ភ្នំពេញ —
ព្រះរាជអាជ្ញានិងចៅក្រមនៅតុលាការខ្មែរក្រហមបានបង្ហាញការមិនចុះសម្រុងគ្នាជុំវិញការកំណត់កាលបរិច្ឆេទនៃការបើកសវនាការលើសំណុំរឿង០០២វគ្គទី២ដែលនឹងត្រូវកាត់បន្តទៀតលើមេដឹកនាំខ្មែរក្រហមពីររូបដែលនៅមានជីវិត។ ការខ្វែងមតិគ្នានេះធ្វើឡើងក្នុងកិច្ចប្រជុំមួយរបស់ខ្លួននៅអង្គជំនុំជម្រះសាលាដំបូងនៃតុលាការខ្មែរក្រហមនៅថ្ងៃពុធនេះ។
លោកនីកូឡាស គុមជាន (Nicholas Koumjian) សហព្រះរាជអាជ្ញាជាតិអាមេរិកាំងដែលត្រូវបានតែងតាំងជាផ្លូវការដោយអង្គការសហប្រជាជាតិបានជំរុញការបើកសវនាការលើសំណុំរឿង០០២វគ្គទី២ឱ្យឆាប់ៗ ក្រោមហេតុផលនៃភាពចាស់ជរារបស់ជនជាប់ចោទ និងសារៈសំខាន់នៃសំណុំរឿងនេះ។
«ឧក្រិដ្ឋកម្មដែលបានកើតឡើង៣០ទៅ៤០ឆ្នាំរួចមកហើយនោះ គឺថាជនជាប់ចោទគាត់មានវ័យចំណាស់ ហេតុដូច្នេះហើយយើងគួរតែរៀបចំសវនាការជំនុំជម្រះឱ្យបានលឿនតាមតែអាចធ្វើទៅបាន។ ម្យ៉ាងទៀតការដំណើរក្តីកាន់តែលឿននឹងជួយកាត់បន្ថយចំណាយ។ ខ្ញុំគិតថាវាចំណាយពេលមួយរយៈក្នុងការបង្កើតក្រុមប្រឹក្សានេះនិងបកប្រែឯកសារជាដើម ដូច្នេះការងារនេះវាតម្រូវឱ្យយើងមានការប្រឹងប្រែងខ្លាំងណាស់»។
ការពិភាក្សានេះធ្វើឡើងក្រោយពីអង្គជំនុំជម្រះជាន់ទាបនេះបានបញ្ចប់ការកាត់ក្តីសំណុំរឿង០០២វគ្គទី១កាលពីខែតុលា។ សំណុំរឿង០០២វគ្គទី២ គឺជាការជំនុំជម្រះដំណាក់កាលទីពីរប្រឆាំងនឹង នួន ជា និង ខៀវ សំផន។ ចំពោះវិសាលភាពនៃសំណុំរឿងនេះមិនទាន់ត្រូវបានសម្រេចនៅឡើយទេប៉ុន្តែអង្គជំនុំជម្រះតុលាការកំពូលនៃតុលាការខ្មែរក្រហម បានបង្គាប់នាពេលថ្មីៗនេះថាបទចោទដែលត្រូវយកមកដាក់បញ្ចូលក្នុងសំណុំរឿង០០២វគ្គទី២នេះ ត្រូវដាក់បញ្ចូលយ៉ាងហោចណាស់នូវ បទប្រល័យពូជសាសន៍ ការដ្ឋានមួយកន្លែង សហករណ៍មួយកន្លែង និងបទចោទទាក់ទឹននឹងមន្ទីរសន្តិសុខ ស ២១ នៅក្រុងភ្នំពេញ។
លោក Nicholas Koumjian បានស្នើឱ្យតុលាការបើកសវនាការលើសំណុំរឿង០០២វគ្គទី២នៅខែចុងខែកុម្ភៈ ឆ្នាំ២០១៤ និងកំណត់រយៈពេល៩៨ថ្ងៃដើម្បីបញ្ចប់សំណុំរឿងនេះ។
ប៉ុន្តែលោកស្រី Silvia Cartwright ចៅក្រមអន្តរជាតិបានទទូចឱ្យការិយាល័យសហព្រះរាជអាជ្ញារបស់លោក Nicholas Koumjian ពិចារណាលើសំណើការកំណត់កាលបរិច្ឆេទរបស់ខ្លួនឡើងវិញ ដោយផ្អែកលើឧបសគ្គមួយចំនួនក្នុងការបង្កើតអង្គជំនុំជម្រះថ្មីនេះ។
ចំណែកឯលោកស្រី Anta Guisse មេធាវីការពារលោកខៀវ សំផន បានស្នើឱ្យអង្គជំនុំជម្រះបើកសវនាការសំណុំរឿង០០២វគ្គទី២ បន្ទាប់ពីការប្រកាសសាលក្រមសំណុំរឿង០០២វគ្គទី១ ដែលនឹងត្រូវប្រកាសនៅត្រីមាសទីពីរក្នុងឆ្នាំ២០១៤។
លោកឡុង បញ្ញាវុធ ប្រធានគម្រោងនៃអង្គការគម្រោងយុត្តិធម៌នៅកម្ពុជាចាត់ទុកការពន្យាពេលរបស់សហចៅក្រមនិងមេធាវីថាជា«កង្វះឆន្ទៈ»មួយក្នុងការរកយុត្តិធម៌ជូនជនរងគ្រោះ។
«កាយវិការរបស់តុលាការដំបូងបង្ហាញថាទីមួយខ្លួនអសកម្ម ទីពីរមិនមានសេចក្តីសម្រេចណាជាក់លាក់ទាក់ទងនឹងផែនការរបស់ខ្លួនទាក់ទងការកាត់សំណុំរឿង០០២វគ្គទី២។ នេះជាការមួយដ៏សោកស្តាយហើយអ្វីដែលសាធារណជនចង់បានគឺពេលវេលា ពេលណាដែលសំណុំរឿង០០២វគ្គទី២នេះអាចធ្វើទៅកើត»។
កិច្ចប្រជុំរបស់ថ្នាក់ដឹកនាំតុលាការខ្មែរក្រហមជុំវិញការរៀបចំសវនាការលើសំណុំរឿង០០២វគ្គទីពីរនេះនឹងបន្តទៅថ្ងៃស្អែកទៀតដោយផ្តោតការពិភាក្សាទៅលើបញ្ហារដ្ឋបាលនិងហិរញ្ញវត្ថុ វិសាលភាពនិងកាលបរិច្ឆេទសវនាការសម្រាប់សំណុំរឿងថ្មីនេះ។
សំណុំរឿង០០២មានជនជាប់ចោទចំនួនបួននាក់ប៉ុន្តែជនជាប់ចោទដែលនៅរស់រានមានជីវិតមានតែនួន ជា អតីតប្រធានសភាខ្មែរក្រហម ដែលគេស្គាល់ថាជាមេមនោគមវិជ្ជានៃរបបនោះនិងខៀវ សំផន អតីតប្រមុខរដ្ឋ។ ដោយឡែកអៀង សារី បានស្លាប់កាលពីដើមឆ្នាំនេះដោយសារជំងឺនិងវ័យចាស់ជរានិងប្រពន្ធរបស់គាត់អៀង ធីរិទ្ធ ត្រូវដោះលែងឲ្យនៅក្រៅឃុំដោយសារជំងឺវង្វេងវង្វាន់លែងដឹងអី្វ។
នួន ជា នៅពេលនេះមានអាយុ៨៧ឆ្នាំ រីឯខៀវ សំផន មានអាយុ៨២ឆ្នាំ៕
លោកនីកូឡាស គុមជាន (Nicholas Koumjian) សហព្រះរាជអាជ្ញាជាតិអាមេរិកាំងដែលត្រូវបានតែងតាំងជាផ្លូវការដោយអង្គការសហប្រជាជាតិបានជំរុញការបើកសវនាការលើសំណុំរឿង០០២វគ្គទី២ឱ្យឆាប់ៗ ក្រោមហេតុផលនៃភាពចាស់ជរារបស់ជនជាប់ចោទ និងសារៈសំខាន់នៃសំណុំរឿងនេះ។
«ឧក្រិដ្ឋកម្មដែលបានកើតឡើង៣០ទៅ៤០ឆ្នាំរួចមកហើយនោះ គឺថាជនជាប់ចោទគាត់មានវ័យចំណាស់ ហេតុដូច្នេះហើយយើងគួរតែរៀបចំសវនាការជំនុំជម្រះឱ្យបានលឿនតាមតែអាចធ្វើទៅបាន។ ម្យ៉ាងទៀតការដំណើរក្តីកាន់តែលឿននឹងជួយកាត់បន្ថយចំណាយ។ ខ្ញុំគិតថាវាចំណាយពេលមួយរយៈក្នុងការបង្កើតក្រុមប្រឹក្សានេះនិងបកប្រែឯកសារជាដើម ដូច្នេះការងារនេះវាតម្រូវឱ្យយើងមានការប្រឹងប្រែងខ្លាំងណាស់»។
ការពិភាក្សានេះធ្វើឡើងក្រោយពីអង្គជំនុំជម្រះជាន់ទាបនេះបានបញ្ចប់ការកាត់ក្តីសំណុំរឿង០០២វគ្គទី១កាលពីខែតុលា។ សំណុំរឿង០០២វគ្គទី២ គឺជាការជំនុំជម្រះដំណាក់កាលទីពីរប្រឆាំងនឹង នួន ជា និង ខៀវ សំផន។ ចំពោះវិសាលភាពនៃសំណុំរឿងនេះមិនទាន់ត្រូវបានសម្រេចនៅឡើយទេប៉ុន្តែអង្គជំនុំជម្រះតុលាការកំពូលនៃតុលាការខ្មែរក្រហម បានបង្គាប់នាពេលថ្មីៗនេះថាបទចោទដែលត្រូវយកមកដាក់បញ្ចូលក្នុងសំណុំរឿង០០២វគ្គទី២នេះ ត្រូវដាក់បញ្ចូលយ៉ាងហោចណាស់នូវ បទប្រល័យពូជសាសន៍ ការដ្ឋានមួយកន្លែង សហករណ៍មួយកន្លែង និងបទចោទទាក់ទឹននឹងមន្ទីរសន្តិសុខ ស ២១ នៅក្រុងភ្នំពេញ។
លោក Nicholas Koumjian បានស្នើឱ្យតុលាការបើកសវនាការលើសំណុំរឿង០០២វគ្គទី២នៅខែចុងខែកុម្ភៈ ឆ្នាំ២០១៤ និងកំណត់រយៈពេល៩៨ថ្ងៃដើម្បីបញ្ចប់សំណុំរឿងនេះ។
ប៉ុន្តែលោកស្រី Silvia Cartwright ចៅក្រមអន្តរជាតិបានទទូចឱ្យការិយាល័យសហព្រះរាជអាជ្ញារបស់លោក Nicholas Koumjian ពិចារណាលើសំណើការកំណត់កាលបរិច្ឆេទរបស់ខ្លួនឡើងវិញ ដោយផ្អែកលើឧបសគ្គមួយចំនួនក្នុងការបង្កើតអង្គជំនុំជម្រះថ្មីនេះ។
ចំណែកឯលោកស្រី Anta Guisse មេធាវីការពារលោកខៀវ សំផន បានស្នើឱ្យអង្គជំនុំជម្រះបើកសវនាការសំណុំរឿង០០២វគ្គទី២ បន្ទាប់ពីការប្រកាសសាលក្រមសំណុំរឿង០០២វគ្គទី១ ដែលនឹងត្រូវប្រកាសនៅត្រីមាសទីពីរក្នុងឆ្នាំ២០១៤។
លោកឡុង បញ្ញាវុធ ប្រធានគម្រោងនៃអង្គការគម្រោងយុត្តិធម៌នៅកម្ពុជាចាត់ទុកការពន្យាពេលរបស់សហចៅក្រមនិងមេធាវីថាជា«កង្វះឆន្ទៈ»មួយក្នុងការរកយុត្តិធម៌ជូនជនរងគ្រោះ។
«កាយវិការរបស់តុលាការដំបូងបង្ហាញថាទីមួយខ្លួនអសកម្ម ទីពីរមិនមានសេចក្តីសម្រេចណាជាក់លាក់ទាក់ទងនឹងផែនការរបស់ខ្លួនទាក់ទងការកាត់សំណុំរឿង០០២វគ្គទី២។ នេះជាការមួយដ៏សោកស្តាយហើយអ្វីដែលសាធារណជនចង់បានគឺពេលវេលា ពេលណាដែលសំណុំរឿង០០២វគ្គទី២នេះអាចធ្វើទៅកើត»។
កិច្ចប្រជុំរបស់ថ្នាក់ដឹកនាំតុលាការខ្មែរក្រហមជុំវិញការរៀបចំសវនាការលើសំណុំរឿង០០២វគ្គទីពីរនេះនឹងបន្តទៅថ្ងៃស្អែកទៀតដោយផ្តោតការពិភាក្សាទៅលើបញ្ហារដ្ឋបាលនិងហិរញ្ញវត្ថុ វិសាលភាពនិងកាលបរិច្ឆេទសវនាការសម្រាប់សំណុំរឿងថ្មីនេះ។
សំណុំរឿង០០២មានជនជាប់ចោទចំនួនបួននាក់ប៉ុន្តែជនជាប់ចោទដែលនៅរស់រានមានជីវិតមានតែនួន ជា អតីតប្រធានសភាខ្មែរក្រហម ដែលគេស្គាល់ថាជាមេមនោគមវិជ្ជានៃរបបនោះនិងខៀវ សំផន អតីតប្រមុខរដ្ឋ។ ដោយឡែកអៀង សារី បានស្លាប់កាលពីដើមឆ្នាំនេះដោយសារជំងឺនិងវ័យចាស់ជរានិងប្រពន្ធរបស់គាត់អៀង ធីរិទ្ធ ត្រូវដោះលែងឲ្យនៅក្រៅឃុំដោយសារជំងឺវង្វេងវង្វាន់លែងដឹងអី្វ។
នួន ជា នៅពេលនេះមានអាយុ៨៧ឆ្នាំ រីឯខៀវ សំផន មានអាយុ៨២ឆ្នាំ៕
