ទីក្រុងឡាអេ ៖ លោក Charles Taylor អតីតប្រធានាធិបតីនៃប្រទេសលីបេរីយ៉ា បានធ្វើពហិការមិនចូលរួមក្នុង ការជំនុំជម្រះកាត់សេចក្ដីរូបលោកចូលដល់ថ្ងៃទីពីរជាប់ៗគ្នា ក្នុងតុលាការស្ថិតនៅទីក្រុង ឡាអេ ទេ។ពហិការនេះបានបង្ខំឲ្យចៅក្រមផ្អាកដំណើរការ ជំនុំជម្រះរហូតដល់ថ្ងៃសុក្រវិញ។ លោក Taylor ជាប់ចោទក្នុងបទឧក្រិដ្ឋកម្មសង្គ្រាមនិង ឧក្រិដ្ឋកម្មប្រឆាំងមនុស្សជាតិ ១១ករណីដោយបានបំពាក់អាវុធក្រុមបះបោរនៅក្នុងប្រទេស Sierra Leone ជិតខាង ដែលបានធ្វើសង្គ្រាមក្នុងស្រុកយ៉ាងព្រៃផ្សៃ។
ការមិនបង្ហាញខ្លួនរបស់លោក Taylor កើតមានឡើងនៅថ្ងៃដែលក្រុមមេធាវីរបស់លោក ត្រូវធ្វើការជជែកវែកញែកចុងបញ្ចប់របស់អស់លោក អំពីករណី ឧក្រិដ្ឋកម្មសង្គ្រាមរបស់លោករយ:ពេល៣ឆ្នាំ។
កាលពីថ្ងៃអង្គារ មេធាវីការពារក្ដីរបស់លោក ចេញពីតុលាការយ៉ាងលឿន ហើយនិយាយថាលោកមិនអាចការពារកូនក្ដីរបស់លោកដោយត្រឹមត្រូវបានទេ ក្រោយពីក្រុមចៅក្រមបដិសេធមិនព្រមទទួលយកសេចក្ដីសង្ខេបនៃការជជែកវែកញែកចុងបញ្ចប់ជាលាយលក្ខណ៍អក្សររបស់លោកពីព្រោះលោកបានដាក់ក្រោយថ្ងៃកំណត់។
នៅថ្ងៃអង្គារការជំនុំជម្រះកាត់សេចក្ដីលោក CharlesTaylor បានមកដល់ទីបញ្ចប់ហើយ មានរបៀបដូចគ្នានឹងពេលចាប់ផ្ដើមធ្វើកាលពីបីឆ្នាំមុន ដោយមេធាវីរបស់អតីតប្រធានាធិបតីដើរចេញពីតុលាការ។
លោក Courtenay Griffiths បំពានលើពាក្យបញ្ជារបស់ចៅក្រម ឲ្យលោកស្ថិតនៅក្នុងតុលាការហើយស្ដាប់ ការជជែកវែកញែកចុងបញ្ចប់របស់រដ្ឋអាជ្ញា ដោយនិយាយថា លោកមិនអាចការពារកូនក្ដីរបស់លោកដោយត្រឹមត្រូវបានទេ។
«នៅក្នុងការដាក់ សេចក្ដីសង្ខេបរបស់យើងនោះវត្ដមានជាក់ស្ដែងរបស់យើងនៅក្នុងតុលាការមិនស៊ីគ្នានិងភារ:កិច្ចរបស់យើងដើម្បីការពារផលប្រយោជន៍របស់លោក Taylor ទេ។ ហើយនេះជាគោលបំណងរបស់យើង ទាំងខ្លួនខ្ញុំទាំងលោក Taylor ចេញពីតុលាការនៅក្នុងដំណាក់កាលនេះ»។
លោកស្រី Brenda Hollis រដ្ឋអាជ្ញា ចាប់ផ្ដើមសេចក្ដីលំអិតនៃ ការជជែកវែកញែកចុងបញ្ចប់របស់លោកស្រីថា លោក Charles Taylor ទទួលខុសត្រូវក្នុងបទឧក្រិដ្ឋកម្ម និងយ៉ាងជាក់ស្ដែងចំពោះអំពើយង់ឃ្នងក្នុងសង្គ្រាមដែលលោកបានធ្វើទៅលើពលរដ្ឋនៃប្រទេស Sierra Leone ជិតខាង ដោយប្រើក្រុមប្រយុទ្ធ RUF របស់លោក។
«លោក Charles Taylor អ្នកមានលក្ខណ:សម្បត្ដិយ៉ាងគាប់ចិត្ដមានល្បិចយ៉ាងប៉ិនប្រសប់និងមានប្រាជ្ញាឈ្លាសវៃ ឲ្យកងកម្លាំងហើយនឹងសមាជិកនៃកងកម្លាំង Liberia របស់លោក ប្រព្រិត្ដឧក្រិដ្ឋកម្មទាំងនោះ ដើម្បីគ្រប់គ្រងមនុស្សហើយនិងទឹកដីនៃប្រទេស Sierra Leone ដោយបង្ខំ ហើយនឹងដើម្បីលួចប្លន់ធនធានរបស់ប្រទេសនេះ ជាពិសេសពេជ្រនៃប្រទេសនេះ ហើយពួកនោះប្រព្រិត្ដអំពើទាំងនោះតាមរយ:មធ្យោបាយឧក្រិដ្ឋដែលលោកហើយនឹងពួកគេបានព្រមព្រៀងគ្នា គឺយុទ្ធនាការបំភ័យខ្លាំងក្លា ដែលលោកបានធ្វើទៅលើពលរដ្ឋស្លូតត្រង់នៃប្រទេស Sierra Leone។ សេចក្ដីរងទុក្ខវេទនាទាំងអស់នេះ អំពើឃោរឃៅទាំងអស់នេះ គឺដើម្បីការលោភលន់ហើយនឹងការឈ្លក់ចង់បានអំណាចរបស់លោក Charles Taylor»។
លោកស្រី Hollis រដ្ឋអាជ្ញា និយាយអំពីអំពើឃារឃៅទាំងនោះយ៉ាងលំអិតថា មានការកាប់សម្លាប់ក្នុងចំនួនច្រើនលើសលប់ ការកាត់ដៃជើងជាសាធារណ: ការបង្ខំឲ្យមាតាត្រូវបង្ខំឲ្យសើចនៅពេលដែលកូនរបស់ពួកគេត្រូវបានកប់ទាំងរស់ ឬពួកគេត្រូវបីក្បាលដែលត្រូវកាត់របស់សពកូនទាំងនោះ ការរំលោភភេទលើស្ដ្រីទាំងក្រុមៗ ការដាក់សង្គ្រប់មនុស្សនៅក្នុងរ៉ែត្បូងពេជ្រ ហើយនឹងកុមារត្រូវកេណ្ឌឲ្យប្រយុទ្ធ។ មានមនុស្សប្រមាណ១សែន២ម៉ឺននាក់ត្រូវបានសម្លាប់ ហើយរាប់ពាន់នាក់ទៀតត្រូវបានកាត់ដៃជើងក្នុងរយ:ពេលសង្គ្រាមក្នុងស្រុក១០ឆ្នាំ។ លោក Taylor អះអាងថាលោកគ្មានទោសពៃរ៍អ្វីទេនៅក្នុងការចោទ១១ករណីទៅលើខ្លួនលោក នៅក្នុងតុលាការពិសេសស្ដីពីប្រទេស Sierra Leone។
ក្រុមមេធាវីការពារក្ដីត្រូវបានកំណត់ធ្វើ ការជជែកវែកញែកចុងបញ្ចប់របស់ពួកគេនៅថ្ងៃពុធ ក៏ប៉ុន្ដែលោកមេធាវី Griffiths និយាយថា លោកនឹងធ្វើពហិការមិនចូលរួមក្នុងដំណើរការកាត់សេចក្ដីនេះទេ ដោយរង់ចាំការឡើងឧទ្ធរណ៍របស់លោកអំពីសេចក្ដីសម្រេចរបស់ក្រុមចៅក្រមដែលមិនទទួលយកសេចក្ដីសង្ខេបនៃការជជែកវែកញែកចុងបញ្ចប់ជាលាយលក្ខណ៍អក្សររបស់លោក៕
ប្រែសម្រួលដោយ កង ស៊ីវន
