ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ប្រធានាធិបតី​ប្រេស៊ីល​ដក​រដ្ឋមន្ត្រី​សុខាភិបាល​ចេញ​ពី​តំណែង​ ក្រោយ​ការ​ខ្វែង​គំនិត​គ្នា​ពី​ការ​ឆ្លើយ​តប​នឹង​ជំងឺ​កូវីដ១៩


លោក Jair Bolsonaro (ឆ្វេង) ប្រធានាធិបតីប្រេស៊ីល និងលោក Nelson Teich រដ្ឋមន្ត្រីក្រសួងសុខាភិបាលថ្មីរបស់ប្រេស៊ីល នៅក្នុងសន្និសីទសារព័ត៌មានមួយ នៅទីក្រុង Brasilia ប្រេស៊ីល ថ្ងៃទី១៦ ខែមេសា ឆ្នាំ២០២០។

ប្រធានាធិបតី​ប្រេស៊ីល​លោក Jair Bolsonaro កាល​ពី​ថ្ងៃ​ព្រហស្បតិ៍​បាន​បណ្តេញ​រដ្ឋមន្ត្រី​សុខាភិបាល​លោក Luiz Henrique Mandetta ពី​តំណែង​ចំពោះ​រឿង​ខ្វែង​គំនិត​គ្នា​អំពី​របៀប​ឆ្លើយ​តប​ទៅ​នឹង​ការ​រាតត្បាត​នៃ​ជំងឺ​កូវីដ១៩។​

លោក​ប្រធានាធិបតី Bolsonaro បាន​អះអាង​ថា ការ​បិទ​សកម្មភាព​ក្នុង​ប្រទេស​និង​រឹតត្បឹតអាជីកម្ម​នឹង​ធ្វើ​ឲ្យ​ប៉ះពាល់​ធ្ងន់ធ្ងរ​ដល់​សេដ្ឋកិច្ច​ជាតិ។​

ការ​បណ្តេញ​លោក Mandetta ចេញ​ពី​តំណែង​កើត​មាន​ឡើង​ក្រោយ​ពី​អភិបាល​រដ្ឋ São Paulo គឺ​លោក João Doria​ បាន​បង្កើន​សន្តិសុខ​សម្រាប់​ភរិយា​និង​កូន​របស់​លោក​ ក្រោយ​ពី​បាន​ទទួល​ការ​គំរាម​កំហែង ដែល​លោក​ថា​ទាក់ទង​នឹង​ការ​រិះគន់​របស់​លោក​ចំពោះ​របៀប​ដែល​ប្រធាធិបតី​ប្រេស៊ីល​បាន​ចាត់​ការ​ក្នុង​ការ​ទប់ស្កាត់​ជំងឺ​កូវីដ១៩។

លោក Nelson Teich ដែល​ជា​អ្នក​ជំនាញ​ខាង​ជំងឺ​មហារីក​នាំ​មុខ​គេ​របស់​ប្រេស៊ីល ដែល​នៅ​មាន​ទំនាក់ទំនង​ការងារ​បាន​ជាមួយ​លោក Bolsonaro នឹង​ជំនួស​លោក Mandetta ដែលមាន​ទំនាស់​ខ្លាំង​ជាមួយ​ប្រធានាធិបតី​ក្នុង​រឿង​ដូច​ជា​វិធានការ​ឲ្យ​ដាក់​នៅ​ដាច់​ដោយ​ឡែក​ពី​សង្គម។

ក៏​ប៉ុន្តែ​រដ្ឋមន្ត្រី​ថ្មី Teich ក៏​យល់​ស្រប​ជាមួយ​នឹង​រដ្ឋមន្ត្រី​មុន ដែរ​ថា ការ​រក្សា​គម្លាត​ពី​គ្នា​ក្នុង​សង្គម​ជា​មួយ​មធ្យោបាយ​សម្រាប់​ទប់ស្កាត់​ជំងឺ​រាតត្បាត​កូវីដ១៩ ប៉ុន្តែ​លោក Bolsonaro តែង​និយាយ​ថា​ការ​ធ្វើ​ដូច្នេះ​ប៉ះពាល់​សេដ្ឋកិច្ច។​

អ្នក​ជំនាញ​សុខាភិបាល​នៅ​ប្រេស៊ីល​និង​ក្រៅប្រទេស​បាន​រិះគន់​លោក Bolsonaro ថា​មិន​យក​ចិត្ត​ទប់ស្កាត់​ការ​រាតត្បាត​ជំងឺ​កូវីដ១៩ ដែល​មក​ត្រឹម​ថ្ងៃ​ព្រសហ្បតិ៍​បានឆ្លង​ដល់​ជាង​ ៣០.០០០​ករណី​ និង​មាន​អ្នក​ស្លាប់​ជិត ​២.០០០​នាក់​ហើយ​នៅ​ប្រេស៊ីល៕

XS
SM
MD
LG