មេដឹកនាំខាងគណបក្សប្រជាធិបតេយ្យក្នុងព្រឹទ្ធសភាសហរដ្ឋអាមេរិកលោក Chuck Schumer បានព្រមានកាលពីថ្ងៃអាទិត្យម្សិលមិញអំពីការគំរាមកំហែងនៃអំពីហិង្សាក្នុងថ្ងៃស្បថចូលកាន់តំណែងថ្ងៃទី២០ ខែមករាខាងមុខ របស់លោក Joe Biden ជាពិសេសបន្ទាប់ពីការវាយប្រហារកាលពីសប្តាហ៍មុនលើវិមានសភាសហរដ្ឋអាមេរិកដោយពួកអ្នកគាំទ្ររបស់ប្រធានាធិបតី Donald Trump រាប់ពាន់នាក់ដែលបានព្យាយាមរារាំងការឡើងកាន់អំណាចរបស់លោក Biden។
លោក Schumer ដែលនៅពេលឆាប់ៗនេះនឹងក្លាយជាមេដឹកនាំសំឡេងភាគច្រើនរបស់ព្រឹទ្ធសភា បាននិយាយថា លោកបាននិយាយជាមួយលោក Christopher Wray នាយកការិយាល័យស៊ើបអង្កេតសហព័ន្ធ FBI កាលពីថ្ងៃសៅរ៍សប្តាហ៍មុន ដោយ «ជំរុញឲ្យលោកតាមរកពួកកុបករហិង្សា ដែលត្រូវបានញុះញង់ដោយប្រធានាធិបតី Trump ដែលបានវាយប្រហារវិមានសភាសហរដ្ឋអាមេរិក ហើយបានសម្លាប់មន្ត្រីប៉ូលិសម្នាក់ និងការពារទប់ទល់នឹងការវាយប្រហារបន្ថែមទៀត»។
លោក Schumerបានមានប្រសាសន៍ទៀតថា «ការគំរាមកំហែងនៃក្រុមជ្រុលនិយមហិង្សា នៅតែមានកម្រិតខ្ពស់ហើយនៅបីបួនសប្តាហ៍ខាងមុខទៀត ជាពេលវេលាសំខាន់នៅក្នុងដំណើរការនៃលទ្ធិប្រជាធិបតេយ្យរបស់យើង ដោយមានការស្បថចូលកាន់តំណែងនៅពេលខាងមុខនេះ។
ក្នុងព្រឹត្តិការណ៍ស្រដៀងគ្នានេះដែរ អភិបាលរដ្ឋធានីវ៉ាស៊ីនតោនលោកស្រី Muriel Bowser បានផ្ញើលិខិតមួយច្បាប់កាលពីថ្ងៃសៅរ៍ ដោយបានសុំលោក Chad Wolf រដ្ឋមន្ត្រីស្តីទីក្រសួងសន្តិសុខមាតុភូមិ ពេល៣ថ្ងៃបន្ថែមសម្រាប់ការកំណត់រយៈពេលពង្រឹងសន្តិសុខជាតិពាក់ព័ន្ធនឹងការស្បថចូលកាន់តំណែងនៅពេលបច្ចុប្បន្នទៅដល់រយៈពេល២សប្តាហ៍ ដោយចាប់ផ្តើមនៅថ្ងៃច័ន្ទនេះហើយបន្តរហូតដល់ថ្ងៃទី២៤ ខែមករា។
លោកស្រីអភិបាលក្រុង បានមានប្រសាសន៍ទៀតថា លោកស្រី ចង់ឲ្យក្រសួងមហាផ្ទៃសហព័ន្ធច្រានចោលសំណើសម្រាប់ការអនុញ្ញាតការប្រមូលផ្តុំសាធារណៈនៅក្នុងរយៈពេលនោះ។
លោកស្រីអភិបាលក្រុង បានបន្ថែមទៀតថា សំណើរបស់លោកស្រី«ជាការសំខាន់ដើម្បីបង្ហាញការប្តេជ្ញាចិត្តរួមគ្នា ដើម្បីធ្វើឲ្យប្រាកដថាការផ្ទេរអំណាចធ្វើទៅតាមរដ្ឋធម្មនុញ្ញ»៕
