អតីតអនុប្រធានាធិបតីសហរដ្ឋអាមេរិក លោក Joe Biden បានឈ្នះចំនួនប្រតិភូប៉ុន្មាននាក់ចុងក្រោយ ដែលលោកត្រូវការដើម្បីទទួលបានការតែងតាំងជាបេក្ខជនប្រធានាធិបតីខាងគណបក្សប្រជាធិបតេយ្យ ស្របពេលដែលរដ្ឋមួយចំនួនដែលបានរៀបចំការបោះឆ្នោតជ្រើសតាំងបេក្ខជនប្រធានាធិបតីកាលពីថ្ងៃអង្គារកន្លងមកនេះ នៅបន្តរាប់សន្លឹកឆ្នោតដែលផ្ញើតាមប្រៃសណីយ៍។
ឥឡូវនេះ លោក Biden ទទួលបានប្រតិភូសរុបចំនួន ២.០០០ នាក់ លើសពីចំនួនប្រតិភូចំនួន ១.៩៩១ នាក់ ដែលត្រូវការដើម្បីឈ្នះបានការតែងតាំងជាបេក្ខជនប្រធានាធិបតីនៅឯសន្និបាតជាតិគណបក្សប្រជាធិបតេយ្យនៅរដូវក្ដៅខាងមុខ។
លោក Biden បានក្លាយជាអ្នកដែលគេសន្មតថាជាបេក្ខជនប្រធានាធិបតីខាងគណបក្សប្រជាធិបតេយ្យតាំងពីដើមខែមេសាមក នៅពេលដែលសមាជិកព្រឹទ្ធសភាប្រចាំរដ្ឋ Vermont លោក Bernie Sanders បានបោះបង់ចោលការប្រកួត។
ប៉ុន្តែ លោក Biden បានចំណាយពេលអស់ ២ ខែ ក្រោយមកទៀត ទើបទទួលបានចំនួនប្រតិភូគ្រប់គ្រាន់ដើម្បីអាចក្លាយជាបេក្ខជនប្រធានាធិបតីផ្លូវការខាងគណបក្សប្រជាធិបតេយ្យ ក្រោយពីរដ្ឋចំនួន ១៥ និងដែនដីរបស់សហរដ្ឋអាមេរិកចំនួន ២ បានផ្អាកការបោះឆ្នោតជ្រើសតាំងនេះ ដោយសារតែបញ្ហាឆ្លងរាលដាលនៃជំងឺកូវីដ១៩៕
