ភ្ជាប់​ទៅ​គេហទំព័រ​ទាក់ទង

លោក Ben Carson៖ ជន​មូស្លីម​មិន​សម​​​ធ្វើ​ជា​ប្រធានាធិបតី​ទេ


បេក្ខ​ជន​ប្រធានាធិបតី​មក​ពី​គណបក្ស​សាធារណរដ្ឋ​លោក Ben Carson (ខាងឆ្វេង) មើល​​ទៅ​លោក Donald Trump។ លោក Ben Carson និយាយថា ជនមូស្លីម​មិន​សម​ធ្វើជាប្រធានាធិបតី។

កាល​ពី​ថ្ងៃ​អាទិត្យ​លោក​ Ben Carson ​បេក្ខជន​ប្រធានាធិបតី​ខាង​គណបក្ស​សាធារណរដ្ឋ​បាន​និយាយ​ថា ​អ្នកកាន់​សាសនា​ឥស្លាម​មិន​សម​នឹង​កាន់​តំណែង​ជា​ប្រធានាធិបតី​ស.រ.អា​ទេ​ ដោយ​លោក​បាន​ថ្លែង​បង្ហាញ​ហេតុផល​ថា​គោលការណ៍​នៃសាសនា​ឥស្លាម​មិន​ត្រូវ​គ្នា​ជា​មួយ​តម្លៃ​អាមេរិកាំង​ទេ។​

លោក​ Carson ​ដែល​ជា​អ្នកគោរព​គ្រឹស្តសាសនា​ហ្មត់ចត់​ម្នាក់​បាននិយាយ​ប្រាប់​កម្មវិធី Meet the Press ​របស់​ទូរទស្សន៍​អាមេរិកាំង NBC ថា ​«ខ្ញុំ​មិន​គាំទ្រ​ដល់​ការ​ដាក់​អ្នកកាន់​សាសនាឥស្លាម​ម្នាក់​ឲ្យដឹកនាំ​ប្រទេសជាតិ​នេះ​ទេ។​ ខ្ញុំ​មិនយល់​ស្រប​ជាមួយ​ដាច់ខាត​នឹង​ការណ៍នេះ»។

លោក​ Carson បាន​ថ្លែង​ថា ​ជំនឿ​សាសនា​របស់​ប្រធានាធិបតី​ម្នាក់​គួរ​តែ​ជា​បញ្ហា​សំខាន់​មួយ​សម្រាប់​ក្រុម​អ្នក​បោះឆ្នោត​ ហើយ​លោក​ពណ៌នា​ជំនឿ​សាសនា​ ឥស្លាម​ថា ​មិនត្រូវ​គ្នា​ជាមួយ​រដ្ឋធម្មនុញ្ញ​ទេ​ ទោះ​ណា​ជា​លោក​មិន​បាន​និយាយ​ឲ្យ​បាន​ចំៗ​អំពី​អ្វី​ខ្លះ​ ដែល​សាសនា​ឥស្លាម​ប្រឆាំង​នឹង​គោលការណ៍​ក្នុង​រដ្ឋធម្មនុញ្ញ​ក៏​ដោយ។

អត្ថាធិប្បាយ​របស់​លោក Carson ត្រូវ​បាន​ឡើង​នៅ​ពេល​មាន​ការ​បែកបាក់​គ្នា​ដោយសារ​លោក Donald Trump បាន​ប្រកែក​កាល​ពី​សប្តាហ៍​មុន​មិនព្រម ដោះស្រាយ​បញ្ហា​ជាមួយ​បុរស​ម្នាក់​ដែល​នៅក្នុង​ការឃោសនា​បោះឆ្នោត​ក្នុង​រដ្ឋ New Hampshire ​ដែល​បាន​និយាយ​ដោយ​ខុស​ថា​ លោកប្រធានាធិបតី​បារ៉ាក់ អូបាម៉ា​ជា​អ្នកកាន់សាសនា​ឥស្លាម ​ហើយ​ថា​ ក្រុម​អ្នកគោរព​សាសនា​ឥស្លាម​ជា «បញ្ហា​មួយ​នៅ​ក្នុង​ប្រទេសនេះ»៕

XS
SM
MD
LG