ប្រទេសរុស្ស៊ីបានប្រកាសមិនទទួលស្គាល់របាយការណ៍ដែលរៀបចំឡើងដោយគណកម្មាធិការព្រឹទ្ធសភាសហរដ្ឋអាមេរិក ទទួលបន្ទុកកិច្ចការបរទេស ដែលបានចោទប្រកាន់វិមានក្រឹមឡាំង ថាបានជ្រៀតជ្រែកមានបំណងធ្វើឲ្យប៉ះពាល់ដល់ប្រជាធិបតេយ្យ។ រដ្ឋាភិបាលរុស្ស៊ីបានហៅការចោទប្រកាន់នោះថា ជាការ«ចោទប្រកាន់គ្មានមូលដ្ឋាន» និងធ្វើឲ្យខូចខាតដល់ទំនាក់ទំនងរវាងប្រទេសទាំងពីរ។
សមាជិកព្រឹទ្ធសភាខាងគណបក្សប្រជាធិបតេយ្យសហរដ្ឋអាមេរិក កាលពីថ្ងៃពុធបានព្រមានថាការជ្រៀតជ្រែករបស់រុស្ស៊ីបានធ្វើឲ្យប៉ះពាល់ដល់លិទ្ធិប្រជាធិបតេយ្យ ជាងការជ្រៀតជ្រែកនៅក្នុងការបោះឆ្នោតសហរដ្ឋអាមេរិកទៅទៀត និងបានចោទប្រកាន់លោកប្រធានាធិបតី Donald Trump ថាបរាជ័យក្នុងការប្រឈមនឹងការគម្រាមកំហែងនេះ។
លោក Ben Cardinសមាជិកព្រឹទ្ធសភាប្រចាំរដ្ឋMarylandខាងគណបក្សប្រជាធិបតេយ្យ និងជាសភាជិកជាន់ខ្ពស់មួយរូបនៃគណកម្មាធិការទំនាក់ទំនងបរទេស បានថ្លែងថា ៖«មិនដែលមានប្រធានាធិបតីសហរដ្ឋអាមេរិករូបណាពីមុនមកដែលធ្វើមិនដឹងមិនឮការគម្រាមកំហែងធ្ងន់ធ្ងរដូច្នេះទេ ហើយការកើនឡើងនៃការគម្រាមកំហែងទាំងនោះធ្វើឲ្យប៉ះពាល់ដល់សន្តិសុខសហរដ្ឋអាមេរិក»។ លោកបានថ្លែងបន្ថែមថា បើគ្មានវិធីសាស្ត្រណាទប់ស្កាត់នោះទេ រុស្ស៊ីនឹងបន្តជ្រៀតជ្រែកក្នុងការបោះឆ្នោតក្នុងឆ្នាំនេះ និងការបោះឆ្នោតឆ្នាំ២០២០ថែមទៀត។
លោកCardin បានផ្សព្វផ្សាយរបាយការណ៍ដែលរៀបចំឡើងដោយគណកម្មាធិការខាងគណបក្សប្រជាធិបតេយ្យ ដែលបានចោទប្រកាន់ប្រទេសរុស្ស៊ីថាបានធ្វើការវាយប្រហារឥតឈប់ឈរលើលិទ្ធិប្រជាធិបតេយ្យ ទាំងនៅក្នុងប្រទេសរុស្ស៊ី និងទាំងនៅបរទេស និងបានជំរុញឲ្យមានយុទ្ធសាស្រ្តមួយចំនួនប្រឆាំងតបវិញ ដោយចាប់ផ្តើមជាមួយការដឹកនាំរបស់ប្រធានាធិបតីសហរដ្ឋអាមេរិក។
របាយការណ៍បានបង្ហាញថា៖ «របបគ្រប់គ្រងរបស់ប្រធានាធិបតីរុស្ស៊ី Vladimir Putin បានបង្កើតវិធានការណ៍មួយចំនួន ដើម្បីជះឥទ្ធិពលនៅបរទេស»ហើយ«ហាក់ដូចជាមានគោលបំណងប្រើប្រាស់គ្រប់វិធីដែលអាចរកបាន ដើម្បីឲ្យស្ថាប័នប្រជាធិបតេយ្យទាំងឡាយ និងបក្សម្ព័ន្ធឆ្លងសមុទ្រអាត្លង់ទិកមានភាពទន់ខ្សោយ»។
នៅក្នុងសន្និសីទសារពត៌មានតាមទូរសព្ទកាលពីថ្ងៃព្រហស្បតិ៍ម្ស៊ិលម៉ិញ អ្នកនាំពាក្យវិមានក្រឹមឡាំង លោក Dmitry Peskov បានបដិសេធរាល់ការចោទប្រកាន់នៃការជ្រៀតជ្រែកទាំងនោះ និងបានសម្តែងនូវការភ្ញាក់ផ្អើលដែលនៅតែមានការចោទប្រកាន់ទាំងនោះ៕
