នាវាដឹកប្រេងរបស់ប្រទេសអ៊ីរ៉ង់ដែលត្រូវបានរឹបអូសនៅក្នុងដែនដី Gibraltar ដោយសារតែបានបំពានទៅលើទណ្ឌកម្មរបស់សហភាពអ៊ឺរ៉ុបនោះ បានធ្វើដំណើរចេញពីដែនទឹកនៃតំបន់ Gibraltar ហើយ កាលពីថ្ងៃអាទិត្យ បន្ទាប់ពីតុលាការកំពូលនៃដែនអាណានិគមអង់គ្លេសមួយនេះ បានបដិសេធសំណើរបស់សហរដ្ឋអាមេរិក ដែលបានស្នើឲ្យប្រគល់វានាដែលត្រូវបានសង្ស័យថាដឹកប្រេងឆៅទៅឲ្យប្រទេសស៊ីរី មួយនេះឲ្យទៅសហរដ្ឋអាមេរិក។
យោងតាមទិន្នន័យត្រួតពិនិត្យរបស់ចរាចរណ៍ផ្លូវទឹក បានបង្ហាញនៅថ្ងៃចន្ទនេះថា វានាដឹកប្រេងដែលត្រូវបានប្តូរឈ្មោះពីនាវា Grace 1 ទៅនាវា Adrian Darya 1 បានធ្វើដំណើរឆ្ពោះទៅកំពង់ផែប្រទេសក្រិក បើទោះបីជាក្រុមមន្រ្តីមិនបានបញ្ជាក់អំពីទិសដៅរបស់នាវានេះជាសាធារណៈក៏ដោយ។
សហរដ្ឋអាមេរិកកាលពីថ្ងៃសៅរ៍បានស្នើឲ្យបញ្ឈប់មិនឲ្យនាវាដឹកប្រេងនេះចាកចេញពីដែនទឹក Gibraltar ជាកន្លែងដែលនាវាមានផ្ទុកប្រេង២លាន១សែនធុងនេះបានចតអស់រយៈពេល៤៦ថ្ងៃ។ ក៏ប៉ុន្តែក្រុមអាជ្ញាធរគ្មានលទ្ធភាពស្នើសុំបទបញ្ជាពីតុលាការកំពូល ដើម្បីឃាត់នាវានេះទុកឡើយ។ នេះបើយោងតាមសេចក្តីថ្លែងការណ៍។
សំណើរបស់សហរដ្ឋអាមេរិកឲ្យឃាត់ទុកនាវានេះត្រូវបានបដិសេធដោយតុលាការកំពូលនៃដែនដី Gibraltar កាលពីថ្ងៃព្រហស្បតិ៍។ នាយករដ្ឋមន្រ្តីដែនអាណានិគម លោក Fabian Picardo បានថ្លែងថា ប្រទេសអ៊ីរ៉ង់បានផ្តល់ការធានាអះអាងថា ប្រេងទាំងនេះនឹងមិនដឹកទៅឲ្យប្រទេសស៊ីរី ជាទិសដៅដែលត្រូវបានហាមឃាត់ដោយទណ្ឌកម្មសហភាពអ៊ឺរ៉ុបប្រឆាំងនឹងរដ្ឋាភិបាលរបស់លោក Bashar al-Assad នោះទេ។
យោងតាមក្រសួងយុត្តិធម៌ដែនដី Gibraltar បានឲ្យដឹងថា ការស្នើសុំជាបន្តបន្ទាប់របស់សហរដ្ឋអាមេរិកក្នុងការឃាត់ទុកនាវានេះ ផ្អែកលើបទល្មើសនៅក្រោមច្បាប់ស្តីពីអំណាចសេដ្ឋកិច្ចបន្ទាន់ដែលទាក់ទិនទៅនឹងទណ្ឌកម្មរបស់សហរដ្ឋអាមេរិកប្រឆាំងនឹងប្រទេសអ៊ីរ៉ង់នោះ មិនអនុលោមតាមច្បាប់របស់ដែនដី Gibraltar ឬចក្រភពអង់គ្លេស ឬសហភាពអ៊ឺរ៉ុបនោះទេ៕
