អាជ្ញាធរវិមានក្រឹមឡាំង គឺជាអ្នកគាំទ្រដ៏ខ្លាំងមួយក្នុងបណ្តាក្រុមអ្នកគាំទ្រប្រធានាធិបតីស៊ីរី Bashar al-Assad ក៏ប៉ុន្តែស្ត្រីជាអ្នកនាំពាក្យប្រទេសរុស្ស៊ីម្នាក់បាននិយាយថា គោលនយោបាយរបស់រដ្ឋាភិបាលក្រុងម៉ូស្គូ ជាគោលការណ៍ គឺមិនមែនអាស្រ័យលើលោក Assad ដែលកំពុងស្ថិតនៅក្នុងអំណាចតទៅទៀតទេ។
អ្នកស្រី Maria Zakharova អ្នកនាំពាក្យនៃក្រសួងការបរទេសរុស្ស៊ីបាននិយាយប្រាប់វិទ្យុ Ehko Moskvy កាលពីថ្ងៃអង្គារថា «យើងមិនដែលនិយាយថា ការដែលលោក Assad ស្ថិតនៅក្នុងអំណាចជាទិដ្ឋភាពប្រកបដោយគោលការណ៍មួយ» របស់គោលនយោបាយរុស្ស៊ីអំពីប្រទេសស៊ីរីទេ។
ក៏ប៉ុន្តែទោះជាយ៉ាងណាក៏ដោយ អ្នកស្រីបាននិយាយបង្ហាញហេតុផលយ៉ាងខ្លាំងប្រឆាំងនឹងគំនិតអំពីការប្តូររបបគ្រប់គ្រង។ ក្រុមប្រឆាំងដែលបានប្រយុទ្ធប្រឆាំងនឹងរដ្ឋាភិបាលលោក Assad អស់ជាងបីឆ្នាំមកហើយនោះ បានទាមទារឱ្យមានការប្តូររបបគ្រប់គ្រង ដែលអ្នកស្រី Zakharova បាននិយាយថា មិនមែនជាចម្លើយដល់វិបត្តិនៅក្នុងប្រទេសស៊ីរីទេ។
អ្នកស្រី Zakharova បាននិយាយថា ការប្តូររបបគ្រប់គ្រងនៅក្នុងប្រទេសស៊ីរីនៅពេលនេះអាចក្លាយទៅជា «មហន្តរាយក្នុងតំបន់» មួយ ដោយធ្វើឱ្យផលប៉ះពាល់ដោយសារសង្គ្រាមស៊ីវិលនេះមានភាពធ្ងន់ធ្ងរថែមទៀត។
ចាប់តាំងពីឆ្នាំ២០១១មក សង្គ្រាមស៊ីវិលនេះបានបណ្តាលឱ្យមនុស្សជាង២សែននាក់ស្លាប់ ហើយមានមនុស្សរាប់លាននាក់ទៀតបានខ្ចាត់ព្រាត់ពីផ្ទះសំបែងដោយបានក្លាយទៅជាជនភៀសខ្លួន។
ទីភ្នាក់ងារសារព័ត៌មាន Tass បានផ្សាយថាស្ត្រីអ្នកនាំពាក្យរូបនេះនៃក្រសួងការបរទេសរុស្ស៊ីបានព្រមានថាប្រទេសស៊ីរីអាចក្លាយទៅជា«មហន្តរាយសាកលមួយ៕»
