កងទ័ពរុស្ស៊ីបានរុលចូលក្នុងប្រទេសអ៊ុយក្រែនក្នុងផ្ទៃដីទំហំ ៣.៩៨៥ គីឡូម៉ែត្រការ៉េនៅក្នុងឆ្នាំ ២០២៤ ដែលមានចំនួន ៧ ដងច្រើនជាងឆ្នាំ ២០២៣។ នេះបើយោងតាមការវិភាគរបស់ទីភ្នាក់ងារសារព័ត៌មាន AFP លើទិន្នន័យរបស់វិទ្យាស្ថានសម្រាប់ការសិក្សាសង្គ្រាម (ISW) ដែលមានមូលដ្ឋាននៅសហរដ្ឋអាមេរិក។
ភាគច្រើននៃការរុលចូលរបស់រុស្ស៊ីនេះបានធ្វើឡើងនៅសរទរដូវ ដោយបានកាន់កាប់ផ្ទៃដីចំនួន ៦១០ គីឡូម៉ែត្រការ៉េនៅក្នុងខែតុលានិង ៧២៥ គីឡូម៉ែត្រការ៉េនៅក្នុងខែវិច្ឆិកា។ ខែទាំងពីរនេះគឺជាខែដែលកងទ័ពរុស្ស៊ីបានដណ្តើមបានទឹកដីភាគច្រើនចាប់តាំងពីខែមីនាឆ្នាំ ២០២២ មក។
ការរុលទៅមុខរបស់រុស្ស៊ីនេះមានភាពយឺតយ៉ាវក្នុងខែធ្នូ ដោយរុស្ស៊ីបានរុលចូលក្នុងទឹកដីទំហំតែ ៤៦៥ គីឡូម៉ែត្រការ៉េប៉ុណ្ណោះនៅក្នុងរយៈពេល ៣០ ដំបូងនៃខែនោះ។
ទោះជាយ៉ាងណាក៏ដោយ ការរុលចូលនេះគឺមានទំហំជិត ៤ ដងធំជាងក្នុងខែដូចគ្នាកាលពីឆ្នាំមុននិង ២ ដងកន្លះច្រើនជាងខែធ្នូ ឆ្នាំ ២០២២។
ទឹកដីជិត ៣ ភាគ ៤ ដែលរុស្ស៊ីបានដណ្ដើមបាននៅក្នុងប្រទេសអ៊ុយក្រែនក្នុងឆ្នាំ ២០២៤ គឺស្ថិតនៅតំបន់ Donetskភាគខាងកើតអ៊ុយក្រែន ដែលក្នុងនោះរួមមានទាំងទីក្រុង Pokrovsk ដែលជាមជ្ឈមណ្ឌលភស្តុភាររបស់អ៊ុយក្រែនផងដែរ។
ឥឡូវនេះ រុស្ស៊ីត្រួតត្រាឬក៏កំពុងធ្វើប្រតិបត្តិការនៅក្នុងតំបន់នោះចំនួន ៧០% បើប្រៀបធៀបទៅនឹងចុងឆ្នាំ ២០២៣ ដែលមានតែ ៥៩% ប៉ុណ្ណោះ៕
