ប្រធានាធិបតីអ៊ីរ៉ង់លោក Hassan Rouhani បាននិយាយថា ប្រសិនបើប្រធានាធិបតីសហរដ្ឋអាមេរិកលោកដូណាល់ ត្រាំ ចង់ធ្វើការចរចា លោកត្រាំ ត្រូវតែចាត់វិធានការមុនដំបូងគឺលុបចោលការដាក់ទណ្ឌកម្មទាំងអស់ប្រឆាំងនឹងអ៊ីរ៉ង់។
ប្រធានាធិបតីរូហានី បាននិយាយថា អ៊ីរ៉ង់ បានធ្វើការបញ្ជាក់យ៉ាងច្បាស់ថា ខ្លួនមិនមានបំណងធ្វើអាវុធនុយក្លេអ៊ែរ ហើយបានហៅការដាក់ទណ្ឌកម្មនេះជាការខុសច្បាប់ មិនត្រឹមត្រូវ និងអយុត្តិធម៌។
លោកប្រធានាធិបតីត្រាំ បាននិយាយកាលពីថ្ងៃចន្ទថា «មានឱកាសដ៏ល្អពិតប្រាកដ» ដែលលោកប្រធានាធិបតីត្រាំ នឹងជួបជាមួយប្រធានាធិបតីអ៊ីរ៉ង់លោករូហានីក្នុងប៉ុន្មានសប្តាហ៍ខាងមុខដើម្បីព្យាយាមចរចាកិច្ចព្រមព្រៀងថ្មីដើម្បីកម្រិតកម្មវិធីនុយក្លេអ៊ែររបស់អ៊ីរ៉ង់ដើម្បីជំនួសកិច្ចព្រមព្រៀងអន្តរជាតិឆ្នាំ២០១៥ដែលប្រធានាធិបតីត្រាំ បានដកសហរដ្ឋអាមេរិកចេញកាលពីឆ្នាំទៅ។
ប្រធានាធិបតីត្រាំ ដែលថ្លែងនៅឯការបញ្ចប់សន្និសីទកំពូល G7 របស់មេដឹកនាំកំពូលៗក្នុងពិភពលោកនៅប្រទេសបារាំង បាននិយាយថា «ខ្ញុំគិតថា អ៊ីរ៉ង់ នឹងចង់ជួប»។
ប្រធានាធិបតីសហរដ្ឋអាមេរិក បាននិយាយថា ការដាក់ទណ្ឌកម្មសេដ្ឋកិច្ចដែលលោកបានដាក់ឡើងវិញទៅលើប្រទេសអ៊ីរ៉ង់កាលពីឆ្នាំទៅ កំពុងធ្វើឲ្យប៉ះពាល់ពួកគេយ៉ាងខ្លាំងនៅពេលដែលប្រធានាធិបតីត្រាំ បានស្វះស្វែងកម្រិតយ៉ាងខ្លាំងលើការនាំប្រេងចេញរបស់អ៊ីរ៉ង់ទៅកាន់ទីផ្សារអន្តរជាតិ៕
