មេដឹកនាំយោធាមីយ៉ាន់ម៉ាបានថ្លែងប្រាប់សម្តេចសង្ឃ Pope Francis ថា «គ្មានករណីរើសអើងសាសនា» កើតមានឡើងនៅក្នុងប្រទេសមីយ៉ាន់ម៉ា ដូចទៅនឹងអ្វីដែលសហរដ្ឋអាមេរិកបានចោទប្រកាន់ថា មានការប្រឆាំងនឹងក្រុមអំបូររ៉ូហ៊ីងយ៉ាដោយហិង្សា ហើយថា ទង្វើនេះគឺជា «យុទ្ធនាការបោះសម្អាតក្រុមជនជាតិភាគតិច»។
នាយឧត្តមសេនីយ៍ Min Aung Hlaing បានលើកឡើងតាមរយៈទំព័រ Facebook ដែលបានចេញផ្សាយដោយការិយាល័យរបស់លោកថា៖ «គ្មានការរើសអើងសាសនានៅក្នុងប្រទេសមីយ៉ាន់ម៉ាទាល់តែសោះ។ ហើយក៏គ្មានបញ្ហាកងទ័ពកើតឡើងផងដែរ។ អ្វីៗដែលកងទ័ពរបស់យើងបានធ្វើ គឺដើម្បីរក្សាសន្តិភាព និងស្ថិរភាពសម្រាប់ប្រទេសជាតិទាំងមូល»។
សម្តេចសង្ឃ Pope Francis កាលពីថ្ងៃចន្ទម្សិលមិញ បានជួបជាមួយមេដឹកនាំយោធាមីយ៉ាន់ម៉ា នៅពេលដែលលោកបានចាប់ផ្តើមដំណើរទស្សនកិច្ចទៅកាន់ប្រទេសក្នុងតំបន់អាស៊ីអាគ្នេយ៍ ដើម្បីពិភាក្សាអំពីបញ្ហាអំពើហិង្សាក្នុងរដ្ឋRakhine ដែលបានបណ្តាលឲ្យជនជាតិរ៉ូហ៊ីងយ៉ាកាន់សាសនាឥស្លាមជាង៦សែន២ម៉ឺននាក់រត់ភៀសខ្លួនទៅប្រទេសបង់ក្លាដែស។ បន្ទាប់ពីជំនួបដែលមានរយៈពេល១៥នាទី អ្នកនាំពាក្យវិមានវ៉ាទីកង់ លោក Greg Burke ថ្លែងថាភាគីទាំងពីរ «បានពិភាក្សាអំពីការទទួលខុសត្រូវរបស់អាជ្ញាធរក្នុងដំណាក់ការផ្លាស់ប្តូរនេះ»។ មុននឹងកម្មវិធីផ្លាស់ប្តូរវត្ថុអនុស្សាវរីយ៍។
នៅក្នុងដំណើរទស្សនកិច្ចលើកទី១របស់សម្តេច Pope Francis ទៅកាន់អាស៊ីសម្តេចបានជួបជាមួយមេដឹកនាំយោធានៅក្នុងគេហដ្ឋានរបស់អ្នកតំណាងសាសនាកាតូលិកក្នុងរដ្ឋធានីរ៉ុងហ្គូន ដែលជាកន្លែងលោកស្នាក់នៅរហូតដល់ពេលចេញដំណើរទៅកាន់ប្រទេសបង់ក្លាដែសនៅថ្ងៃព្រហស្បតិ៍ខាងមុខនេះ៕
