ផ្នែកផ្សាយជាភាសាកូរ៉េនៃវីអូអេបានរាយការណ៍ថាអាជ្ញាធរប្រទេសកាតា (Qatar) បានបញ្ជូនកម្មករកូរ៉េខាងជើង៩០នាក់ឱ្យវិលត្រឡប់ទៅប្រទេសពួកគេវិញកាលពីសប្តាហ៍មុន នេះបើតាមការនិយាយប្រាប់ឲ្យដឹងដោយប្រភពមួយក្នុងប្រទេសកាតាដែលដឹងច្បាស់លាស់អំពីបញ្ហានេះ។ កាលពីថ្ងៃទី៤ ខែឧសភា ក្រុមហ៊ុនអភិវឌ្ឍន៍ខាងសាងសង់ដែលភាសាអង់គ្លេសហៅថា Construction Development Company បានបញ្ឈប់កម្មករទាំងនេះមិនឱ្យធ្វើការពីព្រោះមានការរំលោភលើបទបញ្ញត្តិការងាររបស់ក្រុមហ៊ុននេះ។ អនុស្សារណៈមួយរបស់ក្រុមហ៊ុននេះដែលវីអូអេបានទទួល បានឲ្យដឹងថាក្រុមអ្នកមើលការខុសត្រូវជនជាតិកូរ៉េខាងជើងបានប្រព្រឹត្តអំពើអមនុស្សធម៌លើក្រុមកម្មករទាំងនេះដែលនាំឱ្យកម្មករម្នាក់ស្លាប់ដែលជាការរំលោភលើបទបញ្ញត្តិការងាររបស់ក្រុមហ៊ុន។អនុស្សារណៈនេះបាននិយាយថា «ក្រុមអ្នកមើលការខុសត្រូវជនជាតិកូរ៉េខាងជើងដែលជាអ្នកទទួលខុសត្រូវដល់សុខុមាលភាពនៃក្រុមកម្មករនៅតែបន្តបង្ខិតបង្ខំកម្មករឱ្យធ្វើការ១២ម៉ោងក្នុងមួយថ្ងៃ។ ម្ហូបអាហារដែលត្រូវផ្តល់ឱ្យនៅកន្លែងធ្វើការរបស់ពួកគេឋិតនៅក្រោមស្តង់ដារ។ ទម្រង់ការខាងសុខភាពនិងខាងសុវត្ថិភាពមិនបានត្រូវពិនិត្យជាទៀងទាត់នោះទេ»៕
ប្រទេសកាតាបញ្ជូនកម្មករកូរ៉េខាងជើង៩០នាក់ឲ្យទៅប្រទេសរបស់គេវិញ
![អ្នករាយការណ៍ពិសេសរបស់អ.ស.ប.ទទួលបន្ទុកសិទ្ធិមនុស្សនៅកូរ៉េខាងជើង Marzuki Darusman បានមានប្រសាសន៍ថាលោកនឹងធ្វើការស៊ើបអង្កេតទៅការចោទប្រកាន់ពីការប្រព្រឹត្តបែបអមនុស្សធម៌មកលើកម្មកររបស់កូរ៉េខាងជើងដែលធ្វើការនៅក្រៅប្រទេស។](https://gdb.voanews.com/f4272be4-5b1b-4222-af82-353d1af69d12_w250_r1_s.jpg)