សមាជិករដ្ឋសភារបស់រដ្ឋ West Virginia ម្នាក់ខាងគណបក្សសាធារណរដ្ឋ ឈ្មោះ Derrick Evans ដែលបានថតរូបខ្លួនឯងសម្រុកចូលវិមានសភាសហរដ្ឋអាមេរិកក្នុងរដ្ឋធានីវ៉ាស៊ីនតោន បានលាលែងពីតំណែង ហើយការចាប់ខ្លួនជាច្រើនទៀតត្រូវបានប្រកាសឡើងកាលពីថ្ងៃសៅរ៍ ដែលជាផ្នែកមួយនៃការស៊ើបអង្កេតលើការវាយប្រហារកាលពីថ្ងៃពុធលើវិមានសភា។
លោក Evans បានប្រកាសអំពីការលាលែងពីតំណែងរបស់លោកកាលពីថ្ងៃសៅរ៍នៅក្នុងលិខិតមួយច្បាប់ដែលផ្ញើជូនអភិបាលរដ្ឋ West Virginia លោក Jim Justice។
លោក Evans ត្រូវបានចោទប្រកាន់ពីបទចូលក្នុងតំបន់ហាមឃាត់នៅបរិវេណវិមានសភា និងការប្រព្រឹត្តិទង្វើគ្មានច្បាប់ទម្លាប់។ ប្រសិនបើត្រូវបានកាត់ទោស លោកនឹងប្រឈមនឹងការជាប់ពន្ធនាគារមួយឆ្នាំកន្លះនៅក្នុងពន្ធនាគារសហព័ន្ធ។
លោកបានថតវីដេអូផ្សាយផ្ទាល់តាម Facebook បង្ហាញខ្លួនលោកទម្លាយចូលក្នុងអាគារវិមានសភាជាមួយហ្វូងកុបករជាច្រើននាក់ទៀត។ នៅពេលមួយ គាត់បាននិយាយថា៖ «យើងបានចូលដល់ហើយ។ យើងបានចូលដល់ហើយ»។ នៅក្នុងវីដេអូមួយទៀតដែលបង្ហោះតាម Facebook មុនវីដេអូនេះ ហើយដែលត្រូវបានលុបចោលវិញនោះ លោក Evans បានព្រមានថា ក្រុមកុបករអាចសង្គ្រប់សម្រុកចូលវិមានសភា។
តាំងពីពេលនោះមក លោកបាននិយាយថា លោកចង់សុំទោសចំពោះទង្វើរបស់លោក។ នេះបើយោងតាមសេចក្ដីរាយការណ៍របស់ប្រព័ន្ធផ្សព្វផ្សាយនានា។
ជនម្នាក់ទៀតឈ្មោះ Richard Barnett អាយុ ៦០ ឆ្នាំ មកពីទីក្រុង Little Rock រដ្ឋ Arkansas ត្រូវបានចាប់ខ្លួនកាលពីព្រឹកថ្ងៃសុក្រ និងត្រូវបានចោទប្រកាន់ពីបទចូលក្នុងការិយាល័យប្រធានរដ្ឋសភាអ្នកស្រី Nancy Pelosi។ រូបថតមួយចំនួនបានបង្ហាញថា ជននេះអង្គុយនៅក្នុងការិយាល័យរបស់អ្នកស្រី Pelosi ដោយដាក់ជើងនៅលើតុ។
បើយោងតាមឯកសារតុលាការចេញផ្សាយកាលពីថ្ងៃសុក្រ ជនឈ្មោះ Barnett នេះ ប្រឈមនឹងបទចោទប្រកាន់ ៣ ករណី គឺការចូលដោយចេតនានិងស្ថិតនៅក្នុងកន្លែងហាមឃាត់ ការចូលដោយហិង្សានិងការប្រព្រឹត្តិទង្វើគ្មានច្បាប់ទម្លាប់នៅវិមានសភា និងការលួចលុយ របស់របរ ឬឯកសារសាធារណៈ។ ជននេះដែលនឹងប្រឈមនឹងការជាប់ពន្ធនាគាររហូតដល់មួយឆ្នាំ កំពុងជាប់ឃុំឃាំងនៅក្នុងរដ្ឋ Arkansas រង់ចាំការបញ្ជូនខ្លួនទៅកាន់រដ្ឋធានីវ៉ាស៊ីនតោន។
ជនឈ្មោះ Barnett នេះ បាននិយាយប្រាប់ស្ថានីយ៍ទូរទស្សន៍មួយនៅក្នុងរដ្ឋ Arkansas កាលពីថ្ងៃព្រហស្បតិ៍ទី ៧ ខែមករាថា គាត់រកបន្ទប់ទឹកនៅពេលគាត់ដើរកាត់ការិយាល័យប្រធានរដ្ឋសភា។ គាត់បានថ្លែងថា គាត់បានធ្វើឲ្យប្រឡាក់ឈាមរបស់គាត់លើស្រោមសំបុត្រនៅលើតុរបស់អ្នកស្រី Pelosi ហើយក៏បានយកស្រោមសំបុត្រនោះទៅដោយទុកកាក់តម្លៃ ២៥ សេនជាសំណងចំពោះការយកស្រោមសំបុត្រនេះ។
លោក Evans និងលោក Barnett ស្ថិតក្នុងចំណោមអ្នកដែលត្រូវចោទប្រកាន់កន្លងមកក្នុងតុលាការសហព័ន្ធក្នុងរដ្ឋធានីវ៉ាស៊ីនតោន ពាក់ព័ន្ធនឹងកុបកម្មនោះ។ បទចោទប្រកាន់ទាំងនេះត្រូវបានដាក់ទៅតុលាការកាលពីថ្ងៃព្រហស្បតិ៍ ហើយត្រូវបានបង្ហាញឱ្យដឹងកាលពីថ្ងៃសុក្រ។
បន្ថែមពីលើនេះទៀត មនុស្សប្រមាណ ៤០ នាក់ទៀត ត្រូវបានចោទប្រកាន់នៅក្នុងតុលាការជាន់ខ្ពស់ទីក្រុងវ៉ាស៊ីនតោន ដែលភាគច្រើនរងការប្រកាន់ពីបទចូលក្នុងវិមានសភាដោយខុសច្បាប់ និងការរំលោភលើបម្រាមគោចរ។
កាលពីថ្ងៃសៅរ៍ ជនឈ្មោះ Jacob Anthony Chansley ដែលបង្ហាញខ្លួននៅក្នុងរូបថតនិងវីដេអូជាច្រើន ដោយមានពាក់មួកធ្វើពីរោមសត្វមានស្នែង និងមានគូសថ្នាំពណ៌លើមុខផងនោះ ត្រូវបានចាប់ខ្លួន និងប្រឈមនឹងការចោទប្រកាន់មួយចំនួនដូចជា ការចូលដោយហិង្សានិងការប្រព្រឹត្តិទង្វើគ្មានច្បាប់ទម្លាប់នៅវិមានសភា។
កាលពីយប់ថ្ងៃសុក្រ ជនឈ្មោះ Adam Johnson អាយុ ៣៦ ឆ្នាំ មកពីរដ្ឋ Florida ត្រូវបានចាប់ខ្លួននៅក្នុងស្រុក Pinellas រដ្ឋ Florida។ បុរសម្នាក់ដែលមើលទៅប្រហែលជាលោក Johnson នេះ ត្រូវគេឃើញកាន់តុសម្រាប់ឈរថ្លែងសុន្ទរកថារបស់ប្រធានរដ្ឋសភាក្នុងវិមានសភា។ បទចោទប្រកាន់លើជននេះនៅមិនទាន់ដឹងនៅឡើយទេ។
ក្នុងចំណោមអ្នកដែលត្រូវចោទប្រកាន់ក្នុងតុលាការសហព័ន្ធ ជនឈ្មោះ Lonnie Coffman អាយុ ៧០ ឆ្នាំ ដែលជាពលរដ្ឋមកពីរដ្ឋ Alabama ត្រូវបានចោទប្រកាន់ពីបទមានកាំភ្លើងមិនបានចុះបញ្ជីត្រឹមត្រូវ និងបទកាន់កាប់កាំភ្លើងខ្លីដោយគ្មានអាជ្ញាប័ណ្ណ។ នៅក្នុងឡានរបស់ជននេះដែលចតនៅក្រោយវិមានសភា កាលពីថ្ងៃពុធ ប៉ូលិសបានរកឃើញគ្រាប់បែកដបសាំងចំនួន ១១ គ្រាប់។
ប្រធានការិយាល័យសហព័ន្ធស៊ើបអង្កេត (FBI) លោក Christopher Wray បាននិយាយថា ការចោទប្រកាន់ដែលបានប្រកាសកន្លងមក «គឺគ្រាន់តែជាការចាប់ផ្តើមនៃកិច្ចខិតខំប្រឹងប្រែងជាបន្តរបស់ទីភ្នាក់ងារ FBI ដើម្បីស្វែងរកជនល្មើស» នៃកុបកម្មកាលពីថ្ងៃពុធ ឱ្យមកទទួលខុសត្រូវចំពោះមុខច្បាប់ប៉ុណ្ណោះ។
លោក Wray បានបញ្ជាក់នៅក្នុងសេចក្តីថ្លែងការណ៍មួយថា៖ «យើងនឹងបន្តស៊ើបអង្កេតឲ្យបានដិតដល់លើបុគ្គលម្នាក់ៗ ដែលមិនអើពើនឹងច្បាប់ ហើយញុះញង់ឱ្យមានអំពើហិង្សា ការបំផ្លិចបំផ្លាញទ្រព្យសម្បត្តិ និងការធ្វើឱ្យអ្នកដទៃរងរបួស»។
លោក Ken Kohl រដ្ឋអាជ្ញារងទីមួយនៃរដ្ឋធានីវ៉ាស៊ីនតោន បាននិយាយថា ក្រសួងយុត្តិធម៌បានចាត់ចែងរដ្ឋអាជ្ញានិងភ្នាក់ងាររាប់រយនាក់ឱ្យធ្វើការស៊ើបអង្កេតឲ្យបានសកម្មគ្រប់ពេលវេលា។
ដោយធ្វើការពីបញ្ជាការដ្ឋាន ៣ កន្លែង អ្នកស៊ើបអង្កេតនឹងពិនិត្យមើលវីដេអូពីកាមេរ៉ាសុវត្ថិភាព និងរូបភាពតាមបណ្តាញសង្គមនានាលើអ៊ីនធឺណិត ដើម្បីកំណត់អត្តសញ្ញាណនិងតាមរកកុបករទាំងនោះ។
លោក Kohl បានប្រាប់អ្នកកាសែតថា៖ «ក្រសួងយុត្តិធម៌នឹងប្រើប្រាស់ធនធានទាំងអស់នៅក្នុងកិច្ចប្រឹងប្រែងរបស់យើងដើម្បីធ្វើឱ្យជនទាំងនោះទទួលខុសត្រូវចំពោះមុខច្បាប់ ហើយនេះជាអ្វីដែលយើងនឹងបន្តធ្វើក្នុងពេលប៉ុន្មានម៉ោង ប៉ុន្មានថ្ងៃ និងប៉ុន្មានសប្ដាហ៍ខាងមុខ នៅពេលយើងបន្តការស៊ើបអង្កេតនេះ»។
កុបកម្មនិងការលួចប្លន់នេះបានកើតមានឡើងកាលពីរសៀលថ្ងៃពុធ នៅពេលក្រុមអ្នកគាំទ្រលោកប្រធានាធិបតី Donald Trump រាប់រយនាក់ ដែលខឹងសម្បាដោយសារការចាញ់របស់លោក Trump នៅក្នុងការបោះឆ្នោតប្រធានាធិបតីកាលពីថ្ងៃទី ៣ ខែវិច្ឆិកា បានសង្គ្រប់សម្រុកចូលក្នុងវិមានសភា នៅពេលដែលសភាទាំងពីរថ្នាក់កំពុងបើកសម័យប្រជុំរួម ដើម្បីប្រកាសជាផ្លូវការថា លោក Joe Biden ជាប្រធានាធិបតីថ្មីរបស់សហរដ្ឋអាមេរិក។
នៅក្នុងវីដេអូមួយដែលចេញផ្សាយកាលពីយប់ថ្ងៃព្រហស្បតិ៍ លោក Trump បានថ្កោលទាសអំពើហិង្សានោះ ហើយបានអំពាវនាវឱ្យមានការស្រុះស្រួលគ្នា។
ក៏ប៉ុន្តែ មុនពេលបង្ហោះវីដេអូនេះ ក្នុងពេលជាច្រើនសប្តាហ៍ លោក Trump បានអះអាងដោយគ្មានមូលដ្ឋានថា លោកបានឈ្នះការបោះឆ្នោតភ្លូកទឹកភ្លូកដីដោយជ័យជម្នះរបស់លោកត្រូវបានគេប្លន់យក។ ការអះអាងដោយគ្មានមូលដ្ឋានរបស់លោកនេះត្រូវបានក្រុមអ្នកគាំទ្រលោកជាច្រើនជឿថាជាការពិត។ នៅក្នុងការជួបជុំមួយជិតសេតវិមានកាលពីថ្ងៃពុធ លោក Trump បានជំរុញអ្នកគាំទ្ររបស់លោករាប់ពាន់នាក់ឱ្យដើរទៅកាន់វិមានសភាដើម្បីតវ៉ាប្រឆាំងនឹងលទ្ធផលនៃការបោះឆ្នោត។
អំពើហិង្សាដែលបានកើតឡើងនៅពេលបន្ទាប់មក ដែលបានបណ្តាលឱ្យមនុស្ស ៥ នាក់ស្លាប់ ដោយរួមមានទាំងប៉ូលិសវិមានសភាម្នាក់ផងដែរ បានធ្វើឲ្យដំណើរការប្រកាសជាផ្លូវការនូវជ័យជម្នះរបស់លោក Biden ត្រូវផ្អាកបណ្ដោះអាសន្ន។ សមាជិកសភាបានបើកសម័យប្រជុំឡើងវិញ នៅពេលយប់ថ្ងៃដដែលនោះ ដើម្បីប្រកាសជាផ្លូវការថា លោក Biden ជាប្រធានាធិបតីថ្មី ហើយអ្នកស្រី Kamala Harris ជាអនុប្រធានាធិបតីថ្មីរបស់សហរដ្ឋអាមេរិក។
មន្ត្រីពង្រឹងច្បាប់ម្នាក់បាននិយាយថា ពួកគេកំពុងស៊ើបអង្កេតលើស្ថានការណ៍ដែលនាំឱ្យមានការស្លាប់របស់មន្ត្រីប៉ូលិសម្នាក់នោះ ប៉ុន្តែមិនបាននិយាយថាតើពួកគេនឹងចាប់ផ្ដើមពាក្យបណ្ដឹងអំពីករណីឃាតកម្មឬក៏យ៉ាងណានោះទេ។
លោក Trump ត្រូវបានថ្កោលទោសខ្លាំងក្លាថាបានញុះញង់ឱ្យមានអំពើហិង្សាដោយសារលោកបានលើកទឹកចិត្តក្រុមអ្នកគាំទ្ររបស់លោកឱ្យដើរក្បួនតវ៉ាទៅកាន់វិមានសភា ហើយទាមទារឱ្យសមាជិកសភាប្រកាសថា លោកជាអ្នកឈ្នះការបោះឆ្នោតប្រធានាធិបតី។
នៅក្នុងរិះគន់ដ៏កម្រមួយ អតីតរដ្ឋមន្ត្រីក្រសួងយុត្តិធម៌លោក William Barr ដែលជាសម្ព័ន្ធមិត្តម្នាក់របស់លោក Trump នៅពេលលោកកំពុងធ្វើជារដ្ឋមន្ត្រីក្រសួងយុត្តិធម៌ បានបញ្ជាក់នៅក្នុងសេចក្ដីថ្លែងការណ៍មួយកាលពីថ្ងៃព្រហស្បតិ៍ថា ទង្វើរបស់លោកប្រធានាធិបតី Trump «គឺជាការក្បត់តំណែងរបស់លោក និងអ្នកគាំទ្ររបស់លោក»។
ឆ្លើយទៅនឹងសំណួរថាតើរដ្ឋអាជ្ញាសហព័ន្ធមានបានពិនិត្យលើតួនាទីរបស់លោក Trump នៅក្នុងការញុះញង់ឱ្យមានការលុកលុយដោយហិង្សាចូលក្នុងវិមានសភាដែរឬក៏យ៉ាងណានោះ លោក Michael Sherwin រដ្ឋអាជ្ញារងនៃរដ្ឋធានីវ៉ាស៊ីនតោន បានប្រាប់អ្នកកាសែតកាលពីថ្ងៃព្រហស្បតិ៍ថា «យើងកំពុងពិនិត្យមើលអ្នកពាក់ព័ន្ធទាំងអស់ និងអ្នកទាំងឡាយណាដែលមានតួនាទីនៅក្នុងរឿងនេះ ហើយប្រសិនបើមានភស្តុតាងគ្រប់គ្រាន់សម្រាប់បទឧក្រិដ្ឋណាមួយនោះ ជនទាំងនោះនឹងត្រូវចោទប្រកាន់»។
គេនៅមិនទាន់ដឹងពិតប្រាកដនៅឡើយទេ ថាតើនៅទីបំផុត មនុស្សប៉ុន្មាននាក់ប្រឈមនឹងការចោទប្រកាន់នោះ។ ការិយាល័យសន្តិសុខនៃវិមានសភាបានបញ្ជាក់ថា មនុស្សរាប់ពាន់នាក់ពាក់ព័ន្ធនឹងសកម្មភាពកុបកម្មនេះ ដោយក្នុងនោះមនុស្សរាប់រយនាក់បានសម្រុកចូលលុកលុយនៅក្នុងវិមានសភា។ ក៏ប៉ុន្តែ ទោះជាយ៉ាងណាក៏ដោយ ដោយសារកងសន្តិសុខវិមានសភាបានបើកសិទ្ធិឲ្យកុបករស្ទើរតែទាំងអស់ដើរហើរដោយសេរី នៅពេលឥឡូវនេះ ក្រុមអ្នកស៊ើបអង្កេតសហព័ន្ធប្រឈមនឹងកាតព្វកិច្ចតាមស្វែងរកជនទាំងនោះនៅទូទាំងប្រទេស។
លោក Kohl បាននិយាយថា ក្រុមអ្នកស៊ើបអង្កេតមិនទាន់បានកំណត់ថាតើមនុស្សប៉ុន្មាននាក់បានធ្វើដំណើរមករដ្ឋធានីវ៉ាស៊ីនតោនដើម្បីចូលរួមក្នុងការវាយប្រហារលើវិមានសភា និងអំពីថាតើហេតុការណ៍នេះអាចចាត់ទុកថាជាសកម្មភាពដែលមានការសម្របសម្រួលក្នុងកម្រិតប៉ុណ្ណានៅឡើយទេ។
លោក Kohl បញ្ជាក់ដូច្នេះថា៖ «យើងនឹងមិនអាចដឹងអំពីរឿងនេះបានទេ រហូតទាល់តែដល់ពេលដែលការស៊ើបអង្កេតនេះបានបញ្ចប់»៕
ប្រែសម្រួលដោយលោក ឈឹម សុមេធ
