ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

មាន​ការ​បាញ់​ផ្តក់​រ៉ុក្កែត​ទៅ​ក្នុង​មូលដ្ឋាន​យោធា​មួយ​របស់​ទាហាន​ក្រុម​ចម្រុះ​នៅ​ក្នុង​ប្រទេស​អ៊ីរ៉ាក់


ឡាន​មួយ​គ្រឿង​ដឹក​រ៉ុក្កែត Katyusha នៅតំបន់ Rashidiya បន្ទាប់​ពី​មាន​ការ​វាយ​ប្រហារ​ដោយ​រ៉ុក្កែត​លើ​មូលដ្ឋាន​យោធា​ Taji ដែល​មាន​កង​កម្លាំង​សហរដ្ឋ​អាមេរិកស្ថិត​នៅ នៅ​ភាគ​ខាង​ជើង​ទីក្រុង​បាកដាដ ប្រទេស​អ៊ីរ៉ាក់។

អ្នក​នាំពាក្យ​យោធា​ស.រ.អា.​ម្នាក់​បាន​និយាយ​ថា ​មាន​ការ​បាញ់​ផ្តក់​រ៉ុក្កែត​ទៅ​ក្នុង​មូលដ្ឋាន​អ៊ីរ៉ាក់​មួយ​កាល​ពី​ថ្ងៃសៅរ៍ ជា​ទី​ដែល​កង​កម្លាំង​ក្រុម​ចម្រុះ​ឋិត​នៅ​បណ្តាល​ឱ្យ​ត្រូវ​របួស​សមាជិក​បី​នាក់​នៃ​ក្រុម​ចម្រុះ​ និង​ទាហាន​អ៊ីរ៉ាក់​ពីរ​នាក់។

គេមិន​បាន​ប្រាប់​ឱ្យ​ដឹង​ភ្លាមៗ​អំពី​សញ្ជាតិ​នៃ​ពួក​សមាជិក​ក្រុម​ចម្រុះ​ដែល​ត្រូវ​របួស​នោះ​ទេ។​

គ្មាន​នរណា​ម្នាក់​អះអាង​ទាមទារ​ការ​ទទួល​ខុស​ត្រូវ​ដល់​ការ​វាយ​ប្រហារ​នេះ​នៅ​ឡើយ​ទេ។​

អ្នក​នាំពាក្យ​ម្នាក់​នៃ​ក្រុម​ចម្រុះ​ស.រ.អា.​បាន​និយាយ​ថា​ មាន​រ៉ុក្កែត​យ៉ាង​តិច​ណាស់​២៥​គ្រាប់​បាន​បាញ់​ទៅ​ក្នុង​មូលដ្ឋាន​នោះ។បណ្តាញ​ផ្សាយព័ត៌មាន​អ៊ីរ៉ាក់​បាន​រាយ​ការណ៍​ថា​ មាន​ការ​បាញ់​ផ្តក់​រ៉ុក្កែត​៣៣​គ្រាប់ ​ក៏ប៉ុន្តែ​បាន​និយាយ​ថា​២៣​គ្រាប់​មិន​បាន​ផ្ទុះ​ទេ។​

ការ​វាយ​ប្រហារ​នៅ​ពេល​ថ្ងៃ​ ​កាល​ពី​ថ្ងៃ​សៅរ៍​ទៅ​ក្នុង​មូលដ្ឋាន​ Camp Taji ​មាន​ឡើង​តែ​ប៉ុន្មាន​ថ្ងៃ​ក្រោយ​ការ​វាយ​ប្រហារ​ស្រដៀង​គ្នា​លើ​មូលដ្ឋាន​នេះ​ ដែល​បាន​បណ្តាល​ឱ្យ​ទាហាន​អាមេរិកាំង​ពីរ​និង​ពេទ្យ​អង់គ្លេស​ម្នាក់​ស្លាប់​ហើយ​បាន​ធ្វើ​ឱ្យ​មនុស្ស​យ៉ាង​តិច​ណាស់​១៤​នាក់​ទៀត​ត្រូវ​របួស។

នៅ​ក្រោយ​មាន​ការ​វាយ​ប្រហារ​លើមូលដ្ឋាន​ Taji ​កាល​ពី​ថ្ងៃ​ពុធ​ ការ​វាយ​ប្រហារ​សង​សឹក​ដោយ​ស.រ.អា.​បាន​ត្រូវ​ចំ​ឃ្លាំង​អាវុធ​៥​កន្លែង​របស់​ពួក ​kataib Hezbollah គាំទ្រ​ដោយ​អ៊ីរ៉ង់ នៅ​ក្នុង​ប្រទេស​អ៊ីរ៉ាក់។​

ក្រសួង​ការពារ​ប្រទេស​ស.រ.អា.​បាន​និយាយ​ថា​ រ៉ុក្កែត​ដែល​បាន​ត្រូវ​ប្រើ​ប្រាស់​ក្នុង​ការ​វាយ​ប្រហារ​លើ​មូលដ្ឋាន ​Taji ​បាន​ត្រូវ​ដាក់​នៅ​ក្នុង​ឃ្លាំង​អាវុធ​ខ្លះ​ក្នុង​បណ្តា​ ឃ្លាំង​អាវុធ​ទាំង​នេះ៕

XS
SM
MD
LG