ការិយាល័យរបស់ប្រធានាធិបតីបារាំងប្រាប់ឲ្យដឹងថា មេដឹកនាំនៃប្រទេសអ៊ុយក្រែននិងរុស្ស៊ី បានព្រមព្រៀងធ្វើការឆ្ពោះទៅកាន់បទឈប់បាញ់គ្នាជាទ្វេភាគីរវាងរដ្ឋាភិបាលទីក្រុងគាវនិងកងកម្លាំងដែលលម្អៀងទៅប្រទេសរុស្ស៊ី នៅពេលដែលការឈប់បាញ់គ្នាជាឯកតោភាគី ដែលបានប្រកាសដោយរដ្ឋាភិបាលទីក្រុងគាវនៅថ្ងៃទី២០ ខែមិថុនា នឹងត្រូវផុតកំណត់។
សេចក្តីថ្លែងការណ៍ពីការិយាល័យប្រធានាធិបតីបារាំង Francois Hollande បានកើតមានឡើងនៅក្នុងការហៅទូរស័ព្ទរវាងមេដឹកនាំទាំង៤កាលពីព្រឹកថ្ងៃច័ន្ទរវាងប្រធានាធិបតីអ៊ុយក្រែន Petro Poroshenko លោកស្រីអធិការបតីអាល្លឺម៉ង់ Angela Merkel ប្រធានាធិបតីរុស្ស៊ី Vladimir Putin និងប្រធានាធិបតីបារាំង Francois Hollande។ សេចក្តីថ្លែងការណ៍នោះបានប្រាប់ឲ្យដឹងថា លោក Poroshenko និងលោក Putin ក៏បានព្រមព្រៀងគ្នាបង្កើតការត្រួតត្រាព្រំដែនឲ្យមានប្រសិទ្ធភាពហើយនឹងពិភាក្សាពីការដោះលែងពួកអ្នកទោស។
រដ្ឋាភិបាលទីក្រុងម៉ូស្គូនិយាយថា លោក Putin បានសង្កត់ពីសារៈសំខាន់នៃការបន្តការឈប់បាញ់គ្នាហើយនឹងបង្កើតយន្តការមួយអាចទុកចិត្តបានដើម្បីគ្រប់គ្រងការឈប់បាញ់គ្នា ដោយមានអង្គការសម្រាប់កិច្ចសហប្រតិបត្តិការក្នុងអឺរ៉ុបដើរតួនាទីដ៏សំខាន់៕
