ការផ្តោតការយកចិត្តទុកដាក់របស់ប្រធានាធិបតីសហរដ្ឋអាមេរិក លោក Donald Trump កាលពីថ្ងៃចន្ទ ទី១ ខែមិថុនា នៅតែមានទៅលើការបោះឆ្នោតប្រធានាធិបតីក្នុងពេលប្រាំខែទៀត ទោះណាជាទីក្រុងរាប់សិបនៅក្នុងប្រទេសអាមេរិកបានបោសសម្អាតកម្ទេចកម្ទីពីយប់ទី៦ នៃចលាចលដែលបណ្តាលមកពីបាតុកម្មប្រឆាំងនឹងការស្លាប់បុរសស្បែកខ្មៅម្នាក់ក្នុងសមត្ថកិច្ចរបស់ប៉ូលិសស្បែកសម្នាក់នៅក្នុងទីក្រុង Minneapolis នាប៉ែកពាក់កណ្តាលខាងលិចសហរដ្ឋអាមេរិកក៏ដោយ។
លោក Trump បានសរសេរសារ Twitter មួយថា៖ «ថ្ងៃទី៣ ខែវិច្ឆិកា»ដោយលោកនិយាយយោងដល់ថ្ងៃបោះឆ្នោតដែលលោកឈរឈ្មោះជាថ្មីសម្រាប់អាណត្តិទីពីរ រយៈពេលបួនឆ្នាំ នៅក្នុងសេតវិមានប្រឆាំងនឹងលោកអតីតអនុប្រធានាធិបតី Joe Biden។
លោក Biden នៃគណបក្សប្រជាធិបតេយ្យ នាំមុខលោក ត្រាំ នៃគណបក្សសាធារណរដ្ឋ នៅក្នុងការស្ទង់មតិជាតិទាំងអស់៤០ នៃក្រុមអ្នកបោះឆ្នោតអាមេរិកាំង។ ការណ៍នេះញ៉ាំងឲ្យលោក ត្រាំ ធ្វើការវាយប្រហារជាច្រើនតាម Twitter។
លោក Trump បាន tweet អំពីពួកបាតុករដែលបានត្រូវចាប់ខ្លួនកាលពីសប្តាហ៍ចុងក្រោយនៃខែឧសភា ថា៖ «ពួកមនុស្សរបស់ Joe Biden ដែលងងុយដេកជាពួកនិយមជ្រុលខាងឆ្វេងដែលព្យាយាមដោះលែងពួកអនាធិបតេយ្យនិយមឱ្យចេញពីគុកហើយប្រហែលជាចង់ធ្វើរឿងផ្សេងទៀត។»
លោក Trump បាននិយាយថា៖ «Joe មិនដឹងអ្វីទេអំពីការណ៍នេះ គាត់គ្មានដឹងតម្រុយអ្វីសោះក៏ប៉ុន្តែពួកនិយមជ្រុលខាងឆ្វេងទាំងនេះនឹងមានអំណាចពិតប្រាកដ មិនមែន Joe មានអំណាចទេ។ ពួកជនទាំងនេះនឹងធ្វើសេចក្តីសម្រេចទាំងអស់! ពួកគេនឹងបង្កើនពន្ធដារច្រើនសម្រាប់មនុស្សគ្រាប់គ្នា!»
ឆ្លើយតបទៅនឹងការចោទប្រកាន់របស់លោក Trump លោក Biden ដែលបានមានប្រសាសន៍ពីក្រុង Wilmington រដ្ឋ Delaware បានប្តេជ្ញាថានឹងនឹងដោះស្រាយបញ្ហារើសអើងខាងពូជសាសន៍ជាស្ថាប័ននៅក្នុងរយៈពេល១០០ថ្ងៃដំបូងប្រសិនបើលោកជាប់ឆ្នោតជាប្រធានាធិបតីអាមេរិកាំង ហើយលោកនឹងបង្កើតស្ថាប័នមួយដើម្បីឃ្លាំមើលពួកប៉ូលិស។
លោក Biden ដែលឋិតនៅឯផ្ទះលោកក្នុងរដ្ឋ Delaware នៅក្នុងពេលមានវិបត្តិវីរុសកូរ៉ូណា បានប្រឹងប្រែងឱ្យគេឮការយល់ឃើញរបស់លោកនៅពីលើស្នូរសន្ធឹកនៃការជជែកដេញដោលគ្នាជាសាធារណៈនៅក្នុងរដ្ឋធានី Washington។ ក៏ប៉ុន្តែលោកបានហៅការបោះឆ្នោតក្នុងពេលខាងមុខនេះថាជាការប្រយុទ្ធមួយដើម្បីព្រលឹងរបស់ប្រទេសជាតិ ដោយសង្ឃឹមថាធ្វើឱ្យមានការផ្ទុយគ្នារវាងរបៀបដោះស្រាយស្ងាត់ស្ងៀមរបស់លោកដោយថ្លែងបញ្ចេញយោបល់ជាសាធារណៈទៅនឹងការវាយប្រហារចាក់ដោតរបស់លោក Trump ទៅលើពួកសត្រូវរបស់លោក។
ដោយមានការផ្តល់សារៈសំខាន់ខាងពូជសាសន៍ដល់ការស្លាប់លោក George Floyd ដែលជាបុរសអាមេរិកាំងដើមកំណើតអាហ្វ្រិក អាយុ៤៦ឆ្នាំដែលប៉ូលិសស្បែកសម្នាក់បានយកជង្គង់សង្កត់កលោកនៅពេលលោកប្រឹងដកដង្ហើម លោក Biden បានចាកចេញពីផ្ទះលោកទៅជួបពួកមេដឹកនាំស្បែកខ្មៅក្នុងមូលដ្ឋានប្រមាណ១២នាក់នៅក្នុងក្រុងកំណើតរបស់លោក។ បន្ទាប់មក លោកបានគ្រោងធ្វើការប្រជុំគ្នាតាមវីដេអូជាមួយពួកអភិបាលក្រុង Los Angeles, Atlanta, Chicago និងក្រុង St. Paul រដ្ឋ Minnesota។
ដោយនិយាយអំពីទំនាក់ទំនងខាងពូជសាសន៍នៅក្នុងសហរដ្ឋអាមេរិក លោក Biden បានមានប្រសាសន៍ថា៖ « ការស្អប់គ្រាន់តែលាក់ខ្លួនប៉ុណ្ណោះ តែវាមិនទៅណាទេ។នៅពេលណាលោកអ្នកមាននរណាម្នាក់កាន់អំណាចដែលបញ្ចូលអុកស៊ីសែនទៅក្នុងសម្អប់នៅក្រោមផ្ទាំងថ្ម សម្អប់ចេញពីក្រោមផ្ទាំងថ្មទាំងនេះ។»
ពួកជំនួយការលោក Biden បានកត់សម្កាល់ថា ទោះជាលោកមិនបានចេញបង្ហាញមុខតាមទូរទស្សន៍កាលពីដំណាច់សប្តាហ៍ក៏ដោយ ក៏លោកបានមានប្រសាសន៍ អំពីការស្លាប់របស់លោក Floyd មុនលោក Trump ហើយបានសម្តែងចិត្តអាណិតអាសូរដល់ក្រុមបាតុករថែមទៀតផង។
លោក Trump បានភ្ជាប់លោក Biden ដែលបានបម្រើការ៨ឆ្នាំជាអនុប្រធានាធិបតីរបស់លោកអតីតប្រធានាធិបតី Barack Obama ទៅនឹងពួកជនជ្រុលនិយមនៅក្នុងបាតុកម្មប្រឆាំងនឹងសកម្មភាពប៉ូលិសកាលពីមួយសប្តាហ៍មុននេះដែលបានបណ្តាលឱ្យលោក Floyd បាត់បង់ជីវិត។
លោក Floyd បានត្រូវដាក់ឱ្យដេកផ្កាប់មុខនៅតាមដងផ្លូវក្នុងក្រុង Minneapolis ដោយប៉ូលិសឈ្មោះ Derek Chauvin ដែលបានដាក់ជង្គង់សង្កត់កលោកជាង ៨ នាទី ទោះណាជាលោកបាននិយាយប្រាប់ច្រើនដងថាលោកមិនអាចដកដង្ហើមបានក៏ដោយ។ Chauvin បានត្រូវចោទប្រកាន់ពីបទឃាតកម្មកម្រិតទីបីនិងការសម្លាប់មនុស្សកម្រិតទីពីរនៅក្នុងករណីនេះ។
លោក Trump បាន tweet អំពីក្រុមបាតុករថា៖ « ពួកអភិបាលក្រុងនិងពួកអភិបាលរដ្ឋខាងគណបក្សប្រជាធិបតេយ្យត្រូវតែតឹងរ៉ឹងឡើង។ពួកមនុស្សទាំងនេះជាពួកអនាធិបតេយ្យនិយម។កោះហៅពួកឆ្មាំជាតិរបស់យើងនៅពេលឥឡូវនេះទៅ។ពិភពលោកកំពុងក្រឡេកមើលនិងសើចចំអកឱ្យលោកអ្នកនិង Joe ដែលងងុយដេក។តើនេះជាអ្វីដែលប្រទេសអាមេរិកចង់បានឬទេ? ទេ!»
នៅក្នុង tweet មួយទៀតកាលពីថ្ងៃអាទិត្យទី៣១ឧសភា លោក Trump បាននិយាយថា « ត្រូវធ្វើឱ្យមានច្បាប់និងរបៀបរៀបរយនៅក្នុងក្រុង Philadelphia នៅពេលនេះ! ពួកបាតុករកំពុងលួចទំនិញក្នុងហាងលក់ឥវ៉ាន់។ត្រូវតែកោះហៅកងឆ្មាំជាតិដ៏អស្ចារ្យរបស់យើងដូចដែលពួកគេបានធ្វើកាលពីយប់មិញនៅក្នុងក្រុង Minneapolis។ តើនេះជាអ្វីដែលពួកអ្នកបោះឆ្នោតចង់ឱ្យមានជាមួយ Joe ដែលងុយដេកឬទេ? ពួកប្រជាធិបតេយ្យទាំងនេះ!»
លោក Trump ក៏បានបន្ទោសទីដៅនៃការវាយប្រហារមួយទៀតរបស់លោកគឺបណ្តាញព័ត៌មានជាតិថាបានឧបត្ថម្ភផ្ចុងផ្តើមឱ្យមានចលាចលស៊ីវិលនៅក្នុងស.រ.អ.។
លោកបាននិយាយថា៖ « បណ្តាញព័ត៌មាននិយាយមិនពិតកំពុងធ្វើអ្វីៗទាំងអស់ដើម្បីបញ្ឆេះសម្អប់និងអនាធិបតេយ្យ។ ដរាបណាមនុស្សគ្រប់គ្នាយល់អំពីអ្វីដែលពួកគេកំពុងធ្វើគឺថាជាព័ត៌មានក្លែងក្លាយ ហើយពួកគេជាពួកមនុស្សអាក្រក់មានរបៀបវារៈមិនត្រឹមត្រូវ ហើយយើងអាចធ្វើការបានដោយងាយតាមរយៈពួកគេទៅកាន់ភាពអស្ចារ្យ!»
លោក Trump បានចោទប្រកាន់ថាមាន៖ «ការផ្សាយព័ត៌មានមិនពិត»ច្រើនថែមទៀតពីបណ្ដាញព័ត៌មាន CNN បណ្ដាញព័ត៌មាន MSDNC កាសែត New York Times និងសារព័ត៌មាន Washington Post គឺច្រើនជាងមកពីប្រទេសក្រៅ រួមបញ្ចូលគ្នាទៅទៀត។ ព័ត៌មានក្លែងក្លាយជាសត្រូវរបស់ប្រជាពលរដ្ឋ!»៕
ប្រែសម្រួលដោយលោក ឈឹម សុមេធ
