ប្រធានាធិបតីរុស្ស៊ីលោក Vladimir Putin បានឈ្នះការបោះឆ្នោតប្រធានាធិបតីដែលបានធ្វើឡើងកាលពីថ្ងៃអាទិត្យម្សិលមិញ ដូចការរំពឹងទុក។ ដោយសន្លឹកឆ្នោតស្ទើរតែទាំងអស់ដែលមកពីគ្រប់មណ្ឌលបោះឆ្នោតទាំងអស់ត្រូវបានរាប់រួចរាល់ លោក Putin គ្រោងនឹងចាប់ផ្ដើមអាណត្តិថ្មីរយៈពេល ៦ ឆ្នាំ បន្ថែមទៀតរបស់លោកក្នុងនាមជាប្រធានាធិបតីរុស្ស៊ី។ លោក Putin ទទួលបានសំឡេងឆ្នោតជាង ៧៦ ភាគរយ។
លោក Putin បានថ្លែងទៅកាន់អ្នកគាំទ្ររបស់លោករាប់ពាន់នាក់នៅទីលាន Manezhnaya ជិតវិមានប្រធានាធិបតីកាលពីយប់ថ្ងៃអាទិត្យម្សិលមិញ ដោយហៅអ្នកដែលបោះឆ្នោតឲ្យលោកថាជា «ក្រុមជាតិដ៏ធំ» មួយ។
លោក Putin ប្រឈមនឹងគូប្រជែង ៧ នាក់ តាំងពីអ្នកប្រជានិយមស្ដាំនិយមជ្រុល រហូតដល់អ្នកកុម្មុយនិស្តឆ្វេងនិយមជ្រុល ប៉ុន្តែអ្នកទាំងនោះមិនមែនជាការគំរាមកំហែងណាមួយដល់លោកនោះទេ។
គូប្រជែងដ៏ខ្លាំងបំផុតរបស់លោក Putin គឺមេដឹកនាំគណបក្សប្រឆាំងលោក Alexei Navalny។ លោក Navalny មិនមានសិទ្ធិឈរឈ្មោះបោះឆ្នោត បន្ទាប់ពីលោកត្រូវបានតុលាការកាត់ទោសពីបទបន្លំលួចប្រាក់កាលពីខែធ្នូឆ្នាំមុន។
លោក Navalny បានដឹកនាំការធ្វើពហិការមិនចូលរួមនៅក្នុងការបោះឆ្នោតនេះ។ ចំណែកឯអ្នករៀបចំការបោះឆ្នោតវិញបានរំពឹងថា នឹងមានអ្នកចេញមកបោះឆ្នោតបានច្រើនដើម្បីឲ្យការបោះឆ្នោតមួយដែលគេអាចទាយលទ្ធផលទុករួចទៅហើយនេះ មានលក្ខណៈត្រឹមត្រូវតាមច្បាប់។
លោក Putin បានកាន់អំណាចក្នុងនាមជាប្រធានាធិបតី ឬក៏ក្នុងនាមជានាយករដ្ឋមន្ត្រីតាំងពីឆ្នាំ ១៩៩៩ មកម្ល៉េះ៕
