លោក Vladimir Putin ប្រធានាធិបតីរុស្ស៊ី និងលោក Volodymyr Zelenskiy ប្រធានាធិបតីអ៊ុយក្រែនកំពុងជួបគ្នាលើកដំបូងនៅទីក្រុងប៉ារីសសម្រាប់ការពិភាក្សាដែលគេទន្ទឹងរង់ចាំជាយូរមកហើយ ស្តីពីការដោះស្រាយជម្លោះយោធានៅភាគខាងកើតនៃប្រទេសអ៊ុយក្រែនដែលបានបណ្តាលឲ្យមនុស្សជាង១ម៉ឺន៣ពាន់នាក់ស្លាប់ ចាប់តាំងពីឆ្នាំ២០១៤។
បន្ទាប់ពីកិច្ចប្រជុំទ្វេភាគីជាបន្តបន្ទាប់ នៅវិមាន Elysee នាថ្ងៃទី៩ ខែធ្នូ លោកពូទីន និងលោក Zelenskiy បានអង្គុយរួមជាមួយប្រធានាធិបតីបារាំងលោក Emmanuel Macron និងអធិការបតីអាល្លឺម៉ង់លោកស្រី Angela Merkel។ អ្នកដឹកនាំបានចូលក្នុងបន្ទប់ដោយមិនញញឹមហើយនិយាយរកគ្នាតិចតួច។ ពួកគេមិនបានចាប់ដៃគ្នាឲ្យអ្នកកាសែតថតរូបទេ។ កិច្ចពិភាក្សាដែលមាន៤ភាគីដែលគេហៅថាជំនួប Normandy Format នេះគឺជាលើកដំបូងដែលមេដឹកនាំអ៊ុយក្រែននិងរុស្ស៊ីបានជួបគ្នា តាំងពីឆ្នាំ២០១៦ និងជាជំនួបលើកដំបូងមិនធ្លាប់មានរវាងលោកពូទីន និងលោក Zelenskiy ដែលបានជាប់ឆ្នោតកាលពីខែមេសា។
តុលាការព្រហ្មទណ្ឌអន្តរជាតិ (ICC) បានចេញសេចក្តីសម្រេចកាលពីខែវិច្ឆិកាឆ្នាំ២០១៦ថា សង្គ្រាមនៅភាគខាងកើតអ៊ុយក្រែនគឺជា «ជម្លោះប្រដាប់អាវុធអន្តរជាតិរវាងអ៊ុយក្រែននិងសហព័ន្ធរុស្ស៊ី»។
គ្រប់ភាគីទាំងអស់បានខិតខំប្រឹងប្រែងដើម្បីធ្វើការរំពឹងទុកកម្រិតមធ្យមក្នុងការឈានទៅរកកិច្ចប្រជុំកំពូល។ រដ្ឋាភិបាលវិមានក្រឹមឡាំងចង់រក្សាឥទិ្ធពលច្រើនដែលអាចធ្វើទៅបានលើរដ្ឋាភិបាលក្រុង Kyiv ដោយប្រើដីដែលកាន់កាប់ដោយក្រុមបំបែកខ្លួនដែលរុស្ស៊ីគាំទ្រនៅ Donbas។ ប្រធានាធិបតីអ៊ុយក្រែនត្រូវតែថ្លឹងថ្លែងផលប្រយោជន៍នៃវឌ្ឍនភាពឆ្ពោះទៅរកសន្តិភាព និងហានិភ័យដែលអាចកើតមានដោយគ្រោះមហន្តរាយដែលត្រូវបានគេមើលឃើញថា ជាការចុះចាញ់រដ្ឋាភិបាលក្រុងមូស្គូ៕
