ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក ស ខេង៖ មន្ត្រី​គ្រប់​ជាន់​ថ្នាក់​ត្រូវ​បម្រើ​ប្រជា​ជន ​ទោះ​គ្មាន​បក្ស​ប្រឆាំង


រូបឯកសារ៖ លោក​ស​ ខេង រដ្ឋមន្រ្តី​នៃ​ក្រសួង​មហាផ្ទៃ​ ថ្លែង​ទៅមន្រ្តី​ប៉ូលិស​និង​អភិបាល​នានា​ក្នុង​ការ​ប្រជុំ​នៃ​របាយការណ៍​បូកសរុបចំនួន​​ជន​​​អន្តោប្រវេសន៍​នៅ​ថ្ងៃ​សុក្រ​ ទី​១៩ សីហា ឆ្នាំ​២០១៦ នៅ​រាជធានី ភ្នំពេញ។​(ឡេង ឡែន/VOA)

រដ្ឋមន្រ្តី​ក្រសួង​មហាផ្ទៃ លោក ស ខេង នៅ​ថ្ងៃ​ពុធ​នេះ ប្រាប់​មន្រ្តី​ក្រោម​ឱវាទ​ឲ្យបម្រើ​ប្រជា​ជន​ឲ្យ​បាន​ម៉ឹងម៉ាត់​ដោយ​ស្មើភាព និង​មិន​ត្រូវ​យក​តួនាទី​ស្វែងរក​ប្រយោជន៍​ខ្លួន​ឯង​ទេ បើ​ទោះបីមិនមាន​គណបក្ស​ប្រឆាំង។

ក្នុង​ពិធី​ប្រកាស​ចូល​កាន់​មុខ​តំណែង​អភិបាល អភិបាល​រង នៃ​គណៈ​អភិបាល​ខេត្ត​កណ្ដាល នា​ព្រឹក​ថ្ងៃ​ទី៤ ខែមីនា នេះ លោក ស ខេង ថ្លែង​ថា ឆ្នាំ​២០២០​ ជា​ឆ្នាំ​ដែល​ត្រូវ​អនុវត្ត​ច្បាប់​យ៉ាង​តឹងរ៉ឹង ចំពោះ​ប្រជាពលរដ្ឋ​គ្រប់​គ្នា​ទាំង​អស់​ដោយ​ស្មើភាព។ លោក​បន្ត​ថា​ មន្រ្តី​ទាំងអស់ត្រូវ​មាន​ឧត្តមគតិ​បម្រើ​ពលរដ្ឋ​និង​ជាតិ មិន​ត្រូវ​យក​តួនាទី​ខ្ពស់​ដើម្បី​ស្វែង​រក​ប្រយោជន៍​ខ្លួន​ឯង​នោះ​ទេ​។

​លោក ស ខេង ថ្លែង​ថា៖«ត្រូវ​រៀប​ចំ​ខ្លួន​របៀប​ម៉េច​ដើម្បីក្លាយ​ជា​មន្រ្តី​ដែល​មាន​ឧត្តម​គតិ។ ឧត្តម​គតិ​អី? ឧត្តម​គតិ​ជាតិ ​ប្រជា​ពលរដ្ឋ។​ ធំ​ណាស់​អាហ្នឹង ធំ​ណាស់។ ហើយ​មិន​ត្រូវ​រៀបចំ​ទុក​ដាក់​ខ្លួន​យើង​ទៅជា​មន្រ្តី​ឱកាស​និយម​ទេ? យ៉ាងម៉េច​មន្រ្តី​ឱកាស​និយម​? មន្រ្តី​ឱកាស​និយម គាត់​ស្រែក​អញ្ចឹង​ដែរ​ ជាតិ ប្រជាជន។ ប៉ុន្តែ​ទី​បំផុត​ឲ្យ​តែ​បាន​តំណែង​ គាត់​លេង​មួយ​សេរី​ ផល​ប្រយោជន៍។ ឲ្យ​ធ្វើ​តំណែង​ប្រធាន​នេះ ប្រធាន​នោះ គាត់​អត់​គិត​អាហ្នឹង​ប៉ុន្មានទេ គាត់​គិត​តែ​ដើរ​រក​ស៊ី»។

លោក ស ខេង បន្ថែម​ថា ទស្សនៈ​ដែល​ថា​ មិន​មាន​គណបក្ស​ប្រឆាំង​ហើយ​មន្រ្តី​ទាំង​អស់​អាច​ជិះ​សេះ​លែង​ដៃ ជា​ទស្សនៈ​ដែល​មិន​ត្រឹមត្រូវ។

គណបក្ស​សង្គ្រោះជាតិ ដែល​ជា​គណបក្សប្រឆាំង​ មាន​ប្រជា​ពលរដ្ឋ​គាំទ្រ​ជាង​៤០​ភាគរយ​នៅ​ទូទាំង​ប្រទេស ត្រូវ​បាន​តុលាការ​កំពូល​រំលាយ កាល​ពីខែ​វិច្ឆិកា ឆ្នាំ​២០១៧។ ក្រោយ​ការ​រំលាយ ​តុលាការ​កំពូល​ក៏​បាន​ព្យួរ​សិទ្ធិ​មន្រ្តី​គណបក្ស​ប្រឆាំង​ចំនួន​១១៨​នាក់ មិន​ឲ្យ​ធ្វើ​នយោបាយ​ម្នាក់ៗ​រយៈពេល​៥​ឆ្នាំ។

នៅ​មុន​ការ​រំលាយ គណបក្ស​សង្គ្រោះ​ជាតិ​ដែល​ដឹក​នាំ​ដោយ​លោក ​កឹម សុខា ​និង​លោក​ សម រង្ស៊ី តែង​មាន​សារ​នយោបាយ និង​គោល​នយោបាយ​សម្រាប់​ប្រកួត​ប្រជែង​ជាមួយ​គណបក្ស​ប្រជាជន​កម្ពុជា​ ដែល​ជា​គណបក្ស​កាន់​អំណាច​។

លោក​ មាស ​នី ​អ្នក​សិក្សា​ពី​ការ​វិវត្ត​សង្គម និង​ជា​អ្នក​វិភាគ​នយោបាយ​ឯករាជ្យ មាន​ប្រសាសន៍​ថា ការ​ដឹកនាំ​ប្រទេស​ដោយ​មិន​មាន​ការ​ប្រកួត​ប្រជែង​ពី​គណបក្ស​ប្រឆាំង នៅ​តែ​មិន​អាច​ជំរុញ​ឲ្យ​មន្រ្តី​រដ្ឋាភិបាល​អនុវត្ត​ការ​ផ្តល់​សេវា​បាន​ល្អ​ប្រសើរ​ដូច​មាន​គណបក្ស​ប្រឆាំង​នោះ​ទេ។ លោក​បន្ត​ថា គណបក្ស​ប្រឆាំង​ជា​ក្រុម​ដែល​ធ្វើ​ឲ្យ​គណបក្ស​កាន់​អំណាច​ប្រុង​ប្រយ័ត្ន និង​បង្កើន​ការ​យក​ចិត្ត​ទុក​ដាក់​លើ​ប្រជាពលរដ្ឋ​ ដើម្បី​ប្រកួត​ប្រជែងប្រជាប្រិយភាព។ ​

លោក មាស នី និយាយ​ថា៖«ខ្ញុំ​គិត​ថា ដរាប​ណា​ប្រព័ន្ធ​នយោបាយ​នៅ​តែ​គ្រប​ដណ្តប់​នៅ​លើប្រព័ន្ធ​គ្រប់​គ្រង​របស់រដ្ឋ​តាំង​ពី​លើ​ដល់​ក្រោម​បែប​នេះ ​ខ្ញុំ​គិត​ថា​បើ​គ្រាន់​តែ​និយាយ​ដូចជាមិន​អាច​នឹង​ទៅ​រួច​ទេ។ ហើយ​ខ្ញុំ​ក៏​ធ្លាប់​ឮ​ដែរ​គឺ​ថា ​បើ​មិន​មាន​ការ​ចែក​ឲ្យ​ដាច់​រវាង​អ្នក​បច្ចេកទេស និងអ្នកនយោបាយ​ទេ ប្រព័ន្ធ​រដ្ឋ​នឹង​ពិបាក​ក្នុង​ការ​ដំណើរ​ការ»។

នៅ​មុន​ការ​បោះឆ្នោត​ក្រុម​ប្រឹក្សា​ឃុំ-សង្កាត់​ឆ្នាំ​២០១៧​ ​គណបក្ស​សង្គ្រោះ​ជាតិ​ដែល​ដឹក​នាំ​ដោយ​លោក ​កឹម សុខា ​និង​លោក​ សម រង្ស៊ី ​បាន​ប្រើ​សារ​នយោបាយ ​«ដូរ​មេឃុំ​បម្រើ​បក្ស​ដាក់​មេឃុំ​បម្រើ​រាស្ដ្រ»។ ​ខណៈ​ដែល​សារ​នយោបាយ​នោះ​ត្រូវ​បាន​អ្នក​គាំទ្រ​គណបក្ស​ប្រឆាំង​ចែក​ចាយ​តៗ​គ្នា ​គណបក្ស​កាន់​អំណាច​របស់​លោក​នាយក​រដ្ឋមន្រ្តី​ ហ៊ុន សែន​ប្តឹង​ទៅ​តុលាការ​ ដោយ​ចោទថា​ វា​ជា​សារ​ញុះ​ញង់ និង​ប្រមាថ​ដល់​មេឃុំ​ និង​ចៅ​សង្កាត់ ​ដែល​កំពុង​បំពេញ​ការងារ​នា​ពេល​នោះ។​

នៅ​មុន​ការ​បោះ​ឆ្នោត​ឃុំ-សង្កាត់​ឆ្នាំ​២០១៧​នោះ​ដែរ​ លោក ​កឹម សុខា ​ដែល​ជា​ប្រធាន​គណបក្ស​សង្គ្រោះ​ជាតិ​ ក៏​បាន​ឃោសនា​ថា ​នឹង​ផ្តល់​ថវិកា​ប្រមាណ​ពី​៥០​ម៉ឺន​ដុល្លារ​រហូត​ដល់​១​លាន​ដុល្លារ សម្រាប់​អភិវឌ្ឍន៍​ក្នុង​មួយឃុំ-សង្កាត់ នៅ​ពេល​គណ​បក្ស​របស់​លោក​ជាប់​ឆ្នោត៕

អត្ថបទ​ទាក់ទង

តួលេខនៃករណីឆ្លងជំងឺកូវីដ១៩

XS
SM
MD
LG