អ្នកស្រី Fraidy Reiss ដែលធំដឹងក្ដីនៅក្នុងសហគមន៍ជ្វីហ្វដែលប្រកាន់វិន័យតឹងរ៉ឹងក្នុងទីក្រុង Brooklyn រដ្ឋ New York សហរដ្ឋអាមេរិក បានរៀបរាប់ការរស់នៅរយៈពេល ១៥ ឆ្នាំ របស់អ្នកស្រីក្នុងជីវិតអាពាហ៍ពិពាហ៍ដែលឪពុកម្ដាយផ្សំផ្គុំឲ្យ ថាដូចជា «ការក្បត់នៅក្នុងគ្រួសារខ្លួនឯង» អញ្ចឹង។
បន្ទាប់ពីព្យាយាមលែងលះមិនបានសម្រេច និងបន្ទាប់ពីទទួលបានសញ្ញាបត្រក្រោយពីប្រឹងប្រែងឆ្លងកាត់ឧបសគ្គគ្រប់ជំពូក និងសន្សំបានថវិកាមួយចំនួនមក អ្នកស្រី Reiss បាននាំកូនស្រីពីរនាក់របស់អ្នកស្រីរត់គេច។
អ្នកស្រី Reiss និយាយថា៖ «គ្រួសារ និងសហគមន៍របស់ខ្ញុំនៅតែគិតថាខ្ញុំបានស្លាប់បាត់ទៅហើយ អស់រយៈពេលជាងមួយទសវត្សរ៍កន្លងមកនេះ»។
បទពិសោធន៍របស់អ្នកស្រីបានធ្វើឲ្យអ្នកស្រីក្លាយជាសកម្មជនមួយរូបដែលប្ដេជ្ញាប្រយុទ្ធប្រឆាំងនឹងអាពាហ៍ពិពាហ៍ដោយការផ្សំផ្គុំ អាពាហ៍ពិពាហ៍ដោយការបង្ខំ និងអាពាហ៍ពិពាហ៍កុមារ។ អ្នកស្រីបានបង្កើតអង្គការ Unchained At Last ដែលជាអង្គការក្រៅរដ្ឋាភិបាលមួយនៅក្នុងរដ្ឋ New Jersey ដើម្បីជួយជនរងគ្រោះដោយសារបញ្ហាអាពាហ៍ពិពាហ៍កុមារ។
តាំងពីឆ្នាំ ២០១១ មក មនុស្សជាង ៥៥០ នាក់ អាចរត់គេចចេញពីអាពាហ៍ពិពាហ៍ដូចនេះ ដោយសារតែមានការជួយជ្រោមជ្រែងពីអ្នកស្រី Reiss។ ការប្រឹងប្រែងរបស់អ្នកស្រី Reiss បានធ្វើឲ្យរដ្ឋ New Jersey ក្លាយជារដ្ឋមួយក្នុងចំណោមរដ្ឋតែពីរតែប៉ុណ្ណោះនៅក្នុងសហរដ្ឋអាមេរិក ដែលហាមឃាត់ដោយស្របច្បាប់នូវការរៀបអាពាហ៍ពិពាហ៍របស់មនុស្សអាយុក្រោម ១៨ ឆ្នាំ។
អ្នកស្រី Reiss បញ្ជាក់ថា៖ «វាពិតជាគួរឲ្យភ្ញាក់ផ្អើលណាស់។ នៅពេលដែលខ្ញុំបានចាប់ផ្ដើមធ្វើរឿងនេះដំបូង ការរៀបការអាយុក្រោម ១៨ ឆ្នាំ គឺជារឿងស្របច្បាប់នៅក្នុងរដ្ឋទាំង ៥០ នៅក្នុងសហរដ្ឋអាមេរិក។ មូលហេតុដែលអាយុ ១៨ ឆ្នាំ សំខាន់ គឺដោយសារតែមុនពេលអាយុ ១៨ ឆ្នាំ គឺយើងគ្មានសិទ្ធិដែលយើងត្រូវការដើម្បីការពារខ្លួនយើងពីការចាប់បង្ខំឲ្យរៀបការបានទេ»។
នៅក្នុងរដ្ឋភាគច្រើនក្នុងសហរដ្ឋអាមេរិក កុមារអាយុ ១៦ ឆ្នាំ អាចរៀបការដោយស្របច្បាប់បាន។ រដ្ឋពីរអនុញ្ញាតឲ្យមនុស្សអាចរៀបការបាននៅអាយុ ១៤ ឆ្នាំ ហើយសម្រាប់រដ្ឋចំនួន ១៣ ផ្សេងទៀត មិនមានលក្ខខណ្ឌកំណត់អាយុសម្រាប់ការរៀបការស្របច្បាប់នោះទេ។
រដ្ឋ Idaho ជារដ្ឋដែលមានអត្រាអាពាហ៍ពិពាហ៍កុមារខ្ពស់ជាងគេបំផុតនៅក្នុងសហរដ្ឋអាមេរិក ដោយមានអាពាហ៍ពិពាហ៍បែបនេះចំនួនជាង ៤ សែនករណីនៅរវាងឆ្នាំ ២០០០ និងឆ្នាំ ២០១០។
នៅក្នុងឆ្នាំ ២០១៩ អ្នកស្រី Melissa Wintrow សមាជិករដ្ឋសភារបស់រដ្ឋ Idaho ខាងគណបក្សប្រជាធិបតេយ្យ បានព្យាយាមកំណត់យកអាយុ ១៦ ឆ្នាំជាអាយុអប្បបរមាដែលអាចរៀបការបាន ប៉ុន្តែបានបរាជ័យ។
អ្នកស្រី Wintrow និយាយថា៖ «ដោយសារតែប្រវត្តិសាស្ត្រ និងលក្ខណៈបែបអភិរក្សនិយមរបស់រដ្ឋនេះ ខ្ញុំបានស្នើឡើងនូវអ្វីដែលខ្ញុំគិតថាជាការសម្របសម្រួលដ៏សមហេតុសមផលបំផុត ដោយស្នើឲ្យកំណត់អាយុទាបបំផុតត្រឹមអាយុ ១៦ ឆ្នាំ ដែលស៊ីគ្នាជាមួយនឹងអាយុកំណត់សម្រាប់ការព្រមព្រៀងបានដោយខ្លួនឯង និងច្បាប់ស្ដីពីការរំលោភសេពសន្ថវៈ។ ច្បាប់នាពេលបច្ចុប្បន្ននេះបញ្ជាក់ថា កុមារអាចរៀបការបានដោយគ្រាន់តែមានការអនុញ្ញាតពីតុលាការតែប៉ុណ្ណោះ ប្រសិនបើការរៀបការនេះមិនប៉ះពាល់ដល់សង្គម។ ករណីនេះគឺជាសញ្ញាបង្ហាញឲ្យឃើញនៅពេលបច្ចុប្បន្ននេះពីគុណតម្លៃដែលហួសសម័យ»។
នៅក្នុងឆ្នាំ ២០១៩ រដ្ឋ Louisiana បានបង្កើនអាយុកំណត់អប្បបរមារហូតដល់អាយុ ១៦ ឆ្នាំ និងគម្លាតអាយុខុសគ្នារវាងដៃគូជីវិតមិនឲ្យលើសពី ៣ ឆ្នាំ នៅពេលដែលភាគីម្ខាងជាអនីតិជន។
អង្គការ Louisiana Family Forum គឺជាអង្គការមួយដែលប្រឆាំងទៅនឹងការផ្លាស់ប្ដូរនេះ។
អ្នកស្រី Kathleen Benfield នៃអង្គការ Louisiana Family Forum នេះ និយាយថា៖ «នៅក្នុងរដ្ឋ Louisiana យើងឲ្យតម្លៃខ្លាំងលើការរៀបអាពាហ៍ពិពាហ៍ ហើយយើងជឿថាអាពាហ៍ពិពាហ៍គឺជាទំនៀមទម្លាប់ដ៏សំខាន់មួយ។ វាគឺជាគ្រឹះរបស់ប្រទេស វប្បធម៌ និងសង្គម។ វាធានា និងជួយគាំទ្រចិញ្ចឹមបណ្ដុះបណ្ដាលកុមារឲ្យធំលូតលាស់ឡើង ដូច្នេះយើងគិតថា អាពាហ៍ពិពាហ៍គឺជាទំនៀមទម្លាប់ដ៏សំខាន់ខ្លាំងបំផុត។ ការជជែកដេញដោលអំពីអាយុអប្បបរមាដែលអាចរៀបការបានគឺកាន់តែតានតឹងឡើងនៅក្នុងលក្ខណៈដែលហាក់ដូចជាមិនឲ្យតម្លៃដល់អាពាហ៍ពិពាហ៍ដូច្នេះដែរ»។
សមាជិកសភា និងសកម្មជនដែលប្រឆាំងនឹងអាពាហ៍ពិពាហ៍កុមារ បាននិយាយថា បញ្ហានេះគឺមានលក្ខណៈស៊ីជម្រៅជាងការជជែកដេញដោលតែអំពីអ្វីដែលបង្កើតឲ្យមានជាក្រុមគ្រួសារមួយមុខនោះ។
អ្នកស្រី Wintrow ថ្លែងថា៖ «ប្រសិនបើយើងក្រឡេកមើលលើកត្តាប្រជាសាស្ត្រនៃកុមារដែលរៀបការ យើងឃើញថាពួកគេគឺជាជនជាតិស្បែកស និងជាអ្នកស្ថិតក្នុងគ្រួសារដែលមានជីវភាពសមរម្យ។ នេះគឺជាបញ្ហារបស់ពួកយើង ហើយបញ្ហានេះចាក់ឫសចាក់គល់យ៉ាងជ្រៅនៅក្នុងប្រវត្តិរើសអើងជាពិសេសលើស្ត្រីនៅក្នុងសហរដ្ឋអាមេរិក។ ខ្ញុំគិតថា វាសបញ្ជាក់យ៉ាងច្បាស់ថានេះគឺជាការរំលោភសិទ្ធិមនុស្ស ដោយសារតែការស្រាវជ្រាវពីការវិវឌ្ឍខួរក្បាលបានបង្ហាញថា កុមារនៅមិនទាន់អាចធ្វើការសម្រេចចិត្តរយៈពេលវែងនៅក្នុងជីវិតអំពីអនាគតរបស់ពួកគេបាននៅឡើយទេ»។
សម្រាប់អ្នកស្រី Reiss វិញ អ្នកស្រីបានបញ្ជាក់ថា បញ្ហាអាពាហ៍ពិពាហ៍កុមារនេះគឺគួរតែត្រូវហាមឃាត់ទាំងស្រុង ដោយមិនបាច់ធ្វើការជជែកដេញដោលអ្វីទៀតនោះទេ ដោយសារតែរដ្ឋាភិបាលសហរដ្ឋអាមេរិកថ្កោលទោសប្រពៃណីបែបនេះដែលនៅអនុវត្តនៅតាមប្រទេសផ្សេងទៀត ដោយហៅការធ្វើបែបនេះថាជាការរំលោភសិទ្ធិមនុស្ស។
បើយោងតាមទិន្នន័យដែលអង្គការ Unchained At Last ប្រមូលបាន កុមារជាង ២ សែន ៥ ម៉ឺននាក់បានរៀបការពីឆ្នាំ ២០០០ ដល់ឆ្នាំ ២០១០ ដែលភាគច្រើនជាក្មេងស្រីអនីតិជនរៀបការជាមួយនឹងបុរសវ័យចំណាស់៕
ប្រែសម្រួលដោយ ភី សុភាដា
