លោក Jeff Sessions ដែលជាសមាជិកព្រឹទ្ធសភាអភិរក្សនិយមខាងគណបក្សសាធារណរដ្ឋដ៏មានឥទ្ធិពលម្នាក់ គឺជាអ្នកគាំទ្រមុនដំបូងគេដ៏ខ្លាំងក្លាមួយរូបនៃយុទ្ធនាការឃោសនាបោះឆ្នោតប្រជែងយកតំណែងប្រធានាធិបតីរបស់លោក ដូណាល់ ត្រាំ ដែលកាលនោះមានសង្ឃឹមថាឈ្នះតិចតួចតែប៉ុណ្ណោះ។
ប៉ុន្តែក្នុងពេលប៉ុន្មានថ្ងៃនេះ លោក ត្រាំ បានបន្ទោសលោក Sessions ចំពោះការដកខ្លួនចេញពីការស៊ើបអង្កេតលើករណីរុស្ស៊ីជ្រៀតជ្រែកក្នុងការបោះឆ្នោតអាមេរិក ដោយលោក ត្រាំ បានហៅលោក Sessions ថា «កំសាក» និង«ទន់ខ្សោយ»។
លោកសមាជិកព្រឹទ្ធសភា Chuck Schumer ដែលជាមេដឹកនាំសម្លេងភាគតិចនៅក្នុងព្រឹទ្ធសភាខាងគណបក្សប្រជាធិបតេយ្យ បានមានប្រសាសន៍ថា៖ «វាច្បាស់ណាស់ថា លោកប្រធានាធិបតី ត្រាំ កំពុងតែព្យាយាមរករឿងឲ្យរដ្ឋមន្ត្រីក្រសួងយុត្តិធម៌របស់លោកចេញពីតំណែង»។
តំណាងរាស្ត្រខាងគណបក្សសាធារណរដ្ឋមួយចំនួនកំពុងតែនិយាយគាំទ្រលោក Sessions ដែលជាអតីតសហការីរបស់ខ្លួន។
លោក Orrin Hatch សមាជិកព្រឹទ្ធសភាតំណាងរដ្ឋ Utah ខាងគណបក្សសាធារណរដ្ឋ បានថ្លែងថា៖ «លោក Jeff គឺជាមនុស្សម្នាក់ដែលស្មោះត្រង់នឹងលោកប្រធានាធិបតី ហើយខ្ញុំគិតថា លោកគួរតែទទួលបានភាពស្មោះត្រង់ត្រឡប់មកវិញដែរ»។
លោក Sessions ក៏ដូចជារដ្ឋមន្ត្រីដទៃទៀតដែលត្រូវបានតែងតាំងនៅក្នុងគណៈរដ្ឋមន្ត្រីដែរ គឺបំពេញការងារទៅតាមបំណងរបស់លោកប្រធានាធិបតី។
លោក Paul Ryan ប្រធានរដ្ឋសភា ខាងគណបក្សសាធារណរដ្ឋ បាននិយាយថា៖ «វាអាស្រ័យទៅលើលោកប្រធានាធិបតីក្នុងការសម្រេចចិត្តទៅលើថាអ្វីជាការសម្រេចចិត្តរបស់បុគ្គលិកលោក ហើយវាក៏អាស្រ័យលើលោកប្រធានាធិបតីក្នុងការសម្រេចចិត្តលើលទ្ធផលដែលកើតចេញពីការសម្រេចចិត្តនោះផងដែរ»។
លោក ត្រាំ បានបដិសេធកាលពីថ្ងៃអង្គារ ថា លោកមិនបានទុកឲ្យលោក Sessions នៅវិលវល់ក្នុងខ្យល់នោះទេ ប៉ុន្តែលោកមិនបានចាត់វិធានការអ្វីមួយដើម្បីជួយដល់លោករដ្ឋមន្ត្រីក្រសួងយុត្តិធម៌រូបនេះទេ។
លោកប្រធានាធិបតី ដូណាល់ ត្រាំ បានថ្លែងថា៖ «ខ្ញុំពិតជាអន់ចិត្តនឹងលោករដ្ឋមន្ត្រីក្រសួងយុត្តិធម៌ណាស់។ យើងនឹងរង់ចាំមើលថាតើនឹងមានរឿងអ្វីកើតឡើងបន្តទៀត។ មានតែពេលវេលាទេ ដែលអាចប្រាប់បាន»។
លោកប្រធានាធិបតីអាចនឹងបាត់បង់ការគាំទ្រខាងនយោបាយយ៉ាងច្រើនពីសំណាក់អ្នកអភិរក្សនិយម ចំពោះការបោះបង់ចោលអ្នកគាំទ្រយ៉ាងខ្លាំងក្លាម្នាក់ ដូចជាលោក Sessions ជាដើម។
លោក Dan Mahaffee នៃមជ្ឈមណ្ឌលសម្រាប់សិក្សាលើការដឹកនាំរបស់ប្រធានាធិបតីនិងរដ្ឋសភា (Center for the Study of the Presidency & Congress) បានមានប្រសាសន៍ថា៖ «តំណាងរាស្ត្រជាច្រើនកំពុងតែងឿងឆ្ងល់ថា តើពួកគេអាចរក្សាតុល្យភាពរវាងទំនាក់ទំនងរបស់ពួកគេជាមួយនឹងលោកប្រធានាធិបតីនិងតម្រូវការក្នុងការសម្រេចឲ្យបាននូវគោលនយោបាយដែលពួកគេចង់សម្រេចឲ្យបានទាំងនេះបានយូរប៉ុណ្ណា ដោយសារតែសេតវិមាននិងសភាទាំងពីរថ្នាក់គ្រប់គ្រងដោយគណបក្សសាធារណរដ្ឋ»។
លោក ដូណាល់ ត្រាំ ដែលបានក្លាយជាបេក្ខជនប្រធានាធិបតីដ៏លេចធ្លោម្នាក់ បានប្រើប្រាស់គោលនយោបាយជាច្រើនរបស់លោក Sessions ដូចជាគោលនយោបាយអន្តោប្រវេសន៍ជាដើម ដើម្បីទទួលបានការគាំទ្រពីអ្នកអភិរក្សនិយមនៅអាមេរិកនិងជួយឲ្យលោកទទួលបានតំណែងជាប្រធានាធិបតីរហូតមកដល់សព្វថ្ងៃនេះ៕
ប្រែសម្រួលដោយ ហុង ចិន្តា