មន្ត្រីរុស្ស៊ីមួយរូបបានឱ្យដឹងថា មានការវាយប្រហារមួយតាមយន្តហោះដ្រូនលើកំពង់ផែ Sevastopol ក្នុងតំបន់ Crimea នៅព្រឹកថ្ងៃចន្ទនេះ។
អភិបាលទីក្រុង Sevastopol លោក Mikhail Razvozhaev ដែលត្រូវបានតែងតាំងដោយរុស្ស៊ីបានបង្ហោះសារលើបណ្តាញសង្គមថា កងកម្លាំងរុស្ស៊ីបានបាញ់បំផ្លាញយន្តហោះដ្រូននោះ ហើយយន្តហោះដ្រូនទី២បានផ្ទុះឆេះ។
អភិបាលក្រុងរូបនេះនិយាយថា មិនមានរបាយការណ៍ណាមួយ ស្តីពីការខូចខាតដោយការវាយប្រហាររបស់ដ្រូនទាំងនេះឡើយ។
គេនៅមិនទាន់មានការបញ្ជាក់ភ្លាមៗទេថា តើការវាយប្រហារដោយយន្តហោះដ្រូននោះ ត្រូវបានធ្វើឡើងដោយកម្លាំងអ៊ុយក្រែន ឬយ៉ាងណា។ ការវាយប្រហារដោយយន្តហោះដ្រូនលើនាវាចម្បាំងរុស្ស៊ីកាលពីខែតុលាកន្លងទៅ នៅក្នុងសមុទ្រខ្មៅ ត្រូវបានរុស្ស៊ីថាជាសកម្មភាពរបស់កងទ័ពអ៊ុយក្រែន។
រុស៊្សីបានដាក់ភ្ជាប់ឧបទ្វីប Crimea ធ្វើជាផ្នែកមួយនៃទឹកដីរបស់ខ្លួន ដែលមិនត្រូវបានទទួលស្គាល់ដោយសហគមន៍អន្តរជាតិនោះឡើយ។
ក្នុងរឿងដាច់ដោយឡែកមួយទៀត ក្រសួងការពារជាតិចក្រភពអង់គ្លេសនិយាយនៅថ្ងៃចន្ទនេះថា អាជ្ញាធរក្នុងតំបន់ដែលគ្រប់គ្រងដោយរុស្ស៊ីនៅអ៊ុយក្រែន បានបង្ខិតបង្ខំពលរដ្ឋក្នុងតំបន់នោះឱ្យប្រើប្រាស់លិខិតឆ្លងដែនរុស្ស៊ី។
នៅក្នុងការវាយតម្លៃប្រចាំថ្ងៃរបស់ខ្លួន ក្រសួងការពារជាតិអង់គ្លេសលើកឡើងថា ពលរដ្ឋក្នុងតំបន់ Kherson ដែលជាតំបន់មួយទៀត ដែលរុស្ស៊ីបានដាក់បញ្ចូលទៅក្នុងទឹកដីរបស់ខ្លួននោះ ត្រូវបានអាជ្ញាធរគំរាមកំហែងថានឹងបណ្តេញចេញ ឬរឹបអូសយកទ្រព្យសម្បត្តិរបស់ពួកគេ ប្រសិនបើគេមិនយល់ព្រមទទួលយកលិខិតឆ្លងដែនរុស្ស៊ីនៅត្រឹមថ្ងៃទី១ ខែមិថុនា ខាងមុខនេះទេ។
ក្រសួងការពារជាតិអង់គ្លេសបាននិយាយទៀតថា «រុស្ស៊ីទំនងដូចជាកំពុងពន្លឿនការធ្វើសមាហរណកម្មនៃតំបន់ដែលខ្លួនគ្រប់គ្រងនៅអ៊ុយក្រែន ទៅក្នុងសហព័ន្ធរុស្ស៊ី ដើម្បីលាបពណ៍បង្ហាញពីជ័យជម្នះនៃការឈ្លានពានរបស់ខ្លួន ជាពិសេសនៅពេលមុនបោះឆ្នោតប្រធានាធិបតីរុស្ស៊ី ក្នុងឆ្នាំ២០២៤ ខាងមុខនេះ៕
ព័ត៌មានខ្លះក្នុងសេចក្តីរាយការណ៍នេះដកស្រង់ពីទីភ្នាក់ងារសារព័ត៌មាន AP, AFP និង Reuters។
