រដ្ឋបាលរបស់ប្រធានាធិបតីសហរដ្ឋអាមេរិកលោក Joe Biden ត្រូវបានគេរាយការណ៍ថាកំពុងពិចារណាផ្គត់ផ្គង់ដល់ប្រទេសអ៊ុយក្រែននូវមីស៊ីលរយៈចម្ងាយឆ្ងាយដែលបំពាក់ដោយគ្រាប់បែកចង្កោមនិងដែលអាចបណ្ដាលឱ្យមានការខូចខាតធ្ងន់ធ្ងរនៅក្នុងរង្វង់ដែនដីដែលកាន់កាប់ដោយរុស្ស៊ី។ នេះបើយោងតាមការបញ្ជាក់របស់មន្ត្រីអាមេរិក ៤ រូប។
បន្ទាប់ពីបានឃើញពីជោគជ័យនៃគ្រាប់បែកចង្កោមដែលបានបាញ់ចេញពីគ្រាប់កាំភ្លើងធំទំហំ ១៥៥ មីលីម៉ែត្រនៅក្នុងរយៈពេលប៉ុន្មានខែចុងក្រោយនេះមក សហរដ្ឋអាមេរិកកំពុងពិចារណាបញ្ជូនឱ្យអ៊ុយក្រែននូវគ្រាប់មីស៊ីលនៃប្រព័ន្ធមីស៊ីលកលយុទ្ធយោធា (ATACMS) ដែលអាចហោះបានចម្ងាយរហូតដល់ ៣០៦ គីឡូម៉ែត្រ និងគ្រាប់មីស៊ីលនៃប្រព័ន្ធរ៉ុក្កែតបាញ់ច្រើនគ្រាប់ដែលមានការបញ្ជា (GMLRS) ដែលអាចហោះបានចម្ងាយ ៧២ គីឡូម៉ែត្រនិងបំពាក់ដោយគ្រាប់បែកចង្កោម។ នេះបើយោងតាមទីភ្នាក់ងារសារព័ត៌មាន Reuters។
ប្រព័ន្ធរ៉ុក្កែតបាញ់ច្រើនគ្រាប់ដែលមានការបញ្ជា (GMLRS) នឹងអាចបាញ់គ្រាប់បែកចង្កោមរហូតដល់ទៅ ៤០៤ គ្រាប់។ អ៊ុយក្រែនមានប្រភេទមួយនៃប្រព័ន្ធរ៉ុក្កែត GMLRS នេះនៅក្នុងឃ្លាំងអាវុធរបស់ខ្លួនអស់រយៈពេលរាប់ខែមកហើយ។
រដ្ឋបាលរបស់លោក Biden បានពិចារណាអស់រយៈពេលជាច្រើនខែអំពីការផ្គត់ផ្គង់ប្រព័ន្ធមីស៊ីលកលយុទ្ធយោធា (ATACMS) ដល់អ៊ុយក្រែន ដោយខ្លាចថាការផ្គត់ផ្គង់ដូចនេះដល់អ៊ុយក្រែនអាចត្រូវបានគេយល់ឃើញថាជាវិធានការគឃ្លើនជ្រុលប្រឆាំងនឹងរុស្ស៊ី។
ប៉ុន្តែ ដោយសារយុទ្ធនាការប្រយុទ្ធតបតទៅវិញរបស់អ៊ុយក្រែនប្រឆាំងនឹងកងទ័ពរុស្ស៊ីបានបង្ហាញនូវសញ្ញាវិវឌ្ឍន៍ រដ្ឋាភិបាលអាមេរិកអន្ទះសាចង់ជួយយោធាអ៊ុយក្រែននៅក្នុងដំណាក់កាលសំខាន់មួយ។ នេះបើយោងតាមប្រភពពីរដែលប្រាប់ទីភ្នាក់ងារសារព័ត៌មាន Reuters។
សម្រាប់ព័ត៌មានដាច់ដោយឡែកមួយទៀត ទីភ្នាក់ងារស៊ើបការណ៍សម្ងាត់របស់យោធាអ៊ុយក្រែនបានបញ្ជាក់កាលពីថ្ងៃចន្ទថា កងទ័ពអ៊ុយក្រែនបានដណ្ដើមកាន់កាប់មកវិញនូវកន្លែងខួងយកឧស្ម័ននិងប្រេងឥន្ធនៈជាច្រើនកន្លែងនៅក្នុងសមុទ្រជិតតំបន់ Crimea។
ទីភ្នាក់ងារនេះបានបន្ថែមតាម Telegram ថា ប្រតិបត្តិការនេះគឺរួមមានទាំងកងកម្លាំងពិសេសជិះនាវារបស់អ៊ុយក្រែនផងដែរដែលបានបំផ្លាញយន្តហោះចម្បាំង Su-30 របស់រុស្ស៊ីមួយគ្រឿងនិងដណ្ដើមយកគ្រាប់កាំភ្លើងនិងឧបករណ៍រ៉ាដារបស់ឧទ្ធម្ភាគចក្រ។
ក្រសួងការពារជាតិអ៊ុយក្រែនបានបញ្ជាក់ថា រុស្ស៊ីបានត្រួតត្រាលើកន្លែងខួងយកឧស្ម័ននិងប្រេងឥន្ធនៈនេះតាំងពីឆ្នាំ ២០១៥ មក និងបានប្រើកន្លែងទាំងនោះសម្រាប់សកម្មភាពយោធា។
អ៊ុយក្រែនក៏បានលើកឡើងផងដែរកាលពីថ្ងៃចន្ទថា ទាហានរបស់ខ្លួនបានដណ្ដើមកាន់កាប់មកវិញនូវទឹកដីបន្ថែមទៀតនៅសមរភូមិជួរមុខភាគខាងកើតនិងភាគខាងត្បូងក្នុងពេលមួយសប្ដាហ៍កន្លងមកនេះនៃការវាយបករបស់ខ្លួនប្រឆាំងនឹងកងទ័ពរុស្ស៊ី៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន AFP និងទីភ្នាក់ងារសារព័ត៌មាន Reuters។
