ខុទ្ទកាល័យរបស់ប្រធានាធិបតីអ៊ុយក្រែននិយាយថា មានការប្រយុទ្ធគ្នាយ៉ាងសាហាវកំពុងផ្ទុះឡើងនៅខាងក្រៅទីក្រុង Bakhmut នៅថ្ងៃចន្ទនេះ ខណៈដែលកងកម្លាំងរុស្ស៊ីកំពុងជំរុញការវាយលុករបស់ពួកគេទៅលើទីក្រុងភាគខាងកើតនេះដោយការបាញ់ផ្លោងយ៉ាងខ្លាំង និងការវាយប្រហារដោយថ្មើរជើង។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន AP។
ខុទ្ទកាល័យប្រធានាធិបតីបានបន្ថែមថា យ៉ាងហោចណាស់មានជនស៊ីវិលប្រាំនាក់បានរងរបួសក្នុងរយៈពេល ២៤ ម៉ោងចុងក្រោយនេះ។
ក្រសួងការពារជាតិរបស់ចក្រភពអង់គ្លេស បាននិយាយថា កងកម្លាំងរុស្ស៊ីកំពុងពង្រឹងការការពារនៅតាមបណ្តោយភាគខាងត្បូងអ៊ុយក្រែន។ ក្រសួងបាននិយាយនៅក្នុងការសង្ខេបព័ត៌មានមួយនៅថ្ងៃចន្ទនេះថា ទាហានរុស្ស៊ីហាក់ដូចជាមានការព្រួយបារម្ភអំពីការការពារតំបន់ភាគខាងត្បូងនៃសមរភូមិដែលមានប្រវែង១២៨៨ គីឡូម៉ែត្រ ។
ទន្ទឹមនឹងនេះ ស្ថានទូតសហរដ្ឋអាមេរិកនៅទីក្រុងមូស្គូបានចេញការព្រមានមួយទៀតសម្រាប់ពលរដ្ឋរបស់ខ្លួនឱ្យ «ចាកចេញជាបន្ទាន់» ពីប្រទេសរុស្ស៊ី៕
