រដ្ឋាភិបាលកម្ពុជាបានសម្រេចដំឡើងប្រាក់ខែអប្បបរមាដល់១២៨ដុល្លារស.រ.អា.ក្នុងមួយខែជូនដល់កម្មករ ក្នុងពេលដែលក្រុមសហជីពកម្មករចង់បានពី១៤០ដុល្លារដល់១៧៧ដុល្លារ។ ការយល់ព្រមដំឡើងប្រាក់ខែគោលនេះគឺធ្វើតាមការបោះឆ្នោតក្នុងកិច្ចប្រជុំត្រីភាគី។
ក្រសួងការងារនិងបណ្តុះបណ្តាលវិជ្ជាជីវៈបានសម្រេចដំឡើងប្រាក់ឈ្នួលអប្ប បរមាជូនដល់កម្មកររោងចក្រចំនួន១២៨ដុល្លារកាលពីថ្ងៃពុធ ទោះបីជាកម្មករនិង សហជីពនានាទាមទារឲ្យមានការដំឡើងខ្ពស់ជាងនេះដើម្បីឲ្យកម្មកររស់នៅបាន ដោយជីវភាពសមរម្យក្តី។
សេចក្តីប្រកាសរបស់លោករដ្ឋមន្ត្រីអ៊ិត សំហេងនៃក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ឲ្យដឹងថា ប្រាក់ឈ្នួលអប្បបរមាសម្រាប់កម្មករនិយោជិតផ្នែកវាយនភណ្ឌ កាត់ដេរ និងផលិតស្បែកជើងសម្រាប់ឆ្នាំ២០១៥ ត្រូវបានកំណត់ជាផ្លូវការនូវទឹកប្រាក់ចំនួន១២៨ដុល្លារអាមេរិកក្នុងមួយខែ»។
សេចក្តីប្រកាសដដែលបានបញ្ជាក់ថា ចំនួនទឹកប្រាក់នេះគឺឡើង៥ដុល្លារពីចំនួន១២៣ដុល្លារ ដែលត្រូវគណៈកម្មការប្រឹក្សាការងារបានស្នើ។ ក្រៅពីនេះ សេចក្តី ប្រកាសនេះបានបញ្ជាក់ថា កម្មករនិយោជិតសាកល្បងការងារគឺត្រូវកំណត់ប្រាក់ខែត្រឹមចំនួន១២៣ដុល្លារស.រ.អា. ក្នុងរយៈពេលសាកល្បង មុនពេលទទួលបាន ១២៨ដុល្លារជាប្រាក់ខែពេញ។
ទោះជាយ៉ាងណាក៏ដោយ ការកំណត់ប្រាក់ខែគោល ឬប្រាក់ខែអប្បបរមាជូន កម្មកររោងចក្រប្រមាណ៧០ម៉ឺននាក់ក្នុងប្រទេសកម្ពុជានេះ ត្រូវមេដឹកនាំ សហជីពដែលធ្លាប់ធ្វើបាតុកម្មតវ៉ាជាច្រើនលើកនោះ ចាត់ទុកថា ជាចំនួនទាបនៅឡើយ ដែលពិបាកនឹងទទួលយកបានសម្រាប់សហជីពនិងកម្មករ។
លោករ៉ុង ឈុន ប្រធានសហភាពសហជីពកម្ពុជា បានអះអាងថា ការដំឡើង ប្រាក់ខែគោលត្រឹម១២៨ដុល្លារនេះជាចំនួនតិចតួច បើធៀបនឹងការទាមទាររបស់កម្មករឲ្យមានជីវភាពសមរម្យ។
«ក្នុងនាមយើងជាសហភាពសហជីពក៏ដូចជាសហជីព យើងមិនអាចទទួលយក បានទេក្នុងការដំឡើងប៉ុណ្ណឹង។ យើងឃើញថា នៅមានគម្លាត។ ហើយមិនមែន ត្រឹមយើងជាថ្នាក់ដឹកនាំសហភាពសហជីព ឬមួយសហព័ន្ធទេ សូម្បីតែសមាជិក សមាជិការកម្មករកម្មការិនីនៅតាមបណ្តារោងចក្រហ្នឹងក៏គាត់ឆ្លើយតបមកវិញភ្លាមៗ។ គាត់បានស្នើឲ្យយើង ថ្នាក់ដឹកនាំថ្នាក់ជាតិហ្នឹង កោះប្រជុំជជែកគ្នាក្នុង គម្រោងធ្វើការទាមទារបន្តទៅទៀត»។
ក្រុមមេដឹកនាំសហជីពគ្រោងនឹងជួបប្រជុំគ្នានៅថ្ងៃស្អែក និងសប្តាហ៍ខាងមុខ ដើម្បីកំណត់ថា ត្រូវទទួលយក ឬក៏រៀបចំការតវ៉ាយ៉ាងណាទៀត។
លោកអាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (C-CAWDU) បានអះអាងថា ក្នុងចំណោមកម្មករ ការដំឡើងប្រាក់ខែគោលនេះគឺមានការគាំទ្រតិចតួច តែភាគច្រើនមិនគាំទ្រទេ ដោយសារការដំឡើងប្រាក់ខែនេះមានចំនួនតិចតួចពេក ដែលតម្រូវឲ្យមានកិច្ចប្រជុំសហជីព។
«សកម្មជន(សហជីព) ខ្ញុំជាង១០០ក្រុមហ៊ុននឹងធ្វើការប្រជុំនៅចុងសប្តាហ៍នេះ ហើយយើងនឹងប្រជុំជាមួយនឹងសហជីពផ្សេងៗទៀត ក្នុងចំណោមសហជីព ទាំង៩ក្នុងកិច្ចចរចាហ្នឹង ដើម្បីសម្រេចចុងក្រោយ ថាតើត្រូវទទួលយកឬក៏ត្រូវបន្តធ្វើការតវ៉ាទៀត»។
ក្រុមមេដឹកនាំសហជីពបានអះអាងថា ក្រុមហ៊ុនគួរកាត់បន្ថយចំណាយដល់ ស្ថាប័នរដ្ឋដែលគ្មានតម្លាភាពនោះ ហើយបង្វែលុយទាំងនោះមកផ្តល់ជូនកម្មករវិញ។ ហើយក្រុមសហជីពក្រៅប្រទេសក៏មានក្តីបារម្ភពីការដំឡើងប្រាក់ខែគោល ដល់កម្មករនេះដែរ។
ទោះជាយ៉ាងណាក៏ដោយ សេចក្តីប្រកាសព័ត៌មានរបស់ក្រសួងការងារបានបញ្ជាក់ថា ការសម្រេចដំឡើងប្រាក់ខែគោលដល់១២៨ដុល្លារស.រ.អា.នេះគឺធ្វើ តាមរយៈការបោះឆ្នោត ក្នុងចំណោមភាគីនិយោជក និងតំណាងកម្មករគឺសហ ជីព ហើយនឹងតំណាងរដ្ឋាភិបាល ដែលសម្លេងច្រើនលើសលប់នោះគឺគាំទ្រ ប្រាក់ឈ្នួលកម្មករអប្បបរមាចំនួន១២៨ដុល្លារ ដែលក្រុមសហជីព និងកម្មករ អះអាងថា ជាប្រាក់ឈ្នួលដែលមិនអាចធ្វើឲ្យកម្មកររស់នៅក្នុងជីវភាពសមរម្យ និងមិនសមាមាត្រទៅនឹងទំនិញទីផ្សារ៕
