មន្ត្រីរុស្ស៊ីបាននិយាយនៅថ្ងៃពុធនេះថា ការវាយប្រហារដោយមីស៊ីលរបស់អ៊ុយក្រែនបានប៉ះចំកន្លែងផលិតនិងជួសជុលនាវាមួយកន្លែងនៅក្នុងតំបន់ Crimea។
លោក Mikhail Razvozhayev ដែលជាអភិបាលតែងតាំងដោយរុស្ស៊ីនៃទីក្រុងកំពង់ផែ Sevastopol បានបង្ហោះរូបភាពមួយនៅលើ Telegram ដោយបង្ហាញឱ្យឃើញភ្លើងឆេះនិងផ្សែងនៅកន្លែងផលិតនិងជួសជុលនាវានោះ និងបាននិយាយថា មនុស្ស ២៤ នាក់បានរងរបួសនៅក្នុងការវាយប្រហារនោះ។
ក្រសួងការពារជាតិរុស្ស៊ីបានបញ្ជាក់ថា អ៊ុយក្រែនបានវាយប្រហារសំដៅកន្លែងផលិតនិងជួសជុលនាវានោះដោយប្រើមីស៊ីលស្វ័យនាំផ្លូវចំនួន ១០ គ្រាប់និងនាវាគ្មានមនុស្សបើកចំនួន ៣ គ្រឿង និងថាប្រព័ន្ធការពារដែនអាកាសរបស់រុស្ស៊ីបានបំផ្លាញមីស៊ីល ៧ គ្រាប់ក្នុងចំណោមនោះនិងនាវាគ្មានមនុស្សបើកទាំង ៣ គ្រឿង។
ក្រសួងការពារជាតិរុស្ស៊ីក៏បានលើកឡើងផងដែរថា ការវាយប្រហារនោះបានធ្វើឱ្យខូចខាតនាវាពីរគ្រឿងដែលកំពុងជួសជុល។
នៅក្នុងតំបន់ Odesa ប្រទេសអ៊ុយក្រែន មន្ត្រីបាននិយាយថា ការវាយប្រហារដោយដ្រូនរបស់រុស្ស៊ីនៅព្រឹកថ្ងៃពុធនេះបានបំផ្លាញកំពង់ផែនិងហេដ្ឋារចនាសម្ព័ន្ធស៊ីវិលនៅក្នុងទីក្រុង Izmail។
លោក Oleh Kiper អភិបាលតំបន់ Odesa បានបញ្ជាក់តាម Telegram ថា មនុស្ស ៦ នាក់បានរងរបួសនៅក្នុងការវាយប្រហារនោះ។
ទីក្រុង Izmail បានក្លាយជាគោលដៅវាយប្រហារជាញឹកញាប់របស់រុស្ស៊ីនៅក្នុងរយៈពេលប៉ុន្មានខែថ្មីៗនេះ។ កំពង់ផែនៅទីនោះត្រូវបានប្រើសម្រាប់ការនាំចេញធញ្ញជាតិរបស់អ៊ុយក្រែនតាមដងទន្លេ Danube។
អង្គការសហប្រជាជាតិបានបញ្ជាក់នៅថ្ងៃពុធនេះថា ការវាយប្រហារដូចនេះលើហេដ្ឋារចនាសម្ព័ន្ធស៊ីវិលត្រូវតែបញ្ឈប់៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន AFP និងទីភ្នាក់ងារសារព័ត៌មាន Reuters។
