ប្រធានាធិបតីលោកបាសា អាល់អាសាដ (Bashar Al-Assad) នៃប្រទេសស៊ីរីបាននិយាយឡើងវិញពីការផ្តោតយកចិត្តទុកដាក់របស់លោក ក្នុងការបំបាត់ការគំរាមកំហែងរបស់ភេរវជននៅក្នុងប្រទេសរបស់លោក ដោយនិយាយនៅថ្ងៃអាទិត្យនេះថា វិធានការនេះ នឹងនាំឲ្យមានដំណោះស្រាយខាងនយោបាយ ដែលស៊ីរីស្វះស្វែងរកដើម្បីបំបាត់សង្គ្រាម ដែលមានរយៈពេល៤ឆ្នាំ ៦ខែមកនេះ។
លោកប្រធានាធិបតី អាសាដ បានជួបជាមួយក្រុមសមាជិកសភារុស្ស៊ី និងមន្រ្តីផ្សេងៗទៀតនៅក្នុងរដ្ឋធានីដាម៉ាស ហើយទីភ្នាក់ងារព័ត៌មាន SANA ដែលរៀបចំចាត់ចែងដោយរដ្ឋបានប្រាប់ឲ្យដឹងថា លោកប្រធានាធិបតីអាសាដបានបញ្ជាក់ថា ការកំចាត់ពួកភេរវជននឹងការពារបូរណភាព និងអធិបតេយ្យភាពស៊ីរី។
លោក Alexander Yushchenko សមាជិកនៃគណៈប្រតិភូរបស់រុស្ស៊ី បានបញ្ជូនសារមួយ ដែលក្នុងនោះលោកប្រធានាធិបតីអាសាដបាននិយាយថា លោក បានប្រុងប្រៀបខ្លួនដើម្បីចូលរួមនៅក្នុងការបោះឆ្នោតប្រធានាធិបតីថ្មី និងចូលរួមការបោះឆ្នោតសភា ប្រសិនបើនេះជាអ្វីដែលប្រជាពលរដ្ឋស៊ីរីចង់បាន។
លោកអាសាដកំពុងកាន់តំណែងជាប្រធានាធិបតីអាណត្តិទី៣ បន្ទាប់ពីលោកបានជាប់ឆ្នោតដើម្បីកាន់តំណែងរយៈពេល៧ឆ្នាំកាលពីឆ្នាំទៅ។ ការបោះឆ្នោតនេះបានធ្វើឡើងនៅក្នុងតំបន់នានា ដែលត្រួតត្រាដោយរដ្ឋាភិបាល ហើយត្រូវបានធ្វើពហិការមិនចូលរួមបោះឆ្នោតដោយពួកប្រឆាំង។ លោកអាសាដបានទទួលសន្លឹកឆ្នោត៨៩ភាគរយ។
ចាប់តាំងពីពេលនោះមក ពួកជនសកម្មប្រយុទ្ធរដ្ឋឥស្លាមបានកាន់កាប់តំបន់ដ៏ធំក្នុងផ្នែកខាងកើតនៃប្រទេសស៊ីរី រួមមានរដ្ឋធានី Raqqaរបស់ក្រុមនោះផង។ ពលរដ្ឋប្រហែល៣០ភាគរយនៃពលរដ្ឋជាង២៤០.០០០នាក់ ត្រូវបានសម្លាប់នៅក្នុងជម្លោះនៃប្រទេសស៊ីរីចាប់តាំងពីការបោះឆ្នោតនោះមក ខណៈដែលអង្គការសហប្រជាជាតិ បានចុះឈ្មោះជនភៀសខ្លួន១,៣លាននាក់ទៀត ដែលបានរត់គេចចេញពីប្រទេស។មនុស្សជាង ៤លាននាក់បានរត់គេចចេញពីប្រទេសចាប់តាំងពីសង្គ្រាមស៊ីវិលបានចាប់ផ្តើម៕
