ពិធីបុណ្យសពផ្លូវរដ្ឋរបស់អតីតប្រធានាធិបតីសហរដ្ឋអាមេរិកលោក Jimmy Carter គ្រោងនឹងប្រារព្ធធ្វើឡើងនៅឯព្រះវិហារ Washington National Cathedral មុននឹងយកទៅបញ្ចុះទៅឯស្រុកកំណើតរបស់លោកក្នុងរដ្ឋ Georgia។
ប្រធានាធិបតីបន្តវេនពីលោក Carter ដែលនៅរស់ មានលោក Bill Clinton លោក George W. Bush លោក Barack Obama លោក Donald Trump និងលោក Joe Biden គ្រោងនឹងចូលរួមក្នុងពិធីបុណ្យសពនេះ ហើយលោក Biden នឹងអានវិយោគកថានៅក្នុងពិធីនោះ។
សាធារណជនដែលកាន់ទុក្ខសពលោក Carter អាចចូលគោរពសពជាលើកចុងក្រោយនៅវិមានសភាដែលសពរបស់លោកត្រូវបានតម្កល់ក្នុងក្ដារមឈូសនៅទីនោះតាំងពីយប់ថ្ងៃអង្គារ។
លោក David Smith សាស្ត្រាចារ្យនៅសាលា Carter School for Peace and Conflict Resolution នៃសាកលវិទ្យាល័យ George Mason ថ្លែងថា លោកអតីតប្រធានាធិបតីពិតជាបានជះឥទ្ធិពលទៅលើការងាររបស់លោក។ លោកបានប្រាប់ VOA ថា លោកបានអញ្ជើញទៅកាន់វិមានសភាដើម្បីគោរពសពរបស់លោក Carter និងដើម្បីផ្ដល់កិត្តិយសសល់កេរ្តិ៍ដំណែលរបស់លោកផងដែរ។
មានពលរដ្ឋអាមេរិកាំងចំនួនត្រឹមតែ ៥០ នាក់ប៉ុណ្ណោះដែលធ្លាប់ត្រូវបានផ្ដល់កិត្តិយសកម្រិតខ្ពស់នេះចាប់តាំងពីឆ្នាំ១៨៥២មក។ មេដឹកនាំសំឡេងភាគច្រើននៃព្រឹទ្ធសភាលោក Jon Thune ថ្លែងពណ៌នាលោក Carter នៅក្នុងពិធីបុណ្យសពកាលពីយប់ថ្ងៃអង្គារថា៖«ជាអតីតទាហានជើងទឹក កសិករដាំសណ្ដែកដី អភិបាលរដ្ឋ Georgia ជាប្រ ធានាធិបតីសហរដ្ឋអាមេរិក ជាគ្រូបង្រៀននៅសាលាថ្ងៃអាទិត្យ ជាជ័យលាភីពាន រង្វាន់ណូបែល ជាអ្នកតស៊ូមតិដើម្បីសន្ដិភាពនិងសិទ្ធិមនុស្ស និងជាអ្នកស្មោះស្ម័គ្រនឹងជនរួមជាតិរបស់លោក»៕
