ប្រជាជនអ៊ីរ៉ង់បានប្រមូលផ្ដុំគ្នានៅថ្ងៃអង្គារនេះនៅក្នុងទីក្រុង Tabriz ភាគពាយ័ព្យប្រទេសដើម្បីកាន់ទុក្ខប្រធានាធិបតីអ៊ីរ៉ង់លោក Ebrahim Raisi ដែលបានស្លាប់កាលពីថ្ងៃអាទិត្យ នៅក្នុងការធ្លាក់ឧទ្ធម្ភាគចក្រនៅក្នុងតំបន់នោះ។
ហ្វូងមនុស្សដែលប្រមូលផ្ដុំគ្នានៅតាមផ្លូវបានលើកសញ្ញានិងបដា ដែលមានរូបថតលោក Raisi ជាមួយនឹងអ្នកផ្សេងទៀតដែលបានស្លាប់នៅក្នុងឧប្បត្តិហេតុនោះ ដែលក្នុងនោះរួមទាំងរដ្ឋមន្ត្រីការបរទេសអ៊ីរ៉ង់លោក Hossein Amirabdollahian ផងដែរ។
ពិធីបុណ្យសពនេះគឺជាពិធីមួយក្នុងចំណោមពិធីជាច្រើនដែលកំពុងធ្វើឡើងនៅសប្ដាហ៍នេះ នៅពេលដែលអ៊ីរ៉ង់កាន់ទុក្ខ ៥ ថ្ងៃ។
ពិធីនានាក៏ត្រូវបានកំណត់ធ្វើឡើងសម្រាប់ទីក្រុង Qom និងទីក្រុងតេហេរ៉ង់ផងដែរ នៅមុនពិធីបញ្ចុះសពលោក Raisi ចុងក្រោយនៅថ្ងៃព្រហស្បតិ៍ខាងមុខ នៅក្នុងតំបន់ទីក្រុង Mashhad ដែលជាស្រុកកំណើតរបស់លោក។
មន្ត្រីអ៊ីរ៉ង់មិនទាន់បានបញ្ជាក់ជាសាធារណៈនៅឡើយទេអំពីមូលហេតុនៃការធ្លាក់ឧទ្ធម្ភាគចក្រនេះ។ ឧទ្ធម្ភាគចក្រនេះបានធ្លាក់កាលពីថ្ងៃអាទិត្យនៅក្នុងតំបន់ភ្នំមួយកន្លែងក្នុងអំឡុងធាតុអាកាសចុះអ័ព្ទនៅពេលដែលគណៈប្រតិភូអ៊ីរ៉ង់កំពុងធ្វើដំណើរត្រឡប់មកពីចូលរួមពិធីសម្ពោធគម្រោងទំនប់វារីអគ្គិសនីមួយកន្លែងនៅព្រំដែនរវាងអ៊ីរ៉ង់និងអាស៊ែបៃហ្សង់។
អតីតរដ្ឋមន្ត្រីការបរទេសអ៊ីរ៉ង់លោក Mohammad Javad Zarif មានបំណងចង់រិះគន់សហរដ្ឋអាមេរិកនិងទណ្ឌកម្មរបស់អាមេរិកលើអ៊ីរ៉ង់។ លោក Zarif បានប្រាប់ទីភ្នាក់ងារសារព័ត៌មាន AP ថា សហរដ្ឋអាមេរិក «ដាក់ទណ្ឌកម្មលើការលក់យន្តហោះនិងគ្រឿងបន្លាស់យន្តហោះដល់ប្រទេសអ៊ីរ៉ង់ ហើយមិនអនុញ្ញាតឱ្យប្រជាជនអ៊ីរ៉ង់មានហេដ្ឋារចនាសម្ព័ន្ធហោះហើរល្អនោះទេ»។
សហរដ្ឋអាមេរិកបានច្រានចោលការចោទប្រកាន់នេះ ដោយក្រសួងការបរទេសអាមេរិកបានបញ្ជាក់នៅថ្ងៃអង្គារនេះថា អ៊ីរ៉ង់ «បានប្រើយន្តហោះរបស់ខ្លួនដើម្បីដឹកជញ្ជូនឧបករណ៍ទៅគាំទ្រអំពើភេរវកម្ម»។
មេដឹកនាំកំពូលអ៊ីរ៉ង់លោក Ali Khamenei បានតែងតាំងអនុប្រធានាធិបតីអ៊ីរ៉ង់លោក Mohammad Mokhber ជាប្រធានាធិបតីបន្ទាប់ពីលោក Raisi បានស្លាប់។ ការជ្រើសរើសប្រធានាធិបតីថ្មីគ្រោងនឹងធ្វើឡើងក្នុងរង្វង់ ៥០ ថ្ងៃខាងមុខ។
អនុរដ្ឋមន្ត្រីការបរទេសអ៊ីរ៉ង់លោក Ali Bagheri Kani ត្រូវបានតែងតាំងជារដ្ឋមន្ត្រីស្ដីទីនៃក្រសួងការបរទេស៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន AFP និងទីភ្នាក់ងារសារព័ត៌មាន Reuters។
វេទិកាបញ្ចេញមតិ