ភ្ជាប់​ទៅ​គេហទំព័រ​ទាក់ទង

ប្រអប់​ខ្មៅ​ទី​ពីរ​ពី​យន្តហោះ​ Germanwings​ បង្ហាញ​ថា​ ការ​ធ្លាក់​យន្តហោះ​​ជា​ទង្វើ​ដោយ​ចេតនា


រួូបភាព​បង្ហាញ​ពី​ប្រអប់​ខ្មៅ​ទី​ពីរ​នៃយន្តហោះ​ Germanwings ដែល​បាន​ធ្លាក់​កាល​ពី​សប្តាហ៍​មុន។

ក្រុម​អ្នក​ស៊ើប​អង្កេត​អាកាសចរណ៍​ និយាយ​ថា​ ការ​វិភាគ​ទី​មួយ​អំពី​ប្រអប់​ខ្មៅ​ ហៅ​ «black box» ពី​យន្តហោះ​ Germanwings​ ដែល​បាន​ធ្លាក់​នៅ​ក្នុង​តំបន់​ភ្នំ​ Alps​ នៃ​ប្រទេស​ បារាំង​ កាល​ពី​ខែ​មុន​ បាន​សង្កត់​បន្ថែម​ទៅ​លើ​ទ្រឹស្តី​ដែល​ថា​ អ្នក​បើក​យន្តហោះ​ទី​ពីរ​ បាន​បើក​យន្តហោះ​បុក​ភ្នំ​ដោយ​ចេតនា​ និង​សម្លាប់​មនុស្ស​ទាំង​ ១៥០​ នាក់​នៅ​ក្នុង​នោះ។​

ក្រុម​អ្នក​ស៊ើប​អង្កេត​បាន​ប្រកាស​នៅ​ថ្ងៃ​សុក្រ​នេះ​ថា​ ម៉ាស៊ីន​ថត​ទិន្នន័យ​នៃ​ការ​ហោះហើរ​ពី​យន្តហោះ​ Germanwings​ បាន​បង្ហាញ​ថា​ Andreas​ Lubitz​ អ្នក​បើក​យន្តហោះ​ទី​ពី​របាន​បិទ​ទ្វារ​ចាក់​សោ​មិន​ឲ្យ​អ្នក​បើក​យន្តហោះ​ទី​មួយ​ចូល​ក្នុង​បន្ទប់​បើក​បរ​វិញ​បាន​ ហើយ​បាន​ប្តូរ​ផ្លូវ​ហោះ​ពី​ការ​ហោះស្វ័យប្រវត្តិ​ និង​បាន​ដំឡើង​ល្បឿន​យន្តហោះ​ម្តង​ហើយ​ម្តង​ទៀត​ នៅ​ពេល​ដែល​យន្តហោះ​នោះ​បោះពួយ​សំយុង​ក្បាល​ទៅ​បុក​ភ្នំ។​ គេ​បាន​រក​ឃើញ​ម៉ាស៊ីន​ថត​ទិន្នន័យ​ហោះ​ហើរ​ កាល​ពី​ថ្ងៃ​ព្រហស្បតិ៍។​

នៅ​ថ្ងៃ​ជា​មួយ​គ្នា​នេះ​ដែរ​ រដ្ឋអាជ្ញា​អាល្លឺម៉ង់​ ដែល​ធ្វើ​ការ​ស៊ើប​អង្កេត​ការ​ធ្លាក់​យន្តហោះ​នេះ​ បាន​ថ្លែង​ថា​ Lubitz​ បាន​ស្វែងរក​ព័ត៌មាន​តាម​អ៊ីនធឺណែត​អំពី​ការ​ធ្វើ​អត្តឃាត​ និង​វិធី​ការពារ​សន្តិសុខ​ក្នុង​បន្ទប់​បើក​យន្តហោះ​ ក្នុង​ពេល​ប៉ុន្មាន​ថ្ងៃ​មុន​យន្តហោះ​នេះ​ធ្លាក់៕

XS
SM
MD
LG