ព្រះមហាក្សត Salman របស់ប្រទេសអារ៉ាប៊ីសាអូឌីតបានផ្លាស់ប្តូរគណៈរដ្ឋមន្រ្តី បន្ទាប់ពីមានកំហឹងជាអន្តរជាតិអំពីឃាតកម្មលើអ្នកសារព័ត៌មានជនជាតិអារ៉ាប៊ីសាអ៊ូឌីតឈ្មោះ Jamal Khashoggi ជិតបីខែមកហើយនោះ។
ប្រព័ន្ធផ្សព្វផ្សាយរដ្ឋបានរាយការណ៍ថា ព្រះមហាក្សត្របានតែងតាំងលោក រដ្ឋលេខាធិការ Ibrahim al-Assaf ជារដ្ឋមន្ត្រីការបរទេសជំនួសលោក Adel aj-Jubeir ដែលបានកាន់កាប់ តំណែងនេះ តាំងពីឆ្នាំ២០១៥មកម៉្លេះ។ លោក Adel aj-Jubeir ត្រូវបានបញ្ចុះតំណែងឲ្យធ្វើជារដ្ឋលេខាធិការក្រសួងការបរទេស។
ព្រះមហាក្សត្រក៏បានប្តូរតំណែងមេបញ្ជាការកងទ័ពជាតិគឺព្រះអង្គម្ចាស់ Miteb bin Abdullah ដោយដាក់ព្រះអង្គម្ចាស់ Abdullah bin Bandar bin Abdulaziz ជំនួស។លើសពីនេះទៀតព្រះមហាក្សត្របានរៀបចំក្រុមប្រឹក្សានយោបាយនិងសន្តិសុខរបស់ប្រទេសឡើងវិញ។
លោកឧត្តមសេនីយ៍ Kalid bin Qirar al-Harbi ត្រូវបានតែងតាំងមេបញ្ជាការ សន្តិសុខទូទៅ រីឯ លោក Musaed al-Aiban ត្រូវបានតែងតាំងជាទីប្រឹក្សាសន្តិសុខជាតិ។
ព្រះមហាក្សត្រនិងបុត្រារបស់ព្រះអង្គគឺព្រះអង្គម្ចាស់ Mohammed bin Salman ត្រូវបានគេរំពឹងថា នឹងប្រកាសការផ្លាស់ប្តូរនេះ បន្ទាប់ពីភ្នាក់ងារអារ៉ាប់បានសម្លាប់លោក Khashoggi នៅក្នុងស្ថានកុងស៊ុលរបស់ប្រទេសអារ៉ាប៊ីសាអូឌីតនៅទីក្រុងអ៊ីស្តង់ប៊ុល ប្រទេសតួកគី កាលពីខែតុលា៕
