នៅអំឡុងពេលបុណ្យរ៉ាម៉ាឌន ពលរដ្ឋកាន់សាសនាឥស្លាមនៅជុំវិញពិភពលោកអាចញ៉ាំអាហារបានបន្ទាប់ពីថ្ងៃលិច។ ពួកអ្នកកាន់សាសនាឥស្លាមមានជំនឿថា បុណ្យរ៉ាម៉ាឌនគឺជា ឱកាសមួយ ដែលអាចឲ្យពួកគេអាចចូលទៅជិតព្រះរបស់ពួកគេបានតាមរយៈទង្វើមួយចំនួន ដូចជា ការរៀនបន្ថែមពីជនក្រីក្រជាដើម។
ហេតុដូច្នេះហើយបានជារៀងរាល់ថ្ងៃអង្គារ យុវជនស្ម័គ្រចិត្តមួយក្រុម បានយកពេលសម្រាក Ifta នៅអំឡុងពេលបុណ្យរ៉ាម៉ាឌន ចែកម្ហូបអាហារដល់ពួកជនអនាថាគ្មានផ្ទះសម្បែងក្នុងរដ្ឋធានីវ៉ាស៊ីនតោន។ ពួកអ្នកកាន់សាសនាឥស្លាមវ័យក្មេងទាំងនេះគឺជា សមាជិកនៃអង្គការសប្បុរសធម៌ឥស្លាមដែលរ៉ៃអង្គាសប្រាក់ដើម្បីទិញម្ហូបអាហារចែកឲ្យជនអនាថា។
នៅតែប៉ុន្មានម៉ោងទៀតថ្ងៃនឹងលិច ហើយ Ifta ដែលជាពេលបរិភោគអាហារនឹងចូលមកដល់ ប៉ុន្តែលោក Omer Nassimi និងក្រុមយុវជនស្ម័គ្រចិត្តរបស់លោកមិនបានទៅផ្ទះដើម្បីរៀបចំធ្វើម្ហូបអាហារទេ។ ផ្ទុយទៅវិញពួកគេបានទៅចែកម្ហូបអាហារ និងភេសជ្ជៈនៅតាមសួនច្បារ ក្នុងរដ្ឋធានីវ៉ាស៊ីនតោន។ បេសកកម្មរបស់ពួកគេ គឺចែកម្ហូបអាហារដល់ជនអនាថានៅក្នុងសហគមន៍។
លោក Omer Nassimi អ្នកស័្មគ្រចិត្តនៃអង្គការសាសនាឥស្លាមនៅសហរដ្ឋអាមេរិកបានថ្លែងថា៖ «ទោះបីជាអ្នកនោះមានជាតិសាសន៍អ្វីក៏ដោយ កាន់សាសនាអ្វីក៏ដោយ និងមកពីតំបន់ណាក៏ដោយ សារជាសកលរបស់យើងមានតែមួយគត់គឺ យើងចង់ឲ្យពួកគេមានម្ហូបអាហារគ្រប់គ្រាន់សម្រាប់បរិភោគ»។
ក្រុមយុវជនទាំងនេះគឺជា អ្នកធ្វើការស័្មគ្រចិត្តនៅឯអង្គការសាសនាឥស្លាមនៅសហរដ្ឋអាមេរិកឬ Islamic Relief USA ដែលជាអង្គការមនុស្សធម៌ឥស្លាម។ ឆ្នាំនេះគឺជាឆ្នាំទី៥ហើយ ដែលក្រុមយុវជនស័្មគ្រចិត្តទាំងនេះជួយចែកម្ហូបអាហារដល់ជនអនាថារៀងរាល់ថ្ងៃអង្គារនៅអំឡុងពេលបុណ្យរ៉ាម៉ាឌន។
លោក Zaheen យុវជនស័្មគ្រចិត្តម្នាក់មកពីអង្គការសាសនាឥស្លាមនៅសហរដ្ឋអាមេរិកបានថ្លែងថា «យើងព្យាយាមជួយចែកម្ហូបអាហារដែលយើងបរិភោគនៅអំឡុងពេលសម្រាក iftar ដល់ជនអនាថា។ យើងចែកស៊ាំងវ៉ិច បាយ សាច់អាំងដល់ពួកគេ។ យើងចែករំលែកបទពិសោធន៍ជាមួយអ្នកដែលគ្មានឱកាសអាចបរិភោគអាហារទាំងនេះ»។
នាង Zainab អ្នកស័្មគ្រចិត្តម្នាក់ទៀតមកពីអង្គការសាសនាឥស្លាមនៅសហរដ្ឋអាមេរិកបាននិយាយថា «ខ្ញុំមកជួយចែកម្ហូបអាហារបានពីរសបា្តហ៍ហើយ។ ខ្ញុំមានអារម្មណ៍រីករាយណាស់។ យើងអាចនិយាយជាមួយពួកជនអនាថា និងបានចែកម្ហូបអាហារឲ្យពួកគេ និងបានប្រាប់គេអំពីបុណ្យរ៉ាម៉ាឌន»។
ពួកជនអនាថាដែលបានទទួលម្ហូបអាហារបានយល់អំពីសាររបស់ពួកយុវជនស័្មគ្រចិត្តទាំងនេះនិងមានក្តីរំភើបចំពោះទង្វើនេះ។ លោកRichard Paulដែលជាជនអនាថាម្នាក់បានថ្លែងថា «ខ្ញុំអរគុណណាស់។ ខែនេះជាបុណ្យរ៉ាម៉ាឌន ជាពេលវេលាដែលត្រូវផ្តល់ឲ្យ។ ខ្ញុំគិតថាវាជាទង្វើល្អណាស់»។
លោក Henry ដែលជាជនអនាថាម្នាក់ទៀតបាននិយាយថា «ខ្ញុំសូមអគុណច្រើន ខ្ញុំពិតជារីករាយណាស់ចំពោះទង្វើនេះ»។
ម្ហូបដែលនៅសេសសល់ត្រូវបានចែកជូនដល់ពួកជនអានាថាគ្មានផ្ទះសម្បែង។ ក្រុមយុវជនស័្មគ្រចិត្តធ្វើការរ៉ៃអង្គាសប្រាក់តាមអ៊ិនធឺណិតដើម្បីទិញម្ហូបទាំងនេះ។ ពួកគេនិយាយថាការចែករំលែកម្ហូបអាហារគឺជាការងារមានតម្លៃបំផុត៕
ប្រែសម្រួលដោយ ស៊ូ ពេជ្រចិន្តា
