លោក John Kennedy ដែលជាហិរញ្ញឹកមកពីគណបក្សសាធារណរដ្ឋនៃរដ្ឋ Louisiana បានក្លាយជាសមាជិកព្រឹទ្ធសភាថ្មីប្រចាំរដ្ឋនេះ បន្ទាប់ពីលោកបានយកជ័យជម្នះលើលោក Foster Campbell ដែលជានិយ័តករផ្នែកអគ្គិសនី និងទឹក មកពីរដ្ឋ Louisiana ដែរនោះ។
ជ័យជម្នះរបស់លោក Kennedy កាលពីថ្ងៃសៅរ៍ម្សិលមិញ បានធ្វើឲ្យគណបក្សសាធារណរដ្ឋឈ្នះបានអាសនៈព្រឹទ្ធសភាចុងក្រោយ ដែលធ្វើឲ្យគណបក្សនេះទទួលបានកៅអីចំនួន ៥២ ទល់នឹងកៅអីចំនួន ៤៨ របស់គណបក្សប្រជាធិបតេយ្យ សម្រាប់អាណត្តិថ្មីដែលនឹងចាប់ផ្ដើមនៅខែមករា ឆ្នាំ ២០១៧ ខាងមុខនេះ។
លោកប្រធានាធិបតីជាប់ឆ្នោតសហរដ្ឋអាមេរិក Donald Trump បានបង្ហាញខ្លួននៅក្នុងយុទ្ធនាការបោះឆ្នោតរើសសមាជិកព្រឹទ្ធសភានេះនៅថ្ងៃសុក្រ ដើម្បីគាំទ្រលោក John Kennedy ដែលជាអ្នកទទួលបានការអប់រំមកពីសាកលវិទ្យាល័យ Oxford ចក្រភពអង់គ្លេស។
លោក Kennedy បានព្យាយាម ៣ លើករួចមកហើយ ដើម្បីបានធ្វើជាសមាជិកព្រឹទ្ធសភា ដោយលើកដំបូង លោកគឺជាសមាជិកគណបក្សប្រជាធិបតេយ្យ ហើយ ២ លើកចុងក្រោយនេះ លោកគឺជាសមាជិកគណបក្សសាធារណរដ្ឋ។
លោកគឺជា អ្នកប្រឆាំងចំពោះច្បាប់ធានារ៉ាប់រងសុខភាព Affordable Care Act ដែលជាស្គាល់ជាទូទៅថា Obamacare។ លោកក៏ជាអ្នកគាំទ្រខ្លាំងក្លាមួយរូបផងដែរចំពោះការធ្វើវិសោធនកម្មរដ្ឋធម្មនុញ្ញលើកទី ២ របស់សហរដ្ឋអាមេរិក ទាក់ទិននឹងសិទ្ធិកាន់កាប់អាវុធ ហើយលោកក៏ជាអ្នកតស៊ូមតិមួយរូបផងដែរ ដែលប្រឆាំងចំពោះការរំលូតកូន។
នៅពេលដែលលោក Donald Trump ស្បថចូលកាន់តំណែង គណបក្សសាធារណរដ្ឋនឹងគ្រប់គ្រងអំណាចទាំងពីររបស់ប្រទេស គឺអំណាចនីតិប្រតិបត្តិ និងអំណាចនីតិបញ្ញត្តិ។ លោក Trump ក៏នឹងក្លាយជាអ្នក ដែលតែងតាំងបេក្ខជនសម្រាប់តំណែងជាចៅក្រមនៃតុលាការកំពូលផងដែរ៕
