សម្តេចប៉ាប Francis នឹងបញ្ចប់ទស្សនកិច្ចរបស់សម្តេចក្នុងស.រ.អានៅថ្ងៃអាទិត្យនេះ ជាមួយទស្សនកិច្ចទៅកាន់ពន្ធនាគារមួយ និងការប្រារព្ធពិធីបន់ស្រន់ Mass ចុងក្រោយមួយ ក្នុងទីក្រុង Philadelphia។
ជំនួបរបស់សម្តេច Francis ជាមួយអ្នកទោសប្រមាណ១០០នាក់នៅពន្ធនាគារ Curran-Fromhold Correctional Facility តំណាងឲ្យការអំពាវនាវរបស់សម្តេចឲ្យវិហារសាសនាផ្តោតការចាប់អារម្មណ៍ឲ្យបានច្រើនឡើងថែមទៀត ដល់មនុស្សដែលត្រូវបានសង្គមមិនយកចិត្តទុកដាក់ និងបំភ្លេចចោល ដែលមានរួមទាំងអ្នកក្រ ជនអន្តោប្រវេសន៍ និងអ្នកទោស។ អ្នកទោសនៅក្នុងពន្ធនាគារ Curran-Fromhold គ្រោងនឹងថ្វាយសម្តេចនូវកៅអីមួយ ដែលស្រដៀងនឹងរាជ្យបល្ល័ង្ក ដែលពួកគេបានធ្វើដោយប្រើឧបករណ៍ដៃ មិនប្រើភ្លើងអគ្គីសនី និងពីឈើខ្មៅ។
ពិធីបន់ស្រន់ Mass នឹងធ្វើឡើងនៅរុក្ខវិថី Benjamin Franklin Parkway ដែលនៅទីនោះ សម្តេច Francis បានចូលរួមជាមួយមនុស្សរាប់ពាន់នាក់ កាលពីយប់ថ្ងៃសៅរ៍ក្នុងពិធីបុណ្យជាលក្ខណៈគ្រួសារ ដោយមានការបន់ស្រន់ និងការច្រៀងរបស់សិល្បករជាច្រើន ព្រមទាំងការថ្លែងរបស់គ្រួសារជាច្រើនមកពីជុំវិញពិភពលោក៕
