លោក Jeff Sessions រដ្ឋមន្ត្រីក្រសួងយុត្តិធម៌អាមេរិក បានបដិសេធកាលពីថ្ងៃអង្គារថា លោកមិនបានឃុបឃិតជាមួយនឹងរុស្ស៊ីនៅក្នុងការបោះឆ្នោតប្រជែងយកតំណែងប្រធានាធិបតីអាមេរិកកាលពីឆ្នាំ២០១៦ ដើម្បីជួយដល់លោកប្រធានាធិបតី Donald Trump នោះទេ។
លោក Sessions បានថ្លែងនៅក្នុងសវនការទៅកាន់គណៈកម្មាធិការស៊ើបការណ៍សម្ងាត់ព្រឹទ្ធសភា ដែលត្រូវបានគេតាមដានយ៉ាងជិតស្និទ្ធថា «ខ្ញុំមិនដែលជួប ឬសន្ទនាជាមួយនឹងជនជាតិរុស្ស៊ី ឬមន្ត្រីបរទេសណា ពាក់ព័ន្ធនឹងការជ្រៀតជ្រែកនៅក្នុងយុទ្ធនាការបោះឆ្នោតឬការបោះឆ្នោតនៅក្នុងសហរដ្ឋអាមេរិកនោះទេ»។
លោកបានបន្ថែមថា «ការលើកឡើងដែលថា ខ្ញុំបានឃុបឃិត និងការចោទប្រកាន់ដែលថា ខ្ញុំបានដឹងអំពីការឃុបឃិតជាមួយនឹងរដ្ឋាភិបាលរុស្ស៊ីដើម្បីធ្វើឲ្យប៉ះពាល់ដល់ប្រទេសនេះ ដែលខ្ញុំបានបម្រើអស់រយៈពេល៣៥ឆ្នាំ ឬការបន្ទាបតម្លៃសុច្ចរិតភាពនៃដំណើរការប្រជាធិបតេយ្យរបស់យើង គឺជាការតក់ស្លុតនិងជាការកុហកដ៏គួរឲ្យស្អប់»។ ដោយលើកឡើងពីការចោទប្រកាន់ដែលថា លោកបានជួបជាមួយនឹងមន្ត្រីរុស្ស៊ីដោយមិនបានរាយការណ៍ ខណៈលោកបានផ្តល់ទីប្រឹក្សាដល់យុទ្ធនាការរបស់លោក Trump លោក Sessions បាននិយាយថា លោកបានទទួលស្គាល់ជំនួបចំនួន២កាលពីឆ្នាំមុន ជាមួយនឹងលោកឯកអគ្គរដ្ឋទូតរុស្ស៊ី Sergey Kislyak។
ប៉ុន្តែលោក Sessions បានច្រានចោលការចោទប្រកាន់ដែលថា លោកបានជួបជាមួយនឹងលោក Kislyak ជាលើកទី៣ នៅក្នុងពិធីបដិណ្ឋារកិច្ចមួយកាលពីថ្ងៃទី២៧ ខែមេសា ឆ្នាំ២០១៦ សម្រាប់លោក Trump នៅសណ្ឋាគារ Mayflower ក្នុងរដ្ឋធានី Washington៕
