ពួកអ្នកតំណាងមកពីអង្គការអូតង់ និងប្រទេសរុស្ស៊ី បាននិយាយគ្នាជាលើកទីមួយកាលពីថ្ងៃសុក្រ ចាប់តាំងពីភាគីទាំង២ បានផ្តាច់ការទាក់ទងដោយសារការឈ្លានពានរបស់រុស្ស៊ីនៅក្នុងប្រទេសអ៊ុយក្រែន នេះយោងតាមការបញ្ជាក់របស់ក្រសួងការពារប្រទេសរុស្ស៊ី។
លោក Petr Pavel ប្រធានគណៈកម្មាធិការយោធារបស់អង្គការអូតង់ បានទូរស័ព្ទទៅលោក Valery Gerasimov អគ្គបញ្ជាការកងទ័ពរុស្ស៊ីដើម្បីពិភាក្សាពីបញ្ហាសន្តិសុខនៅពេលបច្ចុប្បន្ននេះហើយនិងការបង្កើតកិច្ចសហប្រតិបត្តិការខាងយោធាដើម្បីបញ្ចៀសឧបទ្ទវហេតុ។
ក្រសួងការពារប្រទេសរុស្ស៊ីបានប្រាប់ឲ្យដឹងនៅក្នុងសេចក្តីថ្លែងការណ៍ថា៖ «នេះជាការទាក់ទងខាងយោធាកម្រិតខ្ពស់លើកទី១ ចាប់តាំងពីក្រុមប្រឹក្សារបស់អង្គការអូតង់បានសម្រេចបញ្ឈប់ការទាក់ទងជាមួយរុស្ស៊ី»។
សេចក្តីថ្លែងការណ៍នោះ ក៏បានប្រាប់ឲ្យដឹងថា លោក Gerasimov បានត្អូញត្អែអំពីការកើនឡើងនូវសកម្មភាពខាងយោធារបស់អង្គការអូតង់នៅជិតព្រំដែនរុស្ស៊ី។
អង្គការអូតង់ បានប្រាប់ឲ្យដឹងថា ការបង្កើតគមនាគមន៍ថ្មីរវាងភាគីទាំង២ ស្ថិតក្នុងផលប្រយោជន៍រវាងគ្នានិងគ្នានៃអង្គការអូតង់និងប្រទេសរុស្ស៊ី។
អង្គការអូតង់បានប្រាប់ឲ្យដឹង ដោយមិនបានផ្តល់សេចក្តីលម្អិតអំពីអ្វីដែលពួកគេបានពិភាក្សាដោយនិយាយថា«លោកឧត្តមសេនីយ៍ទាំង២បានព្រមព្រៀងថា ពួកអស់លោកនឹងនៅតែធ្វើការទាក់ទងគ្នា»។
អង្គការអូតង់បានកាត់ផ្តាច់ការទាក់ទងខាងយោធាជាមួយរដ្ឋាភិបាលក្រុងមូស្គូបន្ទាប់ពីធ្វើការឈ្លានពានម្តងហើយម្តងទៀតប្រឆាំងនឹងប្រទេសអ៊ុយក្រែន ទោះយ៉ាងនោះក៏ដោយ អ្នកការទូតមកពីភាគីទាំង២នៅធ្វើការទាក់ទងគ្នា៕
