ប្រធានាធិបតី Francois Hollande នៃប្រទេសបារាំង បានជួបជាមួយប្រធានាធិបតីរុស្ស៊ី Vladimir Putin ក្នុងអំឡុងពេលនៃដំណើរបំពេញទស្សនៈកិច្ចដ៏សំខាន់មួយទៅកាន់ទីក្រុងម៉ូស្គូកាលពីថ្ងៃសៅរ៍ ជាការសម្តែងសុច្ឆន្ទៈដ៏កម្រមួយនៅពេលដែលមានការតានតឹងខ្លាំងលើជម្លោះដែលកំពុងបន្តមានឡើងនៅក្នុងតំបន់ខាងកើតនៃប្រទេសអ៊ុយក្រែន ហើយនិងការសម្រេចចិត្តរបស់បារាំងបញ្ឈប់ការប្រគល់នាវាចំបាំង២គ្រឿងទៅឲ្យរដ្ឋាភិបាលទីក្រុងម៉ូស្គូ។
ការឈប់សំចតដោយគ្មានការរំពឹងទុកមួយនៅក្នុងទីក្រុងម៉ូស្គូដោយមេដឹកនាំបារាំង នៅពេលដែលលោក ធ្វើដំណើរចេញពីប្រទេស Kazakhstan វិលត្រឡប់ទៅកាន់ទីក្រុងប៉ារីសវិញ បានធ្វើឲ្យលោកក្លាយជាប្រមុខរដ្ឋតែមួយគត់មកពីអំណាចសំខាន់ៗនៃប្រទេសលោកខាងលិចទៅបំពេញទស្សនៈកិច្ចប្រទេសរុស្ស៊ីចាប់តាំងពីប្រទេសនេះ យកឧបទ្វីបCrimea នៃប្រទេសអ៊ុយក្រែនធ្វើជាឧបសម្ព័ន្ធរបស់ខ្លួនចាប់តាំងពីខែមិនាមក។
ដំណើរបំពេញទស្សនៈកិច្ច ដែលផ្ទុយពិធីការទាំងស្រុង បានធ្វើឡើងនៅចំណតអាកាសយានទីក្រុងម៉ូស្គូជាជាងនៅមហាសាលរបស់វិមានទីក្រុងក្រែមឡាំងឬក៏គេហដ្ឋានរបស់លោក Putin កើតមានឡើងនៅពេលដែលសេដ្ឋកិច្ចរបស់រុស្ស៊ី ឆ្ពោះទៅកាន់ការមិនរីកចម្រើនជាលើកទីមួយនៅក្នុងរយៈពេល៦ឆ្នាំនេះ ហើយរដ្ឋាភិបាលទីក្រុងម៉ូស្គូ បានឯកោជាងពេលណាៗទាំងអស់ចំពោះតួនាទីរបស់ខ្លួននៅក្នុងប្រទេសអ៊ុយក្រែន។
ប្រធានាធិបតី Putin នៃប្រទេសរុស្ស៊ី និយាយនៅក្នុងកំណត់សម្គាល់តាមទូរទស្សន៍បន្ទាប់ពីជំនួបជាមួយប្រធានាធិបតីបារាំង Hollande ថា ខ្ញុំ មានសេចក្តីសង្ឃឹមយ៉ាងខ្លាំងថា ក្នុងពេលអនាគតឆាប់ៗនេះ យើងនឹងមានកិច្ចព្រមព្រៀងឈប់បាញ់គ្នាមួយ៕
