សារព័ត៌មានពាណិជ្ជកម្មផ្សាយជាភាសារុស្ស៊ីដ៏គួរឲ្យទុកចិត្តមួយ បានរាយការណ៍ថា នៅចន្លោះពាក់កណ្ដាលខែមករា និងពាក់កណ្ដាលខែកុម្ភៈ ប្រជាប្រិយភាពរបស់ប្រធានាធិបតីរុស្ស៊ីលោក Vladimir Putin បានធ្លាក់ចុះ ១២ ភាគរយនៅតាមបណ្ដាទីក្រុងមួយចំនួនដែលមានប្រជាជនជាង ១ លាននាក់រស់នៅ។
សារព័ត៌មាន Vedomosti ដែលមានមូលដ្ឋាននៅក្នុងទីក្រុងមូស្គូ និងដែលជាសារព័ត៌មានមួយដែលធ្លាប់ជាសាជីវកម្មរួមគ្នារវាងសារព័ត៌មាន Dow Jones សារព័ត៌មាន the Financial Times និងក្រុមហ៊ុនបោះពុម្ពសារព័ត៌មាន The Moscow Times បានរាយការណ៍ដូច្នេះ ផ្អែកលើលទ្ធផលនៃការស្ទង់មតិមួយដែលបានធ្វើឡើងដោយមជ្ឈមណ្ឌលសម្រាប់ការសិក្សាមតិសាធារណៈ ដែលហៅកាត់ថា VTsIOM។ មជ្ឈមណ្ឌល VtsIOM នេះ គឺជាមជ្ឈមណ្ឌលដែលគ្រប់គ្រងដោយរដ្ឋ។
បើយោងតាមមជ្ឈមណ្ឌល VtsIOM ប្រជាប្រិយភាពរបស់លោក Putin បានធ្លាក់ចុះពីជិត ៧០ ភាគរយមកនៅជាង ៥៧ ភាគរយបន្តិចតែប៉ុណ្ណោះនៅតាមបណ្ដាទីក្រុងធំៗ និងទីក្រុងមួយចំនួនដែលតំបន់ទាំងនោះមានប្រជាជនសរុបស្មើនឹងប្រមាណ ២៥ ភាគរយនៃអ្នកដែលមានសិទ្ធិបោះឆ្នោត។
លោក Valery Fyodorov ប្រធានមជ្ឈមណ្ឌល VtsIOM បានបដិសេធភ្លាមៗចំពោះភាពដែលអាចជឿជាក់បាននៃលទ្ធផលរបស់ការស្ទង់មតិនេះ ដែលស្ថាប័នរបស់លោកបានផ្សព្វផ្សាយកាលពីចុងខែកុម្ភៈកន្លងទៅនេះ ដែលលទ្ធផលនោះបានបង្ហាញពីការធ្លាក់ចុះប្រជាប្រិយភាពរបស់លោកPutin។
លោក Fyodorov បានបញ្ជាក់ថា ការស្ទង់មតិបន្ថែមរបស់មជ្ឈមណ្ឌល VtsIOM ដែលបានធ្វើឡើងពីថ្ងៃទី ២ ដល់ថ្ងៃទី ៤ ខែមីនា បានបង្ហាញថា ការធ្លាក់ចុះប្រជាប្រិយភាពរបស់លោក Putin ចំនួន ១២ ភាគរយនេះ គឺគ្រាន់តែជា «ការធ្លាក់ចុះមិនសូវសំខាន់ និងបណ្ដោះអាសន្នតែប៉ុណ្ណោះ»។
លោកបានបន្តថា៖ «កាលពីថ្ងៃទី ១០ ខែមករាកន្លងទៅនេះ ប្រជាប្រិយភាពរបស់លោក Putinបានកើនឡើងដល់ជិត ៧០ ភាគរយ ប៉ុន្តែកាលពីថ្ងៃទី១៨ ខែកុម្ភៈ វាបានធ្លាក់ចុះមកនៅត្រឹម ៥៧,១ ភាគរយវិញ។ កាលពីខែមិនាកន្លងទៅនេះ ប្រជាប្រិយភាពរបស់លោក Putinក្នុងរដ្ឋធានីមូស្គូ និងក្នុងទីក្រុង St. Petersburg មានចំនួន ៦៣ ភាគរយ»។
មួយវិញទៀត សារព័ត៌មាន Meduza ដែលជាសារព័ត៌មានសរសេរជាភាសារុស្សីនៅប្រទេសឡេតូនីបានរាយការណ៍ថា «ការស្ទង់មតិបានបង្ហាញពីនិន្នាការដដែល» នៃការធ្លាក់ចុះប្រជាប្រិយភាពរបស់លោក Putin ចំនួន ១២ ភាគរយ «នៅតាមបណ្ដាទីក្រុងមួយចំនួនដែលមានប្រជាជនចាប់ពី ១ សែន ទៅ ៥ សែននាក់»។
សារព័ត៌មាន Meduza បានបញ្ជាក់ថា៖ «អត្រាគាំទ្របេក្ខភាពរបស់លោក Putin នៅតែថេរដដែលនៅតាមបណ្ដាទីក្រុងណាដែលមានប្រជាជនចន្លោះពី ៥ សែន ដល់ ៩ សែន ៥ ម៉ឺននាក់ និងនៅតាមបណ្ដាទីប្រជុំជន និងភូមិតូចៗតែប៉ុណ្ណោះ»។
សារព័ត៌មាន Meduza បានបន្ថែមទៀតថា មជ្ឈមណ្ឌល VtsIOM ក៏បានរកឃើញពីការកើនឡើងនៃចំនួនអ្នកបោះឆ្នោតដែលនៅស្ទាក់ស្ទើរមិនទាន់សម្រេចចិត្ត និងចំនួនប្រជាពលរដ្ឋដែលគាំទ្របេក្ខភាពលោក Pavel Grudinin បេក្ខជនមកពីគណបក្សកុម្មុយនិស្ត នៅតាមបណ្ដាទីក្រុងធំៗផងដែរ។
លោក Nikolai Petrovអ្នកវិទ្យាសាស្ត្រនយោបាយនៃសាកលវិទ្យាល័យ Moscow's National Research University Higher School of Economics (NRUHSE) បាននិយាយកាលពីមុនពេលបោះឆ្នោតប្រធានាធិបតីរុស្ស៊ីថា ទោះបីជាចំនួនអ្នកចេញមកបោះឆ្នោតដែលមានចំនួនមិនស្មើគ្នានៅតាមបណ្ដាទីក្រុង និងតំបន់ជនបទនានាប្រហែលជាមិនអាចប៉ះពាល់ដល់លទ្ធផលនៃការបោះឆ្នោតក៏ដោយ ក៏ភាពមិនប្រក្រតីធ្ងន់ធ្ងរនានាអាចផ្ដល់ផលអាក្រក់ដល់កេរ្តិ៍ដំណែលនយោបាយរបស់លោក Putin។
លោក Nikolai Petrov បានប្រាប់ VOA ភាសារុស្សីថា៖ «ក្នុងស្ថានការណ៍បែបនេះ រដ្ឋាភិបាលរុស្ស៊ី កំពុងស្ថិតក្នុងស្ថានភាពដ៏លំបាកមួយ។ ពីព្រោះអ្វីដែលលោកPutinចង់បានចុងក្រោយនោះគឺចង់ឲ្យមានគំលាតខុសគ្នាខ្លាំងនៃសំឡេងឆ្នោត ឬក៏ចំនួនអ្នកចេញមកបោះឆ្នោតទាបខ្លាំងបំផុតនៅក្នុងរដ្ឋធានីមូស្គូ ឬក្នុងទីក្រុង St. Petersburgដែលជាកន្លែងដែលលោកពិបាករកសំឡេងគាំទ្រឲ្យបានច្រើន»។
លោក Nikolai Petrov បានបន្ថែមថា៖ «លោក Putin មិនត្រឹមតែកំពុងប្រជែងជាមួយនឹងបេក្ខជនប្រធានាធិបតីផ្សេងទៀតនោះទេ ប៉ុន្តែថែមទាំងកំពុងប្រជែងជាមួយនឹងខ្លួនលោកផ្ទាល់ផងដែរ»។
លោក Nikolai Petrov បានពន្យល់ថា ការប្រឹងប្រែងឈរឈ្មោះបោះឆ្នោតឡើងកាលពីលើកចុងក្រោយរបស់លោក Putin បានប្រឈមនឹងការតវ៉ាតាមដងផ្លូវដ៏ធំជាច្រើននៅតាមទីក្រុងធំៗ។ លោកបានបន្តថា៖ «នៅក្នុងស្ថានការណ៍នេះ លោក Putin ត្រូវតែធ្វើយ៉ាងណាយកឈ្នះខ្លួនលោកឲ្យបាន ដើម្បីធានាឲ្យមានភាពស្របច្បាប់ផ្នែកនយោបាយ និងប្រជាប្រិយភាពរបស់លោករយៈពេលវែង»។
លោក Alexander Kynev អ្នកវិទ្យាសាស្ត្រសង្គមនៃសាកលវិទ្យាល័យ NRUHSE បានបញ្ជាក់ថា លោក Putin និងក្រុមរបស់លោក បានព្យាយាមធានាយ៉ាងណាឲ្យលោកបានឈ្នះឆ្នោតធ្វើជាប្រធានាធិបតីបន្តទៀត បើទោះបីជាការស្ទង់មតិបានបង្ហាញថា ប្រជាប្រិយភាពរបស់លោកមានការធ្លាក់ចុះក៏ដោយ។
លោក Alexander Kynev បានបន្ថែមថា ប្រសិនបើភាគរយនៃការគាំទ្រលោក Putin មានអត្រាខ្ពស់ខ្លាំង នោះវានឹងផ្តល់ហានិភ័យលើការគាំទ្រចំពោះរូបលោកទៅវិញទេ ដោយសារតែអ្នកគាំទ្ររូបលោកអាចគិតថា មិនចាំបាច់រវល់ចេញទៅបោះឆ្នោតនោះ។
ការចង់បានរបស់រដ្ឋាភិបាលរុស្ស៊ីឲ្យមានអ្នកចេញមកបោះឆ្នោតច្រើន ដើម្បីបំពេញភាពស្របច្បាប់សម្រាប់ការជ្រើសរើសលោក Putin ឲ្យជាប់ឆ្នោតជាប្រធានាធិបតីបន្តទៀត ត្រូវបានផ្សព្វផ្សាយយ៉ាងទូលំទូលាយតាមប្រព័ន្ធផ្សព្វផ្សាយអន្តរជាតិនានាមុនពេលការបោះឆ្នោតចូលមកដល់កាលពីថ្ងៃទី ១៨ ខែមីនាកន្លងទៅនេះ៕
ប្រែសម្រួលដោយ កោះ សុគន្ធី
