រដ្ឋមន្ត្រីក្រសួងយុត្តិធម៌នៃប្រទេសអារ៉ាប៊ីសាអូឌីតបានបញ្ជាក់ថា ប្រទេសលោកបានឃាត់ខ្លួនមនុស្ស២០៨នាក់នៅក្នុងការស៊ើបអង្កេតទូលំទូលាយមួយអំពីការប្រព្រឹត្តអំពើពុករលួយ ហើយបានស្ទង់ប្រមាណថាប្រាក់ជាង១០០ពាន់លានដុល្លារបានត្រូវគៃបន្លំក្នុងរយៈពេលជាច្រើនឆ្នាំ។
នៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ លោក Saud al-Mojeb បាននិយាយថា មនុស្ស៧នាក់ដែលបានឃាត់ខ្លួនត្រូវបានដោះលែងហើយដោយគ្មានការចោទប្រកាន់អ្វីទេ ក៏ប៉ុន្តែមនុស្ស២០១នាក់ទៀតនៅតែជាប់ឃុំឃាំងនៅឡើយ។ រដ្ឋាភិបាលក៏បានបង្កកគណនេយ្យធនាគារប្រមាណ១៧០០ផងដែរ។
លោករដ្ឋមន្ត្រីការបរទេសស.រ.អា. Rex Tillerson បានមានប្រសាសន៍ថា លោកបាននិយាយជាមួយលោក Adel al-Jubeir រដ្ឋមន្ត្រីការបរទេសនៃប្រទេសអារ៉ាប៊ីសាអូឌីត កាលពីថ្ងៃអង្គារ។ លោករដ្ឋមន្ត្រីការបរទេសអាមេរិកាំងបាននិយាយថា៖ «តាមការយល់ឃើញរបស់ខ្ញុំថា អាជ្ញាធរអារ៉ាប៊ីសាអូឌីត ចាត់ទុកការឃាត់ខ្លួនជនទាំងនេះថា មិនមែនជាការឃុំឃាំងទេ ក៏ប៉ុន្តែពួកគេបង្ហាញដល់ពួកជនទាំងនេះនូវភ័ស្តុតាងអំពីអ្វីដែលអាជ្ញាធរយល់ថា ជាការប្រព្រឹត្តខុសឆ្គងដើម្បីឱ្យឃើញថា តើពួកជនទាំងនេះមានបំណងចង់ធ្វើឱ្យត្រឹមត្រូវឬទេ»។
ពួកអ្នករិះគន់រដ្ឋាភិបាលប្រទេសនេះនិយាយថា ការស៊ើបអង្កេតនេះមានគោលដៅបង្ក្រាបពួកមន្ត្រីជាន់ខ្ពស់ក្នុងរដ្ឋាភិបាល និងដើម្បីផាត់ចោលពួកគូប្រជែងនៅពេលដែលព្រះអង្គម្ចាស់រជ្ជទាយាទ Mohammad bin Salman ព្រះជន្ម៣២វស្សាដឹកនាំគណៈកម្មការប្រឆាំងនឹងអំពើពុករលួយដែលត្រូវបានបង្កើតកាលពីពេលថ្មីៗនេះ៕
