទទួលការយល់ព្រមឲ្យពន្យាពេលសវនាការម្តងទៀត រហូតដល់ពេលណាដែលលោក Pack អាចដោះស្រាយការព្រួយបារម្ភ ពាក់ព័ន្ធនឹងការចាត់ចែងលុយកាក់របស់លោក ដាច់ស្រេចសិន ឬមួយដល់ពេលណាដែលការិយាល័យក្រសួងយុត្តិធ៌ករដ្ឋធានីវ៉ាស៊ីនតោន បញ្ចប់ការស៊ើបអង្កេតរបស់ខ្លួនហើយសិន។
សមាជិកព្រឹទ្ធសភានៃគណបក្សប្រជាធិបតេយ្យ លោក Bob Menendez បានថ្លែងតាមសម្តីដើមរបស់លោកថា៖ «លោក Michael Pack បានបោះបង់ចោលការតាំងចិត្តរបស់លោកចំពោះខ្ញុំ ហើយបានបដិសេធមិនព្រមធ្វើតាមការសន្យាលើរឿងដ៏សំខាន់នេះ»។ លោក Menendez បានបន្ថែមថា គណៈកម្មាធិការដែលដឹកនាំដោយគណបក្សសាធារណរដ្ឋនេះ បរាជ័យក្នុងការចាត់ចែងការតែងតាំងនេះ តាមលក្ខណៈសហការណ៍គ្នារវាងគណបក្សទាំងពីរ។
លោកប្រធានគណកម្មាធិការព្រឹទ្ធសភា Jim Risch បានថ្លែងថា គណៈកម្មាធិការនេះបានត្រៀមខ្លួនដើម្បីពន្យារសវនាការតែងតាំង «បើសិនជាក្រសួងយុត្តិធ៌មស.រ.អា. ស្នើសុំឲ្យពន្យារពេលនោះ ក៏ប៉ុន្តែរឿងនេះមិនបានកើតឡើងទេ»។
វីអូអេបានទាក់ទងជាមួយអ្នកនាំពាក្យរបស់លោកប្រធានគណៈកម្មាធិការ Jim Risch ដើម្បីសុំអត្ថាធិប្បាយបន្ថែម លើការចោទប្រកាន់ទាំងអម្បាលមាណ។ ក្នុងសេចក្តីថ្លែងការមួយ លោក Risch ថ្លែងថា៖ «ខ្ញុំសប្បាយចិត្តណាស់ដែលនៅទីបំផុត គណៈកម្មាធិការនេះអាចផ្តល់ការយល់ព្រមលើការតែងតាំងលោក Pack សម្រាប់កាន់តំណែងជានាយកប្រតិបត្តិនៃទីភ្នាក់ងាររបស់រដ្ឋាភិបាលសហព័ន្ធ ដែលជាតួនាទីមួយ ដែលត្រូវបានទុកឲ្យនៅទំនេរ អស់ពេលជាយូរពេកហើយនោះ»៕
