ភ្ជាប់​ទៅ​គេហទំព័រ​ទាក់ទង

សម្តេច​ប៉ាប Francis សង្ឃឹម​ថា នឹង​ទាក់ទាញ​ចំណាប់អារម្មណ៍​អន្តរជាតិ​ទៅ​លើ​វិបត្តិ​ជនភៀសខ្លួន​រ៉ូហ៊ីងយ៉ា


សម្តេចប៉ាប Francis ថ្លែង​ជូន​ពរ​ ក្នុង​ពេល​សូត្រ​ធម៌​ពេល​ថ្ងៃ​ត្រង់​មួយ​នៅ​ទីលាន St. Peter's Square នៅ​បុរី​វ៉ាទីកង់ កាលពី​ថ្ងៃទី២៦ ខែវិច្ឆិកា ឆ្នាំ២០១៧។

សម្តេចប៉ាប Francis នឹង​មក​ដល់​ប្រទេស​មីយ៉ាន់ម៉ា​នៅ​ថ្ងៃ​ចន្ទ​នេះ នៅក្នុង​កិច្ចខិតខំ​ប្រឹងប្រែង​ក្នុង​ការ​ទាក់ទាញ​ចំណាប់អារម្មណ៍​ពី​សកលលោក​ទៅ​លើ​វិបត្តិ​ជនភៀសខ្លួន​រ៉ូហ៊ីងយ៉ា​នៅ​ក្នុង​ប្រទេស​នេះ។

មេដឹកនាំ​វិហារ​សាសនា​គ្រិស្ត​និកាយ Roman Catholic រូប​នេះ​នឹង​ធ្វើ​ទស្សនកិច្ច​ទៅ​កាន់​ប្រទេស​បង់ក្លាដែស​នៅ​ថ្ងៃ​ព្រហស្បតិ៍។

កាលវិភាគ​របស់​សម្តេច​ប៉ាប មិន​មាន​ការ​ធ្វើ​ទស្សនកិច្ច​ទៅ​កាន់​ជំរំ​ជនភៀសខ្លួន​ទេ ប៉ុន្តែ​លោក​មាន​គម្រោង​នឹង​ជួបជាមួយ​នឹង​ជនអំបូរ​រ៉ូហ៊ីងយ៉ា​មួយ​ក្រុម​តូច​នៅក្នុង​រដ្ឋធានី ដាកា នៃ​ប្រទេស​បង់ក្លាដែស។

សម្តេច​ប៉ាប Francis បាន​ថ្លែង​ទៅ​កាន់​វិទ្យុ​វ៉ាទីកង់ ថា «ខ្ញុំ​មក​ដើម្បី​ប្រកាស​ជា​សាធារណៈ​អំពី​សារ​របស់​ព្រះយេស៊ូ ដែល​ជា​សារ​នៃ​ការ​ផ្សះផ្សារ​គ្នា ​អត់ឱន​ឲ្យ​គ្នា និង​សន្តិភាព។ ទស្សនកិច្ច​របស់​ខ្ញុំ​គឺ​ដើម្បី​បញ្ជាក់​ថា សហគមន៍​សាសនា​គ្រិស្ត​និកាយ Catholic នៅ​មីយ៉ាន់ម៉ា​គោរពបូជា​ព្រះជាម្ចាស់​និង​ជា​សាក្សី​នៃ​សារ​របស់​ព្រះ​យេស៊ូ‍»។ ​នៅ​ក្នុង​រយៈពេល​ប៉ុន្មាន​សប្តាហ៍​ចុង​ក្រោយ​នេះ ប្រទេស​មីយ៉ាន់ម៉ា​និង​ប្រទេស​បង់ក្លាដែស​បាន​ព្រមព្រៀង​គ្នា​ទទួល​យក​ជន​អំបូរ​រ៉ូហ៊ីងយ៉ា​រាប់សែន​នាក់​ដែល​បាន​រត់​ភៀសខ្លួន​ទៅ​កាន់​ប្រទេស​បង់ក្លាដែស ដើម្បី​គេច​ខ្លួន​ពី​អំពើ​ហិង្សា នៅ​ក្នុង​រដ្ឋ Rakhine នៃ​ប្រទេស​មីយ៉ាន់ម៉ា។ នេះ​បើ​យោង​តាម​ការ​បញ្ជាក់​របស់​ក្រុមមន្ត្រី​នៃ​ប្រទេស​ទាំងពីរ។

ទោះ​ជា​មាន​កិច្ចព្រមព្រៀង​នេះ​ក៏​ដោយ ក៏​មេគណៈ​សាសនា​គ្រិស្ត​និកាយ កាតូលិក Patrick D'Rozario ប្រចាំ​រដ្ឋធានី ដាកា បាន​ថ្លែង​ទៅ​កាន់​ទីភ្នាក់ងារ​សារព័ត៌មាន​បារាំង​AFP ថា ស្ថានភាព‍ «នៅ​តែ​មាន​គ្រាប់​មិន​ផ្ទុះ​ជាច្រើន​ហើយ​ពិបាក​នឹង​ដោះស្រាយ‍»។ លោក​បាន​បន្ត​ថា «ខ្ញុំ​សង្ឃឹម​ថា ជនអំបូរ​រ៉ូហ៊ីងយ៉ា អាច​ត្រឡប់​ទៅ​កាន់​ប្រទេស​មីយ៉ាន់ម៉ា​វិញ​បាន‍»៕

XS
SM
MD
LG