លោក Robert Mueller រដ្ឋអាជ្ញាពិសេសបានសន្និដ្ឋានថា រុស្ស៊ីបានចូលជ្រៀតជ្រែកជាលក្ខណៈប្រព័ន្ធក្នុងការបោះឆ្នោតនៅប្រធានាធិបតីសហរដ្ឋអាមេរិកក្នុងឆ្នាំ២០១៦ ដើម្បីជួយឱ្យលោក Donald Trump ក្លាយជាប្រធានាធិបតី ប៉ុន្តែថា បញ្ហានៅតែជារឿងរសើបខ្លាំងពេកមិនអាចដើម្បីពិភាក្សានៅចំពោះមុខលោក Trump ព្រោះវាទាក់ទងទៅនឹងអ្វីដែលរដ្ឋាភិបាលក្រុងម៉ូស្គូអាចធ្វើទៀតនៅពេលលោក Trump ឈរឈ្មោះប្រធានាធិបតីម្តងទៀតនៅឆ្នាំ២០២០។
កាសែត The New York Times បានរាយការណ៍កាលពីថ្ងៃពុធថា លោកស្រី Kirstjen Nielsen អតីតរដ្ឋមន្ត្រីសន្តិសុខមាតុភូមិបានព្យាយាមទាក់ទាញការយកចិត្តទុកដាក់របស់មន្រ្តីជាន់ខ្ពស់អាមេរិកប្រឆាំងនឹងឥទ្ធិពលរបស់រុស្ស៊ីនៅក្នុងការបោះឆ្នោតនៅឆ្នាំក្រោយក្នុងពេលប៉ុន្មានខែមុនពេលលោក Trump បានបង្ខំឱ្យលោកស្រីលាលែងពីតំណែងនៅដើមខែមេសា បន្ទាប់ពីមានជម្លោះអូសបន្លាយអំពីនយោបាយអន្តោប្រវេសន៍។
ប៉ុន្តែកាសែតនេះបានដកស្រង់សម្តីមន្រ្តីរដ្ឋបាលជាន់ខ្ពស់របស់លោក Trump ដែលសុំមិនបញ្ចេញឈ្មោះថា លោក Mick Mulvaney ប្រធានស្តីទីនៃការិយាល័យសេតវិមានបានព្រមានមិនឲ្យលោកស្រី Nielsen លើកឡើងបញ្ហានេះនៅចំពោះមុខលោក Trump ដែលបានធ្វើការពិភាក្សាដូចគ្នាថាតើការជ្រៀតជ្រែករបស់រុស្ស៊ីក្នុងការបោះឆ្នោតឆ្នាំ ២០១៦ ធ្វើឲ្យជ័យជម្នះរបស់លោកស្របច្បាប់ឬទេ។
កាសែត The New York Times បានដកស្រង់សម្តីមន្រ្តីរដ្ឋបាលជាន់ខ្ពស់ម្នាក់ដែលបាននិយាយថា លោក Mulvaney បានប្រាប់លោកស្រី Nielsen ថា ការជ្រៀតជ្រែករបស់រុស្ស៊ីក្នុងការបោះឆ្នោតប្រធានាធិបតីនាពេលខាងមុខ «មិនមែនជាប្រធានបទដ៏សំខាន់ហើយគួរតែរក្សាទុកនៅក្រោមកម្រិតប្រធានាធិបតី»៕
