កូរ៉េខាងត្បូងបានប្រាប់ឲ្យដឹងថា ខ្លួននឹងបើកប្រាក់ក្នុងគ្រាអាសន្នដល់ពលរដ្ឋជាច្រើនរបស់ខ្លួនជាផ្នែកមួយនៃការខំប្រឹងប្រែងដើម្បីធ្វើឲ្យប្រសើរឡើងនូវសេដ្ឋកិច្ចរបស់ខ្លួននៅក្នុងការប្រឈមនៃការរាលដាលជាសាកលនៃមេរោគកូរ៉ូណា។
លោកប្រធានាធិបតី មួន ជាអ៊ីន បានប្រកាសកាលពីថ្ងៃចន្ទម្សិលមិញក្នុងជំនួបជាមួយក្រុមការងារពិសេសថា រដ្ឋាភិបាល នឹងបើកប្រាក់ប្រហែល៨២០ដុល្លារសហរដ្ឋអាមេរិកទៅឲ្យមួយគ្រួសារ លើកលែងតែអ្នកដែលមានប្រាក់ចំណូលខ្ពស់បំផុតចំនួន៣០ភាគរយ។ ប្រាក់ដែលបើកឲ្យក្រុមគ្រួសារទាំងនោះ មានចំនួនទាំងអស់៧ពាន់៤រយលានដុល្លារ។
លោកប្រធានាធិបតីមួន បាននិយាយទៀតថា ប្រាក់ទាំងនោះ ជាសំណងដល់ពលរដ្ឋកូរ៉េខាងត្បូងដែលបានអត់ធន់ចំពោះវិធានការរយៈពេលប៉ុន្មានថ្ងៃ និងសប្តាហ៍ដើម្បីទប់ស្កាត់មេរោគកូវីដ១៩ រួមមានការដាក់មនុស្សឲ្យនៅដាច់ដោយឡែក និងដាច់ពីគ្នា។
កូរ៉េខាងត្បូង មានករណីឆ្លងមេរោគកូរ៉ូណាចំនួន៦ពាន់៦រយ៦១ករណីរហូតមកទល់ថ្ងៃចន្ទម្សិលមិញ ដោយមានមនុស្សស្លាប់១៥៩នាក់ ហើយនឹងមនុស្ស៥ពាន់២រយ២៨នាក់ បានជាសះស្បើយ។ កូរ៉េខាងត្បូង បានទទួលការសរសើរពីសាកលលោកចំពោះ ការធ្វើតេស្តជាប្រចាំដល់មនុស្សរាប់រយនាក់ក្នុងមួយថ្ងៃៗដែលបានជួយពន្យឺតការរាតត្បាតនៃមេរោគនេះ។
ក៏ប៉ុន្តែ ប្រទេសនេះ បានឃើញករណីមេរោគកូវីដ១៩ដែលបាននាំចូលមកពីខាងក្រៅកើនឡើងដែលបាននាំឲ្យរដ្ឋាភិបាលប្រកាសកាលពីថ្ងៃអាទិត្យសប្តាហ៍មុនថា ខ្លួននឹងតម្រូវឲ្យមានការដាក់ឲ្យនៅដាច់ពីគេចំនួន១៤ថ្ងៃដល់ជនបរទេសទាំងអស់ដែលបានមកដល់កូរ៉េខាងត្បូង ដែលចូលជាធរមាននៅថ្ងៃទី១ ខែមេសាស្អែកនេះ៕
