អ្នកគាំទ្ររបស់លោកប្រធានាធិបតីប្រេស៊ីល បានធ្វើការតវ៉ានៅក្នុងរដ្ឋធានីប្រាស៊ីលីយ៉ា (Brasilia) ប្រឆាំងទៅនឹងគោលការណ៍ណែនាំរបស់រដ្ឋខ្លះឲ្យពលរដ្ឋនៅផ្ទះ ដើម្បីទប់ស្កាត់ការរាតត្បាតនៃវីរុសកូរ៉ូណាប្រភេទថ្មី។
លោកប្រធានាធិបតី Jair Bolsonaro បានប្រឆាំងម្តងហើយម្តងទៀតទៅនឹងការអះអាងអំពីហានិភ័យខ្ពស់បង្កឡើងដោយវីរុសរាតត្បាតនេះ និងវិធានការបិទសកម្មភាពសង្គមនានា ដោយលោកថ្លែងថា ពលរដ្ឋប្រេស៊ីលចង់ទៅធ្វើការវិញ ហើយការបិទតំបន់របស់អភិបាលរដ្ឋនឹងអាចនាំទៅដល់គ្រោះអត់ឃ្លាន ការបាត់បង់ការងារនិងទុក្ខវេទនារបស់ពលរដ្ឋ។
លោកប្រធានាធិបតី Bolsonaro ទើបបានដកប្រធាននគរបាលសហព័ន្ធចេញពីតំណែង ដោយបាននាំឲ្យរដ្ឋមន្ត្រីយុត្តិធម៌និងសន្តិសុខសាធាណៈលោក Sérgio Moro លាលែងពីតំណែង ក្នុងអំឡុងពេលដែលមានរឿងចម្រូងចម្រាស់ច្រើនទាក់ទងនឹងរបៀបគ្រប់គ្រងប្រទេសក្នុងពេលមានវិបត្តិកូវីដ១៩នេះ។ លោកប្រធានាធិបតីកំពុងស្នើឈ្មោះតែងតាំងប្រធាននគរបាលថ្មី ប៉ុន្តែរដ្ឋសភាប្រេស៊ីលមិនយល់ព្រម ដែលធ្វើឲ្យលោក ប្រធានាធិបតីចោទប្រកាន់រដ្ឋសភាថាបានជ្រៀតជ្រែកអំណាច។
លោក Bolsonaro មិនបានពាក់ម៉ាស់មុខទេ នៅពេលលោកជួបអ្នកគាំទ្រដែលត្រូវបានគេអនុញ្ញាតឲ្យចូលក្នុងបរិវេណវិមានប្រធានាធិបតី។
បាតុកម្មកាលពីថ្ងៃអាទិត្យកើតមានឡើង ខណៈដែលប្រទេសប្រស៊ីលហាក់កំពុងឈានទៅដល់វិបត្តិសុខាភិបាលសាធារណៈធ្ងន់ធ្ងរមួយព្រមជាមួយការធ្លាក់ចុះនៃសេដ្ឋកិច្ច៕
