មន្ត្រីអ៊ុយក្រែនបាននិយាយនៅថ្ងៃចន្ទនេះថា ការវាយប្រហារតាមអាកាសរបស់រុស្ស៊ីលើទីក្រុងកំពង់ផែ Odesa នៅភាគខាងត្បូងបានធ្វើឱ្យមនុស្សយ៉ាងតិច ៣ នាក់រងរបួស។
យោធាបានបញ្ជាក់ថា ប្រព័ន្ធការពារដែនអាកាសបានបាញ់ទម្លាក់ដ្រូនទាំង ១៥ គ្រឿងដែលរុស្ស៊ីបានប្រើនៅក្នុងការវាយប្រហារនេះ ក៏ដូចជាមីស៊ីលបាញ់ពីសមុទ្រ ៨ គ្រាប់ផងដែរ ប៉ុន្តែកម្ទេចកំទីនៃដ្រូននិងមីស៊ីលទាំងនោះដែលធ្លាក់ចុះមកបានបណ្ដាលឱ្យមានការខូចខាតនៅលើដី។
មនុស្ស ៣ នាក់បានរងរបួសបន្ទាប់ពីកម្ទេចកំទីបាក់បែកបានធ្លាក់ចំផ្សារទំនើបមួយកន្លែង ហើយអន្តេវាសិកដ្ឋាននិស្សិតមួយកន្លែងក៏បានរងការខូចខាតផងដែរ។
ក្រុមអ្នកពន្លត់អគ្គិភ័យបានព្យាយាមពន្លត់អគ្គិភ័យជាច្រើនកន្លែងដែលបានកើតឡើងដោយសារកម្ទេចកំទីរ៉ុក្កែតដែលធ្លាក់ចុះមក។ នេះបើតាមការបញ្ជាក់របស់អភិបាលតំបន់លោក Oleh Kiper តាម Telegram។
ការបាញ់ផ្លោងរបស់រុស្ស៊ីកាលពីថ្ងៃអាទិត្យបានសម្លាប់មនុស្សយ៉ាងតិច ៧ នាក់ ដែលក្នុងនោះរួមមានទាំងទារិកាអាយុ ២៣ ថ្ងៃម្នាក់ផងដែរ និងបានធ្វើឱ្យមនុស្សយ៉ាងតិច ២២ នាក់ផ្សេងទៀតរងរបួសនៅក្នុងតំបន់ Kherson នៃប្រទេសអ៊ុយក្រែន។
នៅថ្ងៃចន្ទនេះផងដែរ ក្រសួងការបរទេសអ៊ុយក្រែនបានថ្កោលទោសអ្វីដែលខ្លួនហៅថាជាការរំលោភធ្ងន់ធ្ងរលើច្បាប់អន្តរជាតិរបស់កងទ័ពជើងទឹករុស្ស៊ី បន្ទាប់ពីនាវាចម្បាំងរុស្ស៊ីមួយគ្រឿងបានបាញ់ព្រមានដាក់នាវាដឹកទំនិញដែលមានដោតទង់ជាតិប្រទេសដីកោះ Palau ដែលធ្វើដំណើរឆ្ពោះទៅកាន់កំពង់ផែទីក្រុង Izmail នៃប្រទេសអ៊ុយក្រែន។
ក្រសួងការពារជាតិរុស្ស៊ីបានបញ្ជាក់កាលពីថ្ងៃអាទិត្យថា ការបាញ់នោះបានធ្វើឡើងដោយសារតែនាយនាវា Sukru Okan បានធ្វើព្រងើយកន្តើយចំពោះការទាមទាររបស់នាវាចម្បាំងរុស្ស៊ីឱ្យឈប់។ បន្ទាប់ពីបានបាញ់ព្រមានមក ទាហានរុស្ស៊ីបានទម្លាក់ខ្លួនចុះពីឧទ្ធម្ភាគចក្រលើនាវាដឹកទំនិញនោះ។
បន្ទាប់ពីកងទ័ពរុស្ស៊ីបានត្រួតពិនិត្យនាវា Sukru Okan រួចហើយ នាវានោះត្រូវបានអនុញ្ញាតឱ្យបន្តដំណើរទៅកាន់កំពង់ផែទីក្រុង Izmail។ នេះបើតាមការបញ្ជាក់របស់ក្រសួងការពារជាតិរុស្ស៊ី៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារព័ត៌មាន Reuters ទីភ្នាក់ងារព័ត៌មាន AP និងទីភ្នាក់ងារព័ត៌មាន AFP។
រុស្ស៊ីប្រើមីស៊ីលនិងដ្រូនវាយប្រហារលើទីក្រុង Odesa របស់អ៊ុយក្រែន
